Line: 2 კანდა სგუ̂ებნე ლადეღ (ეშხუ̂ა̈მ ლეთ) ღუ̂აჟა̈რ ესღრიხ ცხეკთე ი ახღუ̂ახ ეჩხენ უცხემ ჴულ.
Line: 3 კანდა ნებოზს სოფლიშ ბოფშა̈რ ი მა̈ხეღუ̂აჟა̈რ ინზორალხ ი ხეჭმენიხ ბომბღას. სგა ხეგნიხ მეზგა
Line: 4 ყორს. ქორა̈შ მახუ̂შის ქ'ახღუ̂ა ჴულ ი ქა ხაჰუ̂დი ბომბღაშ მეჭემ ბოფშა̈რს. ალ ჴულჟი ეშხუ
Line: 5 ბეფშუ̂ს ჟი ხასგუ̂რეხ ჩაჟუ̂შალ, ეჩხენ-ამხენ ხებერგიხ ი ყუ̂ერბ კϩრკა̈ნდ ქა ხა̈ჭმინეხ ი იღრალხ:
Line: 6 "ბოოომბღა, ბოოომბღა, გუ̂ემიშ ყორჟი ხარგელია, ბოოომბღა, ბოოომბღა"! ეშხუ ა̈დგის ჩუ̂აკუ̂ანეხ
Line: 7 ალ ბეფშუ̂ს ბომბღახენჩუ. ამჟი ხაჭიმხ მთელ სოფელს ი მეზგე მა̈გ ლეზუ̂ბა̈რს ხაჰუ̂დი. ეჩქანღუ̂ე
Line: 8 ერუ̂ალე მეზგათე სგა ესღრიხ ი ჰამდ იქეიფხ (/ იხირულხ). ჩი მეზგაჲსგა ლემზϩრა̈რ ინყი ბომბღაშ
Line: 9 მუჩუ̂ემ ბოფშრეშდ.

Line: 10 კანდალადღიშ ნაჭϩშხ ჴულს მა̈გ ჩუ იშხუ̂ნიუ̂ ლიფანა̈ლისგაშდ ი ლაფანაჟი სგა ხოჩუ̂დიუ̂ხ
Line: 11 ლემასგუ̂თე. ნაფანუნღუ̂ე ჴულს ქა იტხახ ლემასგუ̂ხენქა ი ქა ხა̈დგახ. მერმე ლაფანაჟი სგაჲდ
Line: 12 ხოჩუ̂დიუ̂ხ ი ამჟი ჩი ლაფანაჟი. ქა იზგϩრიუ̂ ლიფანა̈ლი ი ჴული ჩუ იშხიუ̂ მთლია̈ნდ.

Line: 13 ბომბღას ლა̈დიჲ იჩოხ ბოფშა̈რ შუ̂ა̈ნისგა.

Добавлено (2007-06-25, 7:27 Pm)
---------------------------------------------
Text: 4
Line: 1
4. კუ̂იმტა̈რ ("კვიმატობა")

Line: 2 კანდა მერმა ლადეღ კუ̂იმტა̈რ ლი. ეჯ ლადეღ მა̈გ უშხუ̂ართე იზელალ, ლეთრეს ϩთრეხ ი შის
Line: 3 ხოფშუ̂დეხ მა̈გ უშხუ̂არ.

Line: 4 კუ̂იმტა̈რ ლადეღ და̈რ ხაშდბა, კადას და̈რ იკედ შითეჟი ი ყორქაჲ დემეგ ესხრიხ, ეჯღა, ერე
Line: 5 ალ ლადეღ კუ̂იმა̈ტია̈ნ ლი. ამ ლადეღ დეჲ ლიჭთე იმა̈რგ ი დეჲ ლისციქუ̂. კუ̂იმა̈ტ ლადეღ ლი ი
Line: 6 მა̈გ იმზϩრ. ექანღუ̂ე, მერმე ლადღა̈რჟი ხოჩა დოშდულს ითშიხ ი ესხრიხ ღუ̂აჟა̈რ ცხეკთე ზექიშ
Line: 7 ლა̈ქჩათე.

Добавлено (2007-06-25, 7:27 Pm)
---------------------------------------------
. უ̂არშიშ ლა̈ტხა ("საარაყე მასალის ასამჟავებელი")

Line: 2 კუ̂იმტა̈რს ხაჭიმ ჲორი ლადეღ, ეჯის ხაშხა უ̂არშიშ ლა̈ტხა. უ̂არა̈შ ლი ლეჲრა̈ყ მასალა ი ეჩა
Line: 3 ჟი ლიტხეს ხაშხა.

ტეხშობ ("ტეხიშობა")

Line: 2 ტეხშობ ხემთქუნხ ლინთუ̂ლისგა, ლიფანა̈ლი სგებინჩუ. ალ ღϩნ ლუღლაე ლა̈სუ̂ მა̈ჲთუ̂ა-
Line: 3 მა̈კუ̂შახენქა. ცხϩმრიშ ზურალ მა̈გ ლეზგარაშ ლაჴუ̂მითე ესღϩრდა ლა̈მზϩრთე. ლემზϩრა̈რს ი
Line: 4 ლეტუ̂როლს ა̈ჲნახ ეჯჟი ი ჟი ხა̈მზϩრიუ̂ხ მა̈კუ̂შოლხენქა ჯგϩრა̈გ ტეხიშისგა:"ჯგϩრა̈გ ტეხშიშ
Line: 5 მა̈ჲთუ̂ა-მა̈კუ̂შას გუ̂აქაბნეოღ".

ლიფანა̈ლი ("საკურთხის წადგმა მიცვალებულთათვის")
Line: 1
7. ადგომ ("ადგომა", ნათლისღების წინა დღე)

Line: 2 ადგომ ხეხოლი კანდაუნღუ̂ე მეუხუშდე ლადეღჟი. ამ ლადეღ ლϩშრაუ̂ა და̈რ იზბი ი ნებოზდ
Line: 3 ქა და̈რ იმარალ. მϩფანე მარე, ხოშა მარე, მϩტმე ლი ა'ლადეღ.

Line: 4 ადგომ ლადეღ, ჰამს, დოსდ ზურალა̈რ იბნეხ შედმაკუ̂ედიშ ქა ლიხეხა̈უ̂ის. უშყუ̂დად ხეკუ̂ეს
Line: 5 ნომაგუ̂ეშ ასეს ქორისგა. ტაბგა̈რს ი სკამა̈რს ჰა̈ზუ̂თექა ჴიდეხ ი ჰა̈ზუ̂ლისგა ქ'აშყუ̂დიხ. ნებოზს,
Line: 6 მϩჟემ ლიჰუ̂რალჟი, დიხსა̈ლ ლამარალს ხეგნი ი ანყე ლეგიმბა̈შ ლემზϩრა̈რს, კარტეპილიშ ი
Line: 7 ლებია̈შ ლϩღერღილა̈რს. ა̈სყიხ ქϩნა̈შს. აჯა̈ბხ კობეშიას, ითქს. სიმინდიშ ღერღილხენქა ლϩშქა̈რ
Line: 8 შა̈მს ა̈სყიხ, ბრინჯს აჯა̈ბხ ლϩცისგა (ლϩჯე დემეგ იმა̈რგ, ლϩშრაუ̂ე ლი). ალ ლადეღ სა̈უ̂იჭმ ნაყუნა̈რ
Line: 9 გარ იმა̈რგ.

Line: 10 ადგომჟიშდ ლϩნყე ლემზϩრა̈რს ხოშა მϩტმე ღუ̂აჟმარე კარუ̂ათეჲსგა ა̈დისგ. კანდა ლადღიშ
Line: 11 ნა̈ჭიშხ წერქუ̂აშ ლიბს ლემზϩრა̈რს ხა̈დისგ ჟიქაქა ი ქა ღϩრი ლაჴუ̂მითექა. ეჩეჩუ ლაჴუ̂მჲა̈შ
Line: 12 ყორჟი, ლასფლაუ̂ა̈რმყ (/ ლაშთხუ̂ჲა̈რმϩყ), ჟი ხლმზϩრი. წერქუ̂ას მოლა ქა ხა̈ბრე ი ლაჴუ̂მჲა̈შ
Line: 13 ყორს სგა ხა̈ჩხინე ი ხეჴϩრალ ქუნა̈რს, ერე "იშგედხოღ მიჩა ლიწსი ი მა̈ლდჲა̈ნუ სგ'ოღ ანსგუ̂ეჯდახ
Line: 14 ქორთე"!

Line: 15 ეჲ ლეთ ანღრიხ სგა ქუნა̈რ ქორთე.

Line: 16 ალ მϩტმე მარე სგა ჴედნი ქორთე ი ლემზϩრა̈რს სგა იტხე ი ეჩქას მახე ლუშყუ̂ედტაბა̈გს
Line: 17 კა̈ცხა̈შ ლეჟა ჩუ ϩგემხ ი ლასგუ̂რა ბანდა̈რს სგა ხა̈გემხ. ათხე ალ მარე ბრა̈ჴს სგა ϩგემ ქორთეჲსგა,
Line: 18 ეჩქას ტული: "მა̈ლდჲა̈ნუს ხოჩა ჭიშხ ესეროღ ოხჴიდახ"! -- ი ქორისგა ერუ̂ა ჩუ̂ა̈რიხ მა̈გ ჟ'იგნალხ
Line: 19 ი ტულიხ: "ქუნა̈რ ესერ ოლსგუ̂ეჯნელიხ".

Line: 20 ლუქუ̂ე ლი, ერე ეჯი ლეთ როქ ახღუ̂ახ ქუნა̈რს მეზგათე ლედგა̈რიდ ჟი ლϩკა̈ფიშ კუბ.

Line: 21 ამუნღუ̂ე ამარეხ ტაბა̈გს ი თამა̈შდ გარ რაგდიხ მა̈გ, კϩლთხი ჰერს და̈რ იკედ. ა' ტაბა̈გლეჟა
Line: 22 ადაწყეხ ლეზუ̂ბა̈რს. ლეტუ̂როლს ატუ̂რეხ ი დია̈რჟი ჟი ხოსუ̂ემხ. არა̈ყს ϩგემხ ი ქორა̈შ ხოშაჩუ
Line: 23 ხოფანე, რაგდი, ერე:

Line: 24 -- მა̈ლდჲა̈ნუს ხოჩა ჭიშხ ესეროღ ოხჴიდახ ი ხოჩა გარ ესეროღ ოთთიალახ, ჯუ̂ინელს ი მახა
Line: 25 ჩი ხოჩა ლაქუნ ესეროღ ხარხ! -- ი არა̈ყს ჟი ხოშუნდები კათხუ̂შ ჩი. ჯუ̂ინალϩნდირ მახად ჩუ ერუ̂ა
Line: 26 ლϩდგა̈რ ლი, ჩის ჟი არშუ̂ნი.

Line: 27 ჩუ ნაფანუნღუ̂ე მა̈გ ჩუ ისგუ̂რიხ. ხოშემიშ ლასგუ̂რად ჰასკამს ამარეხ ი ჩუ ϩგემხ
Line: 28 ბანდა̈რცახა̈ნ.

Line: 29 ხოხრა ბეფშუ̂ილდა̈რ ლახ ეთდაგრიუ̂ხ, ეჯა̈რს ნა̈ნკდ ხოფანახ. ხოხრა ლემზϩრა̈რს ანყახ ი
Line: 30 ლეტუ̂როლს ატუ̂რახ. მϩფანე ლა̈სუ̂ ეჯ ქორა̈შ ბეფშუ̂. ეჩქანღუ̂ე ჩუ̂ისგუ̂რიუ̂ხ ქორშა̈რ ი ჩუ
Line: 31 იდარელდახ.

Line: 32 ნადარალუნღუ̂ე ხოლგენიხ ქუნა̈რს ი იცინგლაუ̂ალხ. ცინგლა̈რე მემბუალ ლი ქორა̈შ ხოშა.
Line: 33 ესუ̂ა ხოჩა ლიცინგლაუ̂ალ ხეხლიუ̂, ეჩხაუ̂ მეზუ̂ბელა̈რი ანღრიუ̂ხ ი ჰოჰუ̂ნა̈რიუ̂ხ. ლა̈ცინგლაუ̂ალჟი
Line: 34 კანდაშ ნაჭϩშხ გუ̂იზს ლემესგთე ხოჩუ̂დიხ ი ტულიხ: "ნა̈რჰი ლაქუნოღ ხარხ ნიშგე ლϩდგარუს".

Line: 35 ეჩქანღუ̂ე ჩუ̂იყუ̂ნალხ. ალის ხაშხა ადგომ ი მთელ ნაგზას -- ლიფანა̈ლი.

Line: 2 ადგომ მერმა ლადეღ განცხნა̈ბ ლი. განცხნა̈ბ ლადეღ ლა̈ჲსას ა̈ჲსენიხ, ხოშა მϩნწირდ დაჴϩლს
Line: 3 ა̈ჲსენიხ. ლეღუ̂შუ̂ ი დია̈რშუ̂ ჩუიდ ხოფანეხ ადა̈ჲდ. სა̈ერთოდ, ლიფანა̈ლიჲსგა ტაბა̈გს ჟ'იკედხ
Line: 4 ბანდა̈რხენჟი ი ლϩმარე ხა̈რჯს ჩუ̂ა̈დისგხ. ნაფანუნღუ̂ე ჟიჲდ ხანჴუ̂ეხ ტაბა̈გს ბანდა̈რჟი.

Line: 5 ალ ლიფანა̈ლის სამტინ ეხჭემნი, ეჩქას ნებოზხენ, დოსდ, ჩუ ხოფანეხ ი ქუნა̈რ ლალხორალთე
Line: 6 ესხრიხ. ლალხორისგა ქუნა̈რ ესერ ჟ'ინზორალხ მა̈გ ი მა̈ ესერ ხეკფიხ ეჯ მეზგემიშდ, ეჯის ესერ
Line: 7 ეჯაბასუ̂დ ალხუ̂ერიხ, ხოჩამი ი ხოლამიი.

Line: 8 ჯუ̂ინალდ ლϩა̈რდ ოლმა̈ზნელიხ ქუნა̈რ ქორთე ლიფანელისგა. აშხუ̂ ზურალს გეზალ ხა̈რენა
Line: 9 ნადგარ ი ლიფანა̈ლისგა ალ გეზალ ომჴედელი; მიჩადი ქა ხა̈წდა ი სგა ხოფხჭა, დემ ლუმფიშუ̂დინ,
Line: 10 ეჩქას ალი ოდსისტკახ ქუნა̈რს ი ხოქუ̂ახ, ერე "ათხენღუ̂'ესერ მინს დემის ხეწდენიხ ლϩა̈რდ"!

Line: 11 ეჩქანღუ̂'ესერ და̈რმოშ ხა̈წდა ქუნა̈რს ი ამჟი ხოფანე მა̈გ.

Line: 12 მϩშლადეღ, ნებოზს, სგა ტეხნიხ ქუნა̈რ მეზგათე. მეზგა მუთურა ხარ ლეხუესგ, ალ მუთურას
Line: 13 ქ'ა̈დისგხ ფაკნა̈რთე: "ათხ'ესერ მა̈ჲდა̈რ ლიხ ქუნა̈რ", -- ი დოსდ ჩუ ხოფანეხ. ალ ტებდი მუთურა
Line: 14 ლი გაგ, მადეი შუბან, მადეჲ ცϩრცმა (გაგთეისგა ხა̈მიშ ჭყა̈ნს ხეჩოხ ი ეჯი ლი ცϩრცმა). გუ̂ია̈ნდ
Line: 15 ჩუჲდ ხოფანეხ.

Line: 16 ნა̈ სახუბს გუ̂ა̈ღუ̂ენა მუსუ̂ფელა̈ნიჟი უთალა დაბ. განცხნა̈ბ ესუ̂ა̈იშთე იროლ, ეჯი ლლსუ̂ ალ
Line: 17 დაბიშ ქა მϩჴნი; ეჩეჲსგა ილა̈შიუ̂ ნაქამლიზალ კუ̂ეცენ ი ეჯის იჴმა̈რიუ̂ხ განცხნა̈ბ ლეთ ლა̈მზϩრდ.

Добавлено (2007-06-25, 7:28 Pm)
---------------------------------------------
ლიცემ ლიპრისდალ ("წყლის კურთხევა")

Line: 2 ლიცემ ლიპრისდალ ხემთქუნხ განცხდა̈ბქა. ეჯ ლადეღ ჩუჲდ ხოფანახ. პაპ ლϩცისგა ადასგუ̂
Line: 3 ჯუ̂ა̈რს, ეჩქანღუ̂ე თუ̂ითჟი მა̈გ ჟ'იკადდა ალ ჯუ̂ა̈რს ლიცხენჟი, ქა ხეყხალდახ ი ალის ხეშხϩნ ლიცემ
Line: 4 ლიპრისდალ. ალ ლϩპრისდე ლიც ახღუ̂ანდა ჩი მეზგა ლაჴუ̂მიხენ ი ამნოშ იბურდიუ̂ხ ტϩტს,
Line: 5 ქ'ანყახ ტϩტიშ დირილდა̈რს, ჩუ̂აფრახ ი ზაუ̂ა̈შ ი ზაუ̂ა̈შ ნენსგა ჩუ ხოშხუ̂ნანხ. შომა ქორა̈შ
Line: 6 ლისუფთა̈უ̂ი ხეკუ̂ადხ, ეჩქას ალ ტϩტიშ დირილდს ქა ხა̈ფცხახ მოჲდილს, ლიცთეჲსგა ადასგხუ̂ ი
Line: 7 ჟი ხაბფხϩნახ ჩიგუ̂აშ. ამნოშ ასუფთა̈უ̂იუ̂ხ ქორს ი მინე თხუ̂იმს ჩის. ალ ტϩტ ლϩბერდუ̂ს გϩრდიდ
Line: 8 ხა̈ჭმინახ ლა̈ლდია̈რრე თხუმქა, ეჯი სგა ხეფრიუ̂ ი შომა ხეწხიუ̂ხ, ეჩქას ეჯის ხა̈ფცხახ, ლიცთეჲსგა
Line: 9 ა̈დისგდახ ი ქორს ეჯნოშ იპრისდიუ̂ხ.

. ჯოდი ჰამ ("გრძელი დილა")

Line: 2 განცხნა̈ბ მერმა ლადეღ, დეშდიშ ჰამს, ჯოდი ჰამ ხაშხა. მეზგე მა̈გ ურჰად იგნალ ი იბნეხ
Line: 3 ხა̈რჯიშ ლიმარეს. ტებდი ლეზობ ამარე მა̈გ. ეჩქანღუ̂ე ჩუ ხოფანეხ. ალ ლეზუ̂ბა̈რ ჩუ̂ისტϩნიხ, ეჩქას
Line: 4 მერმე ლϩმარე ტებდი ხა̈რჯსიდ ხოქმეხ. ამჟი მესმად ადა̈ჲდ ამარეხ ი ჟი ხოქმეხ ტაბა̈გჟი ი ჴულჟი.
Line: 5 ჴულმϩყ ეშხუ ფაკნილ ლϩჯე ლაშუნდებიდ ხეკუ̂ეს ლϩგენეს ი ბოფშა̈რს ეჯინოშ ხოშუნდებიხ.

Line: 6 ლაფანაჟი ღუ̂აჟა̈რ ფაყუ̂ს მა̈გ ქა იკედხ, ხეხუ̂ა̈რ ჩუ იქქუ̂იხ. ლეტუ̂როლ მუტუ̂ა̈რ გარ ხეკუ̂ეს
Line: 7 ლესეს, ჩუ უდიგად.

Line: 8 მესმა ნაფანუნღუ̂ე ყორა̈რს ჩუ̂აკრეხ. ქამე ი სგამე ყორა̈რჟი ლეტუ̂როლს ხალწიხ ეჩხაუ̂-ამხაუ̂.
Line: 9 ქორა̈შ ხოშა შიჲსგა ლეტუ̂რა იყდა̈ნი, ეჯჟი ხოშუნდები. მერმა შიუ̂შ ხედი არა̈ყს, მადეჲ ლϩჯეს
Line: 10 ხა̈ბდე ი ეჯჟი ქ'აბϩრდა̈გი ქუნა̈რს: "ხოჩა ჭიშხ ესეროღ ხოცუ̂ირახ, და̈რ ესერ ხოკϩლდინეხ ი და̈რ
Line: 11 ესერ ხარაგუ̂ნეხ", -- ი ხობϩრდა̈გი ამჟი ლაშუნდებიშუ̂ ყორა̈რქა. ქამე ყორმϩყ ჟი ხოჭუ̂ენი ი სგა
Line: 12 ტეხნი ქორთეისგა. ეჩქანღუ̂ე ჩუ̂ისგუ̂რიხ ი ჩუ იდარელხ.

Добавлено (2007-06-25, 7:29 Pm)
---------------------------------------------
ლიგუნაშელ ("გამურიანება")

Line: 2 ჯუ̂ედი ჰამა̈შ დეშდიშ ლი ლიგუნაშელ. შომა ქუნა̈რს ქ'აბϩრდა̈გიხ ი ჩუ იდარელხ, ეჩქანღუ̂ე
Line: 3 ჟ'ინზორალხ სიმაქა̈რ ი მა̈ხეღუ̂აჟა̈რ ი იბნეხ ლიგუნაშალს. უშხუ̂არ ჩ'აგუნა̈შიხ ერუ̂ა მოშ ოხჩიშე.
Line: 4 ალის იჩმუდხ ხოჩა როქ მოსაუ̂ა̈ლ (/ მაჴა̈დ) ოხჴედნიხ, ეჯღა. ლა̈დია̈ჲ იჩოხ ალის ახალგაზრდოლ.
ნა̈მტეხულ ("ნაბრუნები")

Line: 2 ჯუ̂ედი ჰამა̈შ მერმა ლადეღ, თახა̈შ, ლი ნა̈მტეხულ. ეჯ ლადეღ იტმახ უ̂ეთხუ̂მალე
Line: 3 ნა̈შდობახენქა. ქორა̈შ ეშხუ-ეშხუ ხოშა ჩუ იყუ̂ნალდა ი მუბურდ დეჲ იდარალდა ი დეჲ ლიცს
Line: 4 ϩთრა. ნებოზს ლემზϩრა̈რს ანყახ, ეჩქას ჟ'იგნალდა ალ ხოშა, ჟი ხა̈მზϩრიუ̂ხ უ̂ეთხუ̂მალე
Line: 5 ნა̈შდობახენქა ი ჩუ̂იდარალდახ.

ნა̈ლტეხურ ("ნაბრუნები")

Line: 2 ჯუ̂ედი ჰამა̈შ დეშდიშს ცა̈შ ეხჭემნი, ეჯის ნა̈ლტეხურს ხაყლეხ. ლალხორთე ნაზუ̂ ლϩდგარუ
Line: 3 შიშდ ეჯ ლეთ ტეხნიხ სგა ქორთე ი მϩკლია̈რ ცა̈ ლეთ გარ როქ ა̈ჰიესხ სგა ქორთე, ი ცა̈ ლადეღ ა'
Line: 4 მϩკლჲა̈რს ხოფანეხ. ალ ლადეღს ჩალგობი ხაშხა ი მϩკლჲა̈რს -- ჩალგა̈რ. ეჯ ლეთ, ჩიგარიშშალ,
Line: 5 მϩკლია̈რს გარ ხოფანეხ.

Добавлено (2007-06-25, 7:29 Pm)
---------------------------------------------
დულობ ("ხაჭაპურების ჭამა საიდუმლოდ და ქალების ლოცვა")

Line: 2 ლამპრობ ჩიქდ ჲორი ნაგზა სგებინ მϩშლადეღს დულობ ხაშხა. ალ ღϩნს იჩმუდხ ზურალლრ
Line: 3 გარ. ღუ̂აჟა̈რს დემეგ ხოშიდდახ ალ ღϩნთე ლიტყუბალ. ალ მϩშლადეღს, ნებოზთე, ზურალა̈რ
Line: 4 ღუ̂აჟა̈რს დემ ხაგუ̂ა̈უ̂იუ̂ხ ქორს ი მინ იბნახ ლემზϩრ ქუთრე ლინყეს. ლეცუ̂მა̈რსი იჩმუდხ.
Line: 5 ეჩქანღუ̂ე ჟი ხა̈მზϩრიუ̂ხ, ხეჴϩრალდახ უ̂ეთხუ̂მალე მϩწსე ღერმათ, ერე "მინე ქუ̂ინიმგენოლს
Line: 6 მა̈რცხ-მაუ̂ინ ნომაგუ̂ეშოღუ̂ ლახთილ".

Line: 7 ლამა̈რიას ხეხწობალხ: "ღერმეთ, აღუ̂ე სი ენფიშირ მეშგა̈რ"!

Line: 8 ალ ლემზϩრა̈რს ზურალა̈რ გარ იზბუდხ. ღუ̂აჟა̈რს დეჲ ხამნახ ი დეჲ ხაწონახ. ნამსუ̂ედა̈რს
Line: 9 მერმა ლადეღ, უშდილ, ჩუჲდ იზბუდხ. ალ უშდილ ლϩნა̈ყ დირა̈რს (/ ლემზϩრა̈რს) ხატულიუ̂ხ
Line: 10 დულს ი ღϩნსი ეჯღა ეთჟახან დულობ.
ლა̈ლჩა ("ხსნილის დასაწყისი")

Line: 2 ლამპრობა̈შ მუჟეღუ̂ მϩშლადეღს ხაშხა ლა̈ლჩა. ლა̈ლჩა მა̈ზნოშ ლი ი მახაურ დემის იმა̈რგ
Line: 3 (მახე დოშდულ ხეკუ̂ეს ლესეს). ალ ლადღიშდ ჩი მეზგა ჯით ხორი ლა̈ჲსად ი მამილ ადა̈ჲდ. ლა̈ლჩა
Line: 4 ლადეღ ალ ჯითს ჩუ̂ა̈ჲსენიხ ი მიჩა სგაშირს ზისხოროლდ ა̈სყიხ. ლϩჲსენე ჯითს ჟი ხორკინეხ ი ეჯ
Line: 5 მϩჲშ, ლილჩალისგა, ხა̈მემ ლეღუ̂ს და̈რ იზბი: ქუხუ̂ა̈რ ესერ ხოხალ.

Line: 6 მამილს ჩუ̂ა̈ჲსენიხ ი ყუ̂იჟა ჟი ხა̈მზϩრიხ. ეჯ ლადღიშდ ესუ̂ა მამილ დემეგ ხერდი ლეჲსენი,
Line: 7 ეჯინემ მამლიშ მϩქაფდ სემი ლϩგრე ი ლემზϩრ ხეკუ̂ეს ლახმეზრას.

Line: 8 ლა̈ლჩა ლადეღ ლიჩედურალა̈შ ლამპრა̈რს ჩუ̂აჟჟϩნე მა̈გ. ალ ლამპრა̈რ ჟა̈ჴუ̂რაშ ლიხ. ჲორი
Line: 9 ნაგზა სგებინჩუ ლიხ ლეფრე. ეშხუ ხოშა ლამპა̈რს ხოშა ღერთემ ლეტუ̂რად ა̈სყიხ, ეჩϩნქა, უ̂ოშა
Line: 10 (/ ოშა) ფაყუ̂ემ მϩგემ ირდი ქორისგა, ეჯა̈რე შელდს. მა̈ ქორისგა ღანაუ̂ ზურალ ირდი, ეჩა ჭა̈შ მიჩა
Line: 11 ლამპა̈რცახა̈ნ ხოხრა ლამპა̈რს იტყუბა სგა, ნაღუ̂ჟურ როქ ეხწესი, ეჯღა.

Line: 12 ლამპრა̈რს ლϩკერაქა ა̈დისგხ ლეფრად.

Line: 13 ალ ლადღა̈რისგა დეი მინ ხაშდბახ ი დეი ქუ̂ინიმგენოლს ხაშდაბნეხ, უ̂ეთხუ̂მალე კუ̂ა̈დ როქ
Line: 14 ხოხალ.

კერუ̂ებიშხენქა ლϩბნე ლიჴუ̂დიში ჩიქდ ხაშხა აღბერა̈რ. აღბერა̈რისგა ლი ლილაობი.
Line: 1
16. კერუ̂ებიშ ("ტახების პარასკევი")

Line: 2 ლა̈ლჩას უ̂ებიშ ხაჭიმ, ეჯ უ̂ებიშ ლი კერუ̂ებიშ. ეჯ ლადეღ მა̈გ კერა̈რს ა̈ჲსენი. ლϩჲსენე კერა̈რს
Line: 3 მუჭდურას ჟი ხოკედხ ი ალის მერსანა̈ბ ლადეღ ჟი ხა̈მზϩრიხ. კერიშ მა̈ჭიკს ნა̈ნკდ ა̈სყიხ, ამთეჲსგა
Line: 4 ა̈დისგხ ლϩკპϩნე ნეცინ ჭინჭლა̈რს ი ალის იშხუ̂ნიხ ლიღმესა̈რჲა̈შდ.

Line: 5 კერუ̂ებიშ ლადეღ დეჲ ლეღუ̂ს ი დეჲ სგაშირს დემის იზბიხ. ჯუ̂ინალდ კერუ̂ებშიშ ( ე. ი.
Line: 6 მერსა̈ნბიშ) კერიშ ლეღუ̂ს ქორა̈შ მერდე მარანქა მერმა და̈ს ხამნახ, დემეგ ხოშა̈დხ; დეი სგაშირიშ
Line: 7 ლიწედ ი დეი ლიმნე დემეგ ხოშა̈დხ იშგნემიშდ, უყლა ლϩმა̈რ. ალის ხეშხϩნ უწონაშობ. ხაჯრაუ̂ანხ,
Line: 8 ერე სგაშირს ესუ̂ალა იშგენს ხამნინახ, ეჩქას ქუ̂ინიმგენოლ ჟი ხოხუ̂ტენიუ̂ხ.

მერსანა̈ბ ("მეისარობა")

Line: 2 კერუ̂ებშიშ მერმა ლადეღ, სამტინს, ლი მერსანა̈ბ. მერსანა̈ბ ლადეღ დოსდ იგნალ მეზგე მა̈გ.
Line: 3 ქ'ანყეხ ლემზϩრა̈რს. სგაშირს, ზისხოროლს ი ყუ̂იჟე-პერშუ̂დას ხოჩამდ ჟ'აჯა̈ბხ. ჟი ნაჯაბუნღუ̂ე
Line: 4 ფიჩქთეჟი იკედხ ი ჟიქაქა სემი ლემზϩრს ი არა̈ყს ხა̈დისხ. ეჩქანღუ̂ე ჟ'ატუ̂რეხ ხოხრა ლამპა̈რს ი
Line: 5 ყორმϩყ მუსისგა ჟი ხოყერხ. ფიჩქს ქ'ა̈ჲსგხ კუ̂ეშკთექა ი ფიჩქშუ̂ ა' ქორა̈შ ხოშა კუ̂ეშკისგა ჟი
Line: 6 ხა̈მზϩრი ჯგϩრა̈გ უღუ̂ლა̈შს. ჟი ნა̈მზϩრϩნღუ̂ე სგა იტხე ფიჩქს ქორთე ი ჩუ იდარალხ მა̈გ.

Line: 7 ეჯ ლადღიშდ ლეჲსენი ხა̈მს ხაშხა უღუ̂ლა̈შიშ ხა̈მ. უ̂ეთხუ̂მალე ნაშხა ლი ალ ლიმზϩრ.
Line: 8 მერსანა̈ბ ლადეღ ჟი იმა̈რგდა ხა̈მემ ლეღუ̂იშ ლიზუ̂ებ.

Добавлено (2007-06-25, 7:31 Pm)
---------------------------------------------
ლიჩედურალ ("გაქცევა")

Line: 2 მერსანა̈ბ მერმა ლადეღ, მϩშლადეღ, ლი ლიჩედურალ (ალ ღϩნ მა̈ზნოშ ლი, მა̈ სუ̂იმნობდ
Line: 3 ხონკი ხეხოლი, მა̈ სუ̂იმნობუნღუ̂ე). ლიჩედურალ ლადეღ ღუ̂აჟა̈რ დოსდ იგნალხ. მა̈ნკუ ხოშა
Line: 4 ღერთემ ლამპა̈რს ატუ̂რეხ ი ჟი ხოყერხ მუსისგა ყორჟი. ეჩქანღუ̂ე ღუ̂აჟმარე მა̈გ, ხოშა ი ხოხრა,
Line: 5 ატუ̂რეხ ლამპრა̈რს. თხუმ ხოჟეღუ̂ ქორა̈შ ხოშა, ეჩქანღუ̂ე ალის ხაჭიმ, ხოშილ ერუ̂ა ირიუ̂, ეჯი, --
Line: 6 ი ამჟი ხოხროლუ მა̈გ, -- ი ლϩჭარად ესხრიხ მუტუ̂ა̈რ ლამპრა̈რშუ̂ ტეხიშთე. ეჩეჩუ აშხუ̂მ ა̈დგის
Line: 7 ჩუ̂ა̈დისგხ მუტუ̂ა̈რ ლამპრა̈რს მთელ სოფლიშ ღუ̂აჟა̈რ. ჩუ ლადასგუ̂ჟი უშხუ̂არ ხაყლეხ: "ჯგϩრა̈გ
Line: 8 ლიჩედურალა̈შ, მϩნϩმპა̈რი მარე ჩუ̂ენფიშირ ნიშგე ქორისგა ი ნიშგე სოფელისგა"!

Line: 9 ლამპრობთე ჩი მეზგე ღუ̂აჟმარემ შელდ ლემზϩრა̈რს ჴიდე ი ახღუ̂ახ ადა̈ჲდ ზედა̈შ. ჟი
Line: 10 ხა̈მზϩრიხ ეჩეჩუ ლემზϩრა̈რს, ჩუ̂ისგუ̂რიხ ლემასგუ̂ კϩრკა̈ნდ ი ლითრე-ლიზუ̂ებს იბნეხ. ეჩქანღუ̂ე
Line: 11 ლამურგუ̂ა̈ლის ი ლაღრალს ხეგნიხ. ლიღრალ ესუ̂ა ხეხლი, ეჯი მახე ნადგარ ლახა ჲა̈რ ხერი, ეჯღა̈ჲ
Line: 12 ქა მეღრალ ლი, მა̈ნკუ ეჯინემ ხეკუ̂ეს ენბინას ლიღრალ.

Line: 13 უ̂ოდოდ ლამპრა̈რ ხეტუ̂რი, ეჩქად ლი ლიზუ̂ებ-ლითრე. ჩუ ნაყუ̂რულალუნღუ̂ე ერუ̂ა სი
Line: 14 ჯელხნი, ეჯის ეთჴერნის ქორთე ი ქორს ეთქეჲფისდ. მა̈გ მიჩა-მიჩა ლემზϩრა̈რს იტხე ღოშდ.

სუ̂იმნობ ("სვიმონობის დღესასწაული")

Line: 2 სუ̂იმნობ ხეხოლი ჲორი თებურუ̂ა̈ლს. ეჯ ლადეღ, ნებუ̂ზა̈შ პილთე, მეზგოლს ტეხიშთექა
Line: 3 ესღუ̂ახ ლამპრა̈რ ი ჟი ხოყერხ ეჩეჩუ აშხუ̂მ ა̈დგის. ზურალა̈რ ლემზϩრა̈რს ი არა̈ყს ჴიდეხ, ალა̈რს
Line: 4 ღუ̂აჟა̈რ ჟი ხომზϩრიხ ი ეჩქანღუ̂ე ჩუ იდარალხ.

Line: 5 სოფელისგა ლახე მახე ნადგარ ირი ერუ̂ალე ი ზა̈ დეშ ხერი, ეჩა ჭირისუფა̈ლ ალ ლϩდგა̈რიშ
Line: 6 ლამპა̈რს ქ'ა̈ჲნე ი ჟი ხოყერ საფლა̈უ̂ჟი, მერმე ლამპა̈რს იმგუ̂ა მა̈გ ა̈დისგ, ეჩეჩუ ხოყერ. ლϩდგა̈რიშ
Line: 7 პატრონს ტეხიშთექა ტაბა̈გ ხარ ლეჴდე, ჟი მა̈ ისხა̈თი მა̈გ ხეკუ̂ეს ხუღუ̂ანდეს, ამეჩუ ჩუ ხოფანეხ,
Line: 8 ლϩდგა̈რს ჟი ხოშუნდებიხ ი ნაფანუნღუ̂ე მა̈გ სგა ხეგნიხ ტაბა̈გს ი ნაფანუნს ჩუ იზბიხ.

Line: 9 ნაფანუნიშ ქორთე ლიტხე დემეგ იმა̈რგ. ქა მა̈ ოხსედნიხ, ეჯის ქა ხოუ̂ზეხ მეზუ̂ბელა̈რს ი ამჟი
Line: 10 ჩუ იყრულალხ ი ქორა̈რთე ესხრიხ.

ბოფშრე ლამპრობ / ლიჩაჩხალ ("ბავშვების ლამპრობა" / "ცემა, დარტყმა")

Line: 2 ლიჩაჩხალ ლი სუ̂იმნობ მერმა ლადეღ. ეჯ ლადეღ ერუ̂ალე მეზუ̂ბელიშ ბეფშუ̂ მეზუ̂ბელს სგა
Line: 3 ხეჴუ̂სგენი ი მϩბიდ ლამპა̈რს სგა ხოკუ̂ანე ყორისგა. ქორა̈შ ხოშა ლა̈რმითე ქა ხეღუ̂ჭენი. ჟი ლახ
Line: 4 ენϩრმინე, ეჩქას სგა ინჴრინე ქორთე ი პა̈ტიუ̂ს ხეჩო. დეშ ენϩრმინე, ეჯღა̈ჲ ეჩქანღუ̂ე ეჯი მიჩოუ̂შ
Line: 5 სგა ტეხნი ი ამნა̈რდ ქუთა̈რ ხარხ ლენყე.

Добавлено (2007-06-25, 7:32 Pm)
---------------------------------------------
დეცე ლამპრობ ("ცის ლამპრობა")

Line: 2 სუ̂იმნობϩნღუ̂ე, მესმე ლადეღს, მეზგე მა̈გ ყორთექა ჴიდე დეცე ლამპა̈რს ი მუსჟი ჟი ხოყერ.
Line: 3 ეჩქანღუ̂ე ლეთშუ̂ ლა̈სუ̂ გელოშ ლაგა̈ფ. მეზგე მა̈გ ნანგუ̂ლიქა შიდა ჯიჯუ̂ა̈რს ი ჯუღუ̂ა̈რს
Line: 4 უ̂ეთხუ̂მალე ლიშდობნეღა ი ტულიუ̂ხ: "ელოდ, გელოდ, მისა̈ს ალი ჯადდეს ი ზაუ̂დ ბარჯს ეჯკუ̂ანე".
Line: 5 ალის იჩმუდხ, თხეროლდ როქ ნომაგუ̂ეშ ხა̈ყრიხ უ̂ეთხუ̂მალს, ეჯღა.
ხუ̂ა̈მლობ ("ხვამლობა")

Line: 2 ხუ̂ა̈მლობ ხეხოლი ლინთუ̂ლისგა, თებურუ̂ა̈ლისგა, ლამპრობუნღუ̂ე ცა̈შ ენჴდენი ეჩქას. ალ
Line: 3 ლიმზϩრს იჩმუდხ ზურალა̈რ გარ ი ჟი ლუღლაე ლა̈სუ̂ ჴუ̂ა̈შხენქა, სა̈ერთოდ ნა̈მცხანხენქა.
Line: 4 ზურალა̈რ ჩუ̂ათხამურახ ლϩკერა̈ს, ჭუ̂ედა̈რს ი ალ ნა̈ჯეუ̂ლალა̈რს ი კა̈კერა̈შ ნათხამურ ჭუ̂ა̈რტს
Line: 5 ქ'ა̈ჲნახ ლა̈მზϩრ ა̈დგილთე, ეჩეჩუ ზურალ მა̈გ ნა̈ნკ-ნა̈ნკდ ადასგუ̂ ი მიჩა-მიჩას ხა̈ბდინა მა̈გ ჟი. მინ
Line: 6 ლემზϩრა̈რს ლაჴუ̂მითეჲსგა ა̈ჲასხუ̂ ი ჟი ხა̈მზϩრიუ̂ხ: "მინე როქ ჴუ̂ა̈შ, მეკუ̂არელ ი მუჭუ̂დიშ მა̈ზიგ
Line: 7 ქაოღ ათქაბნე ი იმჟი როქ ალ ხოლერება ოლშიხელი, ამჟი როქოღ ოლშიხელი მინე მა̈ზიგი"!

. ლიღმესა̈რი ("ლოცვა სიმინდის ფქვილში არეული ღორის ბადექონიანი პურებით")

Line: 2 ლამპრობუნღუ̂ე სამტინ ენჴდენი, ეჯის ხაშხა ლიღმესა̈რი. ლიღმესა̈რი ლეთ ლენყე ლი სემი
Line: 3 ლესკა̈რ: კუბა̈დ, ქუთ ი ღემესა̈რ, ადა̈ჲდ ხოხრა ლϩთა̈შ ლემზϩრა̈რს ანყეხ ჩხარა ცა̈ლს. ჟ'აჯა̈ბხ
Line: 4 ხამემ ზურგელს, მადეჲ ხამემ თხუ̂იმს.

Line: 5 ჩუ ნაბურუნღუ̂ე მϩნნის ესღუ̂ა ალ ლემზϩრა̈რ დარბა̈ზთე კარუ̂აშუ̂, ბოთლიკუ̂შ არა̈ყ,
Line: 6 ლეტუ̂როლ ი დარბა̈ზჟი ჟი ხა̈მზϩრი ქორა̈შ ხოშა უ̂ეთხუ̂მალე ნაშხახენქა. ეჩქანღუ̂ე ჰულდუმჩუ
Line: 7 ჭემს შიდე, იმგუ̂ა უ̂ეთხუ̂მალ ხა̈ბხ, ეშთეჩუ. ჩუქაქა ბოფშა̈რ ხოღლიხ ი მϩნნი ეშთეჩუ ლემზϩრა̈რს
Line: 8 ჩუ შიდე. ბოფშა̈რ ჩუქაქა ლიღეშგალს იბნეხ, ერუ̂ა ხოფშირამ ედღენეხ. ეჩქანღუ̂ე მა̈გ აშხუდ ჩუ
Line: 9 ისგუ̂რიხ ი ჩუ იდარალხ.

Line: 3 ლილაობ ლი მუშუ̂ა̈ნ ზურალრე ღϩნ (/ ლადეღ). ალ ღϩნ ხეხოლი თებერუ̂ალისგა, მადეჲ
Line: 4 მარტლისგა (პირუ̂ელ რიცხუ̂ა̈რჟი). ლიშელდე იბნი კანდახენქა ი ხეხოლი თახა ლადეღ.

Line: 5 ალ ლადღიშდ მეზგე მა̈გ ხოჩამდ იმარალ, ხოშა ლაღალდ -- ზურალა̈რ. მა̈დო ჯუ̂ედიათე ირიუ̂
Line: 6 ზურალ ლუწუ̂ილე ი მა̈დო ხოლა შუკუ̂ა̈რ ირიუ̂, მიჩეშდ ჩიღად ხეკუ̂ეს ოთჴიდენს ალ ლადეღ
Line: 7 ქორა̈შ მერდე ერუ̂ალე მარა, მუ ირიუ̂ ალი ა, ჯიმილ ა, ბუბა ჲა, მადეჲ იშგენ ნა̈თი. ერუ̂ა ადრϩნა
Line: 8 ეჯის ხეკუ̂ეს ოდიენს ლϩჴმა̈შ ჭϩმნიშ არა̈ყ ი ალ არა̈ყს ხატულიუ̂ხ ლილა̈ჲს. ალ არა̈ყშუ̂ ხეკუ̂ეს
Line: 9 ჩ'ოთმეზრენს ლილა̈ჲშ მϩჲნეს მინე ქორხენქა ლუწუ̂ილე ზურალ.

Line: 10 ლილა̈ჲს დემეგ ოთჴიდახ ჰასუ̂იშს, ეჯი შგუ̂ირ ლა̈სუ̂ ი შომალეს ეჯღა̈ჲ ქა ხეჯღა̈უ̂და (/ ქა
Line: 11 ხესყუ̂ადურდა) ერუ̂ალე.

ლიჴუ̂დიში ("ლოცვა მამაკაცებისა და საქონლის სიძლიერის შესახებ")

Line: 2 ლიჴუ̂დიში ხეხოლი ლიღმესა̈რინღუ̂ე. ალ ღϩნი მა̈ზნოშ ლი. ლიჴუ̂დიში ლადეღ სკარ ხემთქუნ
Line: 3 მთელ სოფელს ი ალის ხატულიუ̂ხ სოფელ ლასკა̈რს. ალ ღϩნ ლაჴუ̂ა̈მიშუ̂ ლა̈სუ̂, აშხუ̂ ზაუ̂ ჲორი
Line: 4 მეზგე იჩმუდ, მერმა ზაუ̂ -- ჲორი მერმე მეზგე ი ამჟი ხეჭამ კϩრკა̈ნდ სოფელს ლასკა̈რ. ჟ'ინჭურიუ̂
Line: 5 სოფელ ი ესუ̂ა̈ჲშმϩყ ლიჴუ̂დიში ლა̈სუ̂, ეშთეჲსგა ახღუ̂ანდა მთელ ლასკა̈რ სოფელს ლემზϩრა̈რ ი
Line: 6 ლეთრე ი ჟი ხა̈მზϩრიუ̂ხ სოფლიშ ნა̈შდუ̂ებახენქა. ალ ლიმზϩრ ლუღლაე ლა̈სუ̂ ჴამშახენ.
Line: 7 იმზϩრდახ, ერე "მინე როქ ღუ̂აჟმარა ი ქუ̂ინიმგენა ხოჩა სეუ̂ როქოღ ლახოდენა".

Line: 8 ჟი ნა̈მზϩრϩნღუ̂ე ჩუ̂ისგუ̂რიუ̂ხ ი ლიქეიფს იბნახ ი ამჟი ხოჩა დრეუ̂ს ატარახ. ალ ღϩნს ლა̈დიი
Line: 9 იჩოხ შუ̂ა̈ნისგა.
. საყნობ ("საყაენობა")

Line: 2 საყნობ ხეხოლიუ̂ ლიჴუ̂დიში მერმა ლადეღ, დეშდიშს. ლიჴუ̂დიში იბნიუ̂ მϩშლადეღ ი
Line: 3 იზგϩრიუ̂ ცა̈შ ჰამს. ალი ლა̈სუ̂ ხოშა ღϩნ.

Line: 4 საყნობ ლადეღ, ისგლადეღუნღუ̂ე, ნებოზთე, ითშიუ̂ხ ხოშა მაროლს (/ მეჩჲა̈რს), ალა̈რ ქა
Line: 5 ღϩრდახ ყორქა ი მოჲდ ხა̈ნუნღუ̂ე სგა ტეხნიუ̂ხ ქორთე მუსშუ̂ ჩუ ლუფენთუ̂: "თანღის ნა̈ჴედ როქ
Line: 6 ლიხ". ამეჩუ ხოჩა ლემესგს ხა̈ხუასხ ლა̈ტბიდალდ ი ხოჩა ტაბა̈გს. თუ̂ით კათხ ლϩჴმა̈შ არა̈ყს
Line: 7 ხოგამდახ. ალა̈რ, ლϩთიშ ხოშა მაროლ, ჟ'იმზϩრიუ̂ხ: "საყა̈ნს დიდა̈ბ როქოღ ათჴედა"! -- ი საყა̈ნიშ
Line: 8 მა̈ლდϩნქა იშგენ ღერმეთ ქა ლეხქა̈დიუ̂ხ, ეჩქას ჩანჩალას ხათრახ. ეჯ ლეთ ხოჩა ლარდას ისყიუ̂ხ.

Line: 9 საყა̈ნ -- ალი ლა̈სუ̂ მϩთა̈ნღი მარემ ღერმეთ. ლინთუ̂ლისგა თანღჲა̈რქა ლა̈ზელალჟი ხუ̂ა̈ჲ
Line: 10 მარე იდუ̂ა̈შიუ̂ ი მϩთა̈ნღი მარემ ლა̈ნთხლაღა იჩმუდხ ალ ღϩნს.

Добавлено (2007-06-25, 7:33 Pm)
---------------------------------------------
ლაღუ̂ემ აღაბ ("ხორცის აღება")

Line: 2 მϩშლადეღ იბნიუ̂ ლაღუ̂ემ აღაბ ი ეშხუ ნაგზი ლეღუ̂ ჩუ ხოშიდდახ ქუ̂ინს ი ღერმათს.
Line: 3 ლაღუ̂ემ აღაბ ლეთ მა̈ნკუ მა̈გ ლეღუ̂ს ხა̈გემ ი ეჯინოშუ̂ ჩუ იდარალხ. ჯიჯუ̂ა̈რს ქა ხა̈თშიხ ი გელოშ
Line: 4 ლაგა̈ფდ ა̈დისგხ. ეშხუ მარე ქა შიდე ყორქა ჯიჯუ̂ა̈რს ი ჯუღუ̂ა̈რს ი ტული: "ელოდ, გელოდ, მისა̈ს
Line: 5 ალი ჯადდეს ი ზაუ̂დ ბარჯს ეჯკუ̂ანე". ეჩქანღუ̂ე ფეტუ̂რაშ ი ჭყა̈ნიშ ცϩრცმას იჩოხ ი ეჯის იზბიხ
Line: 6 თუ̂ით ფაკნის.

თაშემ აღაბ ("ყველის აღება, ყველიერი")

Line: 2 ლაღუ̂ემ აღაბუნღუ̂ე იბნიუ̂ თაშემ აღაბ ი ალი ლა̈სუ̂ აშხუ̂ ნაგზა. ალ ნაგზას ყუ̂ილიერს
Line: 3 ხატულიუ̂ხ. ალ ნაგზაისგა ქუ̂ინ ი ღერმათ თაშემ ოხთრისϩნქა მამაგუ̂ეშ ხოშიდდახ.

Line: 4 ყუ̂ილიერჟი ბეჩუ̂ილა̈რს ხა̈მთქუ̂ენახ ხოშა სკარ. ლა̈მზϩრა̈ლიჟი ლუმტულინხ: "ჭა̈ჭილრე
Line: 5 მა̈ლდშოღ ლϩმზϩრე ხი". ამϩნქა იშგენ ღერმეთ ქა ლეხქა̈დიუ̂ხ, ეჩქას ჩანჩალს ხათრახ, ესუ̂ა
Line: 6 ლეხქა̈დიუ̂, ეჯის.

Line: 7 ყუ̂ილიერისგა ლუბადეს იზბიხ, მებულ როქ დემეგ ეხხოლიხ, ეჯღა. ეჩქანღუ̂ე ლახ ეჯღა̈ჲ
Line: 8 ჟ'ეჯხოლი მებულ, ეჩქას ქორთე ნაზუ̂ჟი ნაჭას ხეკუ̂ეს ლეხბურგენე ი რექინე: "ისგუ ფერიშ მიწუ̂ა ი
Line: 9 ისგუ ფერიშ მიდგარა".
თუ̂ეთნე ფხუ ("თეთრი ფხუ")

Line: 2 ყუ̂ილიერიშ დეშდიშს შუ̂ანა̈რ თუ̂ეთნე ფხუს ხატულიუ̂ხ. ამ ლადეღ იბნიუ̂ხ ფხუუ̂ა̈რ
Line: 3 შუ̂ა̈ნისგა. ალ ღϩნი ხერასშუ̂ ხემთქუნხ, აშხუ̂ ზაუ̂ აშხუ̂ მეზგათე ლა̈სუ̂ ი მერმა ზაუ̂ -- მერმა
Line: 4 მეზგათე. ფხუუ̂ა̈რ ლილჩალისგა ხეხოლიუ̂ ი უ̂იჭმ ლა̈სუ̂.
მეშხე ფხუ ("შავი ფხუ")

Line: 2 თეთნე ფხუს ხაჭიმ მეშხე ფხუ. მეშხე ფხუჲ ლილჩალისგა ლა̈სუ̂. ალ დრეუ̂ქა ლϩშრაუ̂ე
Line: 3 მანგუ̂ეშ იმა̈რგდა ი ამღა ხეშხϩნ მეშხე ფხუ. მიჟ ალ დრეუ̂ისგა ხოშილს ა̈მშხე ზურალა̈რს ი ამღა
Line: 4 ეჯ ლადეღ ზურალა̈რს ი სიმაქა̈რს წϩრნი ქიპს ხაბამხ მეჴრაქა ი ყიაქა, ჩუ როქ დემის ეთმეშხიხ,
Line: 5 ეჯღა. ალ ქიპს თანაფს გარ იფშგახ ქა.

Добавлено (2007-06-25, 7:34 Pm)
---------------------------------------------
ლილჩალ ("დიდმარხვა")

Line: 2 იშგუ̂იდ ნაგზი ქა ლϩფხჭϩნე თანაფდ ლილჩალ ლი. ალ ლილჩალა̈შ ხϩნსგას ხაშხა
Line: 3 ისგლილჩალ. ალ ღϩნ საკუ̂ახ ლი ი კუ̂ახϩნქა იშგნემ დემემ ლიზუ̂ებ ხოშიდ ამსუ̂ალდს. ათხელდ
Line: 4 ალის ხოშა ი ხოხრა მა̈გ იგჭა შუ̂ა̈ნისგა, მარე ლა̈დი ეჩეგ-ამეგ გარ იგჭეხ.

. ლითოდური ("თევდორობა")

Line: 2 ა

Line: 3 ლითოდური ხეხოლი მარტლისგა, ერუ̂ეშდიარა რიცხუ̂ჟი. ლითოდური ხაშხა ლილჩალა̈შ
Line: 4 პირუ̂ელ ნაგზას. ლითოდურია̈შდ აჟჟϩნეხ ჟა̈ჴუ̂რაშ ლამპრა̈რს ლაფსყალდ სოფელისგა მერდე
Line: 5 მა̈ხეღუ̂აჟრე შელდს. ლითოდური ლეთ, მუბირჟი, ეშდ სა̈ა̈თჟი ჩუ̂ა̈ლმესგიხ ლაჴუ̂მჲა̈შ გა̈ნხენჩუ ი
Line: 6 ჟი ატუ̂რეხ ლამპრა̈რს. ალ ლამპრა̈რშუ̂ მა̈ხეღუ̂აჟა̈რ იბნეხ ლაჴუ̂მი კϩრკა̈ნდ, ლერსგუ̂ანთე ხაჭიმხ,
Line: 7 ეჯჯი (/ ეჯჟი) ლიქინეს. ჩხარამϩნ ხეჭმენიხ ლა̈ქინოშ კϩრკა̈ნდ ლაჴუ̂მის ი ჩუ იგნიხ ეჯჯი ჩხარამϩნ
Line: 8 ტულიხ გასს (/ კუ̂ირიას), ალის ხეშხϩნ ლიკურუ̂ელი. ლიმზϩრს ილიასუ̂ხ ალ სიტყუ̂აშუ̂ --
Line: 9 უ̂ოჰაჲბოს.

Line: 10 ეჩქანღუ̂ე აშხუ̂ მეზგათეჲსგა სგა ინჭურიუ̂ხ ლითოდურითე მეჩდე მემზϩრ ხა̈ლხ მა̈გ. ამეჩუ
Line: 11 კუ̂ახა̈შ ტაბა̈გს ხოგამდახ ხა̈ლხს ი ზედა̈შდ ლა̈მზϩრთე ლϩჲნე არა̈ყს ქ'ათუ̂ნა̈ლიუ̂ხ. ეჩქანღუ̂ე ჩუ
Line: 12 ფხეჟნიუ̂ხ ი ესტიხიუ̂ხ ქორა̈რთე. ლახა მახე ნადგარ და̈რ ირიუ̂ სოფელისგა, ეჩქას იხირულდახ ი
Line: 13 ხოჩა დრეუ̂ს ატარახ.

Line: 14 ალ ღϩნს ლა̈დიჲ იჩოხ სოფელ ლაფსყალდს ი მთელ ცხϩმა̈რ ესხრი ლა̈მზϩრთე თა̈რგლეზერიშ
Line: 15 ლაჴუ̂მითე.

Line: 16
ბ

Line: 17 ლიჩედურალა̈შ მუთხუ̂მი რახან ნა̈ ხუ̂ა̈სდუ̂ (ე. ი. ლაფსყალდა̈რ), თათრა̈რე ლიმარცხეშ გეგმა
Line: 18 ლაფსყალდა̈რდ ოხსყედ, ეჩქას ამიშ გამარჯუ̂ებიშ ლანშანა̈რდ, ლეთშუ̂, საჴეუ̂ ღϩნდ ლითოდური
Line: 19 ანსყეხ. ბა̈ლϩნჩუშ სოფლა̈რ, ლატლჲა̈შ ჩათუ̂ლით, მა̈გ ამხაუ̂ ოლმა̈ზინ. ალი, ლითოდურჲა̈შ ღϩნ ი
Line: 20 ლილϩმპა̈რი ლაფსყალდა̈რდ ახკაფϩნ ბა̈ლს ჩუბე ხა̈ლხს. ლამპა̈რ ნა̈მთქუ̂ა, მა̈ მა̈ხეღუ̂აჟ მიჩა ჴა̈ლს
Line: 21 ქ'ეფხჟე ი ეშხუ ჭითხ ეჩა ნაჯუ̂დი ხეკუ̂ეს ხუღუ̂ანდეს ლამპა̈რს. ლამპა̈რ ხეკუ̂ეს ხუღუ̂ანდეს,
Line: 22 ეშდარა ლϩზა̈ ჟიბოუ̂ ერუ̂ა ლი, ეჯის, ეჩანდ ხოხრა ქა დეშ ხა̈წრე.

Line: 23 ლითოდური ხეხოლი ჩი თაშუ̂ემ აღბა̈შ მეჭემ საფტინს. ლითოდურჲა̈შ ლიმზϩრს ხუ̂იბნედ
Line: 24 თაშუ̂ემ აღებ მერმა ლადეღ, დეშდი ლეთ (ლილჩალისგა). ალი ლიმზϩრ ნა̈მთქუ̂ა კუ̂ირჲოშ
Line: 25 (ლიკურუ̂ელის ხუ̂აყლედ). დეშდი ლეთუნღუ̂ე საფტინდ, ჩი ლეთ ხუ̂იკუ̂ირუ̂ელიდ. იმჟი ღერმათ
Line: 26 ხუ̂ემზირდ, ამჟი ეჯი ზაუ̂ა̈შ ლϩდგა̈რ ერუ̂ა ირი, ეჩა ლაშუნდობა̈რსი ტულიდ კუ̂ირჲოშ. ცა̈ ლეთ
Line: 27 ნაფანუნს ხუ̂ა̈ჲნედი ჯუ̂ინელ ი მახე ლϩდგა̈რს ჩის ქა ხოშუნდებიდ. ლϩშრაუ̂ე დეჲ ლემზირ იმა̈რგ ი
Line: 28 დეჲ ნაფანუნ.

Line: 29 ლილϩმპა̈რის ხუ̂იჩოდ, მეზგე-მერდე მა̈გ ჩუ იყუ̂ნალ, ეჯ დრეუ̂ქა ი ხუ̂ა̈ჲ ხეყარულ მერმე
Line: 30 სოფლა̈რხენ. ლაფსყალდა̈შ ლითოდურჲა̈შ ლილϩმპა̈რის როქ ერუ̂ა ჟ'ენსგიდნის, ეჯის მერმე ეჯი
Line: 31 როქ დრეუ̂დ მანგუ̂ეშ ხოჭირ.

Line: 32 მემზϩრ მა̈გ ნებოზს გარ ანღრი ი ჩის ლემზϩრ ი ზედა̈შ ახღუ̂ა ლა̈მზϩრთე. ლიმზϩრ ქა ილიჲ,
Line: 33 ეჩქანღუ̂ე ზანგლა̈გს ხუ̂ა̈შმედ. ზანგლა̈გიშ ჰერ ჰეცერ-ცხϩმა̈რს ჩის ქა ხესმი, ეჩქას ლა̈მზϩრთე
Line: 34 მეჴედ ი ალ სოფელისგა ერუ̂ა ირდი, ეჯი მა̈გ ლაჴუ̂მჲა̈შ ჰა̈ზუ̂თეჲსგა ინჭური. ეჩეჩუ ხუ̂იბდინედ
Line: 35 ლამპრა̈რს, ხოშემ ი ხოხრემ მიხედუ̂ით. მა̈ნკუ იტუ̂რი ხოშემიშ ლამპა̈რ. ჟი მუტუ̂ა̈რ ლამპრა̈რს
Line: 36 ხოსუ̂ემდ ლϩჭარად მუსისგა. ეშხუ კუ̂ირიას ეჩქას ტულიდ, ეჩქანღუ̂ე ჟი ხუ̂იკედდ ლამპრა̈რს ი
Line: 37 სუმინ ქა ხუ̂ეჭმენიდ ლაჴუ̂მის კϩრკა̈ნდ. ეჩქანღუ̂ე ჟიჲდ ხოსუ̂ემდ ნიშგე-ნიშგე ლამპა̈რს ნიშგე-
Line: 38 ნიშგე ა̈დგილჟი. მერმე კუ̂ირიას ეჩქას ტულიდ. ჟიჲდ ხუ̂იკედდ ლამპრა̈რს ი სუმინ ქაჲდ ხუ̂ეჭმენიდ
Line: 39 ლაჴუ̂მის. თხუ̈მ მϩჟეღუ̂ ხოშა მარე, სემი ლაჭამისგა, ლახა ჩუ ხა̈მედა, ეჩქას მა̈ ხემედი, ეჯჟი
Line: 40 ლიქინეს იბნე ი მერმოლუსი ლექინე ხარხ. ლალϩმპა̈რიჟი ჩუ ერუ̂ა ესფეშუ̂დნი (ლაჴუ̂მჲა̈შ
Line: 41 კϩრკა̈ნდ ლა̈ქინაჟი), ეჯი და̈ს ხოცხა,ხოლა ესერ ლი.

Line: 42 ლითოდურჲა̈შ ღϩნ ასად, თათრა̈რდ დეშ ოხჩიშხ ლაჴუ̂მჲა̈რე ლიპϩრტა̈ხი, ეჩა აღსანიშნაუ̂
Line: 43 ღϩნდ. დამოუკიდებელ ღϩნ ლი ი ლაფსყალდა̈რს გარ ხა̈მთქუ̂ახ (/ ხოხალხ).

Добавлено (2007-06-25, 7:34 Pm)
---------------------------------------------
Part No. 35

Text: 33
Line: 1
33. შიხა̈რ ცა̈შ ("შავი ხუთშაბათი")

Line: 7 ალ ღϩნს იჩოხ ქუ̂ინიმგენოლე ნაშხახენ.

Добавлено (2007-06-26, 6:27 Pm)
---------------------------------------------
. თანფა̈შ საფტინ ("აღდგომის შაბათი")

Line: 2 თანაფ სგუ̂ებნე ლადეღს თანფა̈შ საფტინს ხატულიხ. ალ ლადეღ მა̈გ ქა იქნალ, ქორს
Line: 3 ქ'ადაწყა̈ლიხ, ხოჩამდ ჟ'იმარალხ ი ეჯჟი ხეხოლიხ თანაფს. ლუგროლსი საფტინ ლადეღ აღფიხ.

. თანაფ ("აღდგომა")

Line: 2 თანაფ ხეხოლი მϩშლადეღს ი ეჯი ლადეღ ლϩშრაუ̂ეს იკედ მა̈გ ჟი.

Line: 3 თანფა̈შჲაქ ეშხუ-ჲორი ნაგზა სგებინჩუ ა̈სყიხ ქორისგა მერდე მარემ შელდ ხოხრა
Line: 4 სϩლგნილა̈რს. ალ სϩლგნილა̈რს თანაფ ლადეღ, ჰამს, ჟ'აწურწინეხ ი ჩუ იზბიხ. ეჩქანღუ̂ე სოფლიშ
Line: 5 ბოფშა̈რ მა̈გ ჟ'ინჭურიხ ი იბნეხ ლუგროლე ლიკუ̂აშალნეს. ეშხუ ლახა ჩ'ოთკუ̂იშე ლϩგრა მერმა,
Line: 6 ეჩქას ეჯინემდ ხეკუ̂ეს ქა ლახომეს ჩუ მეკუ̂შე ლϩგრე ი ამჟი იმქϩრალხ, ლა̈რ მაშენამ ანუნჭურის
Line: 7 ლუგროლს. თანაფს მაშენამ ბოფშა̈რ ხა̈კიკხ ი ეჯ ლადეღ ხოჩა ლირდეს ისყიხ.
ლიჯგრელ ("კურთხევა")

Line: 2 თანაფ მერმა ლადეღ ლი ლიჯგრელ. ეჯ ლადეღ მთელ შუ̂ა̈ნ ხოფანე. მახე ლϩდგა̈რიშ პატრონ
Line: 3 ერუ̂ა ირი, ეჯის ტაბა̈გ ხარ ლეჲნე ლასფლაუ̂ა̈რითე. ნϩნ ქა ლექუ̂ისგ მა̈გ ხეკუ̂ეს ოთფანახ
Line: 4 საფლა̈უ̂ჟი. ამეჩუ ჟი ხოშუნდებიხ ღუ̂აჟა̈რ ი ეჩქანღუ̂ე ნაფანუნს ხა̈ლხს ხამნეხ. ამჟი ლუქუ̂ე, ერე
Line: 5 ქორთე როქ დემეგ იმა̈რგ ნაფანუნიშ ლიტხე, მეზგემიშდ როქ ხოლა ლი. იშგენ მა̈გ მიჩა-მიჩა
Line: 6 ქორისგა ხოფანე.

Line: 7 38. ლილაშუნე ("თესვის დამთავრებასთან დაკავშირებული დღეობა")

Line: 8 ლილაშუნე ხეხოლიუ̂ უფლიშიშ ი თანფა̈შ უშხუ̂არ ნენსგა. ალ ღϩნს იჩმუდხ ლიჴნი-
Line: 9 ლილა̈შჲა̈შ ხოჩამდ ლიზგϩრიღა. ეჯ ლადღიშდ ზურალა̈რ ქ'ანყახ ლემზϩრა̈რს. ალ ლემზϩრა̈რ
Line: 10 ლა̈სუ̂ხ მოშ-მოშ ნა̈ჲრ: უღუ̂ა, ღϩნწიშ, ჴა̈ნილდა̈რ, ფურა̈რ ი ქორს ჟი ხომზϩრიუ̂ხ. ამკა̈ლიბ
Line: 11 ლემზϩრრე ლინყე ჯუ̂ინალდ ხემთქუნხ, ლა̈დი დეჲ ლილაშუნეს იჩოხ ი დეჲ ამჟიშ ლემზϩრა̈რს
Line: 12 ანყეხ.

Добавлено (2007-06-26, 6:28 Pm)
---------------------------------------------
. ჭაბგობ ("ჭაბუკობა")

Line: 2 ჭაბგობ ღϩნ ლა̈სუ̂ ი ათხეხიქა გარ აქუ̂აც ამიშ ლიჩუ̂ემ. ჭაბგობ ხეხოლიუ̂ უფლიშიშ ი
Line: 3 თანფა̈შ უშხუ̂არ ნენსგა. ჯϩმა ლეთ, ნებოზს, ჲორი ყორ უშხუ̂არ ნენსგა ხემთქუნხ ლიმზϩრ.

Line: 4 ზურალა̈რ ანყახ ეჯ ლადეღ ლემზϩრდ ლϩგიმბა̈შ ქუთს (თა̈შ ი გიმბა̈შ ლა̈სუ̂ ლუპურტინე), ალის
Line: 5 ჟი ხა̈მზϩრიუ̂ხ ი ეჩქანღუ̂ე ჩუ ხოფანახ. ამჟი იმზϩრდახ: "მუქუ̂იქუ̂ს შუ̂ინდბა ი ჭაბიგუ̂ს დიდა̈ბ".

Line: 6 ჩუ ნაფანუნღუ̂ე ჩუ̂ისგუ̂რიუ̂ხ ი ჩუ იდარალდახ.

უფლიშ ("საუფლო დღესასწაული")

Line: 2 თანაფუნღუ̂ე მერმე მϩშლადეღ ენჴდენი, ეჩქას ლა̈სუ̂ უფლიშ. უფლიშერისგა ხემთქუნხ ხოშა
Line: 3 სკარ, ეჯ ლადეღ ა̈ჲსენიუ̂ხ უ̂ისხუ̂ს, ალ უ̂ისხუ̂ს მთელ ლინთუ̂ ლეჟა-ლექუ̂ა ა̈ნშყახ მერიშუ̂ გარ
Line: 4 უფლიშერიშდ. უფლიშ ლაჴუ̂ა̈მიშუ̂ ლა̈სუ̂, ჲორი-ჲორი მეზგე ხეტყუბან უშხუ̂არ.

Line: 5 ეჯ ლადღიშდ ანყახ ხოშა ლესკრა̈რს. სოფელ ჟ'ინჭურიუ̂ ი იბნახ ლიმზϩრს, ხემზϩრდახ უფა̈ლ
Line: 6 დეცეშს. უ̂ისხუ̂იშ ჩუ ლიჲსენალდ უსხა̈რს აძგϩრალნახ ი ეჩქანღუ̂ე გარ ა̈ჲსენიუ̂ხ ჩუ. ჩუ
Line: 7 ნა̈ჲსენუნღუ̂ე ჟი ხა̈მზϩრიუ̂ხ ლეღუ̂ს ი ლესკრა̈რს, ჩუ̂ისგუ̂რიუ̂ხ უშხუდ ი იბნახ ლიდარელს. ეჯ
Line: 8 ლადეღ ლიტაკალი ლა̈სუ̂ ჩიჲსგა, ლიმურგუ̂ა̈ლი ი ხოჩა დრეუ̂ს ატარახ. სკარ ხემთქუნხ ჲარ ნაგზა.

პაპა̈შ ლიზალ ("მღვდლის წასვლის დრო")

Line: 2 უფლიშს მϩშლადეღ ხეჭმენი, ეჯის ხაშხა პაპა̈შ ლიზალ. უფლიშერისგა მუშგუ̂რიდ ხა̈წსიუ̂ხ
Line: 3 პაპს ი უ̂ოდოდ უფლიშ ქა იზგϩრიუ̂, ეჩქად არდა ალ პაპ მუშგუ̂რიდ სოფელისგა. ამის ხოჩა
Line: 4 პა̈ტიუ̂ს ხეჩმუდხ ი გუ̂ა̈მიდ ლუჴუ̂ა̈მინე ფიშუ̂დახ. ეჩქანღუ̂ე ესღϩრდა (/ ესტიხიუ̂) პაპ მიჩა ქორთე
Line: 5 ი ამღა ეჯჟახან ალ ღϩნს პაპა̈შ ლიზალ. მϩშლადეღ ესღϩრდა პაპ უფლიშერხენქა.

Добавлено (2007-06-26, 6:29 Pm)
---------------------------------------------
ანღლა̈ბ ("ამაღლება")

Line: 2 ანღლა̈ბ ლადეღ ხემთქუნხ ლიჩϩნჩა̈ლი. ჩანჩალ ლა̈სუ̂ ჟა̈ჴუ̂რაშ აშხალ, ალის (/ ჩანჩალს)
Line: 3 ჟ'აცხამპახ ი ჟი ხოყარდახ ნენსგა დაბისგა. მϩჩϩნჩა̈ლი ერუ̂ა ირიუ̂, ეჯის ხონყახ ხოშა ქუთს ი
Line: 4 ლემზϩრა̈რს ი ალა̈რს ჟი ხა̈მზϩრიუ̂ხ დაბლისგა. ალი ხემთქუნხ ეჯღა, ერე ხოლა თე როქ ნომა
Line: 5 ლახაგენეს მინე დაბს.

ლიგერგი ("გიორგობა")

Line: 2 ლიგერგი, იმჟი ჩჲა̈გ ხა̈მთქუ̂ახ, ეჯჟი შუ̂ა̈ნსი ჲარუნ ლი. ეშხუ ქამიზალა̈შ ლიგერგი ი მერმე
Line: 3 მუჟღუ̂რეშიშ. ქამიზალა̈შ ლიგერგი ხეხოლი უსგუ̂ა მა̈ჲსს. ალ ლიგერგის ჯუ̂ინალდ მეთხუ̂არა გარ
Line: 4 იჩმუდხ. დეი ზურალა̈რს ი დეჲ ბოფშა̈რს დემეგ ხუღუ̂ანდახ ნა̈ბ ლიგერგითე ლიზჲა̈შ. მეთხუ̂არა
Line: 5 გარ ჟ'ინზორიუ̂ხ სოფელხენქა ჯუ̂ედიას ი ხედ ფიკუ̂ს, მადეჲ გიცა̈რს, მადეჲ ხაბნას ჩუ̂ა̈ჲსენიუ̂ხ ი
Line: 6 ჟი ხა̈მზϩრიუ̂ხ. ალ ლიმზϩრ ლუღლაე ლა̈სუ̂ ლითხუ̂ა̈რხენქა. ხემზϩრდახ მეთხუ̂არა ჯგϩრა̈გს ი ბა̈-
Line: 7 აფხზა̈თს მინე ხოჩა ი შუ̂იდებია̈ნ ლითხუ̂ა̈რღა. იმზϩრდახ, ერე "ქა შომა როქ ლეჯთელედ ისგე
Line: 8 ა̈დგილა̈რთე, ეჩხენ ლϩმა̈რჯუ̂ როქოღ ეჯფიშუ̂დად, ისგე როქ ნალჟϩრ ნომაგუ̂ეშ ანკა̈ლინად"!

Line: 9 ათხე ალ ლიმზϩრს ჯუ̂ინელ დრეუ̂ქაშშალ მეთხუ̂არა გარ დემეგ იჩოხ, იშგენ მა̈გი იმზϩრ.
Line: 10 ლა̈მზϩრთე მა̈გ მიჩა-მიჩა ლა̈ჲსაშუ̂ ესხრი ი მინე-მინე ქორა̈შ ბედჟი იმზϩრხ.

Line: 11 ლიგერგის ჯგϩრა̈გიშ ლაჴუ̂მიჲსგა იჩოხ ჩია̈გ. ლა̈მზϩრთე ლა̈ჲსაცახა̈ნ ლემზϩრა̈რ ი ლეთრეი
Line: 12 ესღუ̂ახ ი ხემზϩრხ ჯგϩრა̈გს: "ჯგϩრა̈გ, სი ლეხეშდ ამიშ მϩჴდე ქორს, ხოშამ ი ხოხრამ ჩის. ჯაბიცდ ი
Line: 13 ჯაჴϩრად ჯგϩრა̈გს, სი ლა̈ნშდობინ ჩიგარ"!

Line: 14 ლიგერგიხენ ლემზϩრა̈რს ქორთე და̈რ იტხე. ჯგϩრა̈გიშ ლაჴუ̂მიჲსგა ჟი ნა̈მზურუნღუ̂ე ჩუ
Line: 15 იდარელხ ი ეჩქანღუ̂ე ქორა̈რთე ესტიხიხ.

Line: 2 პაპა̈შ ლიზალუნღუ̂ე მϩშლადეღ ჴედნი, ეჩქას ლა̈სუ̂ ლესკრობ. ალი ხოშა ღϩნ ლა̈სუ̂ ი ეშხუ
Line: 3 ლადეღს გარ ხემთქუნხ. ეჯ ლადეღ ა̈ჲსენიუ̂ხ ხედი ხაბნა ღუნს, მადეჲ გიცა̈რს, მადეჲ ფიკუ̂ს.
Line: 4 ლა̈ჲსოლ იჲსენიუ̂ხ, ეჯღა ალ ღϩნს ყუ̂იჟობსი ხატულიუ̂ხ. ლესკრობ ლადეღ ანყახ ხოშაუ̂სახუ̂იშ
Line: 5 თა̈შიშ ლესკა̈რს მეზგემ ქუნჟი ი ლაჴუ̂მიჲსგა ჟი ხა̈მზϩრიუ̂ხ. ალ ლესკრობ ლა̈სუ̂ ღერთრე ლა̈მზϩრ:
Line: 6 ხოშა ღერთემ, მϩქემ თა̈რგლეზერიშ ი ჯგϩრა̈გიშ (ალი ლა̈სუ̂ სამება შუ̂ა̈ნს).

გუ̂იზობ ("ხვნა-თესვის დამთავრებასთან დაკავშირებული დღეობა")

Line: 2 ლესკრობϩნღუ̂ე, მϩშლადეღ, ლა̈სუ̂ გუ̂იზობ. გუ̂იზობ ლადეღ ჩი სოფელისგა იჲსენიუ̂ ყუ̂იჟ,
Line: 3 ხედი ხაბნა, მადეჲ გიცა̈რ, მადეჲ ფიკუ̂. გუ̂იზობს იჩმუდხ, მაჩენე ა̈დგილ იმგუ̂ა ირიუ̂ სოფელისგა,
Line: 4 ეჩეჩუ. მეზგე მა̈გ ლესკა̈რს, სეფსკუ̂ერს ი სემი ლემზϩრს აასუ̂ ლა̈მზϩრთე. ჟი ნა̈მზϩრϩნღუ̂ე მემზϩრ
Line: 5 ხა̈ლხს ჩუ ხონა̈წილახ ლეღუ̂ს (/ ლაგა̈ფს).

Line: 6 ალ ღϩნ ლუღლაე ლა̈სუ̂ ლიჴნი-ლილა̈შჲა̈შ ხოჩამდ ლიზგϩრიღა ი ხოჩა რო მოსაუ̂ა̈ლ
Line: 7 ოხჴედნიხ, ეჯღა.
ჴადობ ("მუცლის ტკივილის მორჩენასთან დაკავშირებული დღეობა")

Line: 2 ჴადობ სოფელ ცხϩმა̈რს, ხოშა მϩნწირდ ლეზგარას, ლუღლაე ხა̈რენა ჴა̈დიშ მა̈ზიგხენქა. ეჯ
Line: 3 დრეუ̂ქა ჴა̈დიშ მა̈ზიგხენქა მასა̈რდ ხა̈ლხ ლϩმდაგროლინ შუ̂ა̈ნისგა ი ამღა ლϩმჩომინხ ლიმზϩრს.
Line: 4 მელრე ლიზუ̂ებ დემემ ხა̈შდენახ ეჯ ლადეღ. ლემზϩრა̈რს ლϩმნაყინხ ი ამიშ ნაშხა ჟი ხა̈მზϩრნახ.
Line: 5 ეზერ ხა̈ნ ლი, ერე ალ ღϩნს და̈რ იჩო. ლა̈დი ჴა̈დიშ მა̈ზიგხენქა და̈რ იდგა̈რი ი ეჯღა ალბათ.

Добавлено (2007-06-26, 6:30 Pm)
---------------------------------------------
. პა̈რპოლა̈შ ("პეტრეპავლობა")

Line: 2 პა̈რპოლა̈შ ხეხოლი იუ̂ლისისგა. ალი ჯუ̂ინალდ ხოშა ღϩნ ლა̈სუ̂ ი სოფელ ცხϩმა̈რ იჩმუდ
Line: 3 აშხუდ. ალ ლადღიშდ მთელ სოფელ უ̂არჩხილს ანჭურა ჴა̈ნიშ ლა̈ყდიდ ი ჟი იყდიუ̂ხ ხოშა ჴა̈ნს.

Line: 4 ეჯის ჩუ̂ა̈ჲსენიუ̂ხ ცხϩმრიშ ხედუ̂ალე სოფელისგა ი მთელ სოფლიშ ხოშა ი ხოხრა მა̈გ ეჩხაუ̂
Line: 5 ესღϩრდა. ზურალა̈რ ა̈ჲნახ თუ̂ით ლესკა̈რს ი ეჩϩნქა ლემზϩრა̈რს. ღუ̂აჟა̈რ ლეღუ̂ს აჯა̈ბდახ ი ჟი
Line: 6 ნაჯაბუნღუ̂ე ჩუ ათა̈ლიუ̂ხ მეზგემ ქუნჟი. ზურალრე ნა̈ჴიდ ლემზϩრა̈რს ჟი ხა̈მზϩრიუ̂ხ. ეჩქანღუ̂ე ჩი
Line: 7 ლესკა̈რჟი თუ̂ით ლეღუ̂იშ ლაგა̈ფს ა̈დისგდახ (/ ა̈დისდახ) ი ღუ̂აჟა̈რ ჩუ̂ისგუ̂რიუ̂ხ ლა̈ქეჲფს. მინე
Line: 8 სგუ̂ებინ ჩუ იდისგდახ მინე-მინე ლესკა̈რს. მა̈ხეღუ̂აჟა̈რ იბნახ ლიტაკალს ბა̈ჩიშ ლიკუ̂ანეჲსგა,
Line: 9 ლიქინალისგა, ლისკნალისგა ი ლიბურგალისგა. მთელ ლადეღ აშუ̂პა̈რიუ̂ხ ი იღრალდახ.

Line: 10 პა̈რპოლა̈შ ლადეღ ლაგას ა̈გნახ სოფლიშ ხოჩამ ი ხოლამ. ეშხუ ხოშა მარა ქა ითშიუ̂ხ ი ეჯი
Line: 11 ქ'აგცხა̈დიუ̂, იმემ მუჩუ̂ემ ირიუ̂ხ, ეჯის. ბა̈ქიშ მუქუ̂ისგს ჩუ̂აჭთენიუ̂ხ ი ამღა ბა̈ქიშ ლიქუ̂ისგს მა̈გ
Line: 12 ხენთხლალდა ალ ლადეღ. სერ ხოლა მა̈ ჩუ ეთჩუ̂ემნიუ̂ სოფელისგა, მა̈გ ჩუ იჭთენიუ̂. ლახა მარე
Line: 13 ტკიცს ქა ლეჲკუ̂იშა ი ბა̈ქს დემის რექინა, ეჩქას ეჯის დემის აჭთენიუ̂ხ, მადეი დემის აზარახ
Line: 14 ლეჭთად.

Line: 15 პა̈რპოლა̈შიშ ლიჩუ̂ემს ქა მეყჩე ხად მა̈გ, მარე სოფელ ცხϩმა̈რს ჟიჲდ ენბინეხ (ტუ̂იბერს) ალ
Line: 16 ღϩნ ი ლა̈დიჲ გუ̂ა̈მიდ იგჭეხალ წესა̈რს. ალ ლადეღ მა̈გ ხოჩა გუჟი ა̈რი. ამჟი ლა̈სუ̂ პა̈რპოლა̈შიშ
Line: 17 გუ̂ეშ ცხϩმა̈რისგა.

Добавлено (2007-06-26, 6:31 Pm)
---------------------------------------------
ელობ ("ელიაობა")

Line: 2 ელობ ხეხოლი იუ̂ლისისგა (ჲორი აგუ̂ისტოს). ალ ლადეღ ჲორი მეზგე ლი გიცრიშ მϩჴდე ი
Line: 3 ჲეშდ ლიტრა არყიშ ლაჴუ̂მითექა. მერმე მეზგოლ თუ̂ით ლესკრიშ მϩჴდე ლიხ ლა̈მზϩრთეჲსგა. ალ
Line: 4 ლიმზϩრ ლი მაცხუ̂ა̈რიშ ლაჴუ̂მიჲსგა. სემი მარე ქა ხეგნი ლა̈მზϩრს, მიჩა-მიჩა ლემზϩრს ქა ხაჰუ̂დი
Line: 5 (/ ხახუ̂დი) მა̈გ ი იმზϩრხ. ალ ლიმზϩრ ლი, ხოშა მϩნწირდ, გუ̂ა̈ლჲა̈შ ბედჟი. იმზϩრხ, ერე "ნიშგე ქა
Line: 6 ნალაშუ̂ დაბს ი ლარეს მϩხი გუ̂ა̈ლი მა̈გ ნაბა̈შოღ ხოჩუ̂მინა ი მისიშ მოსაუ̂ა̈ლ მა̈გ ხოჩამდ ჟ'ოღუ̂
Line: 7 ენკიდა".

Line: 8 მინე-მინე ლემზϩრა̈რს ნა̈მზϩრუნღუ̂ე მა̈გ ქორთე იტხე ი ქორს ჩუ იზბიხ.

ლიმრიეშ ლა̈ლჩა ("მარიამობის მარხვა")

Line: 2 ლიმრიედ ნაგზი ხოზი, ეჯი ნაგზას ლიმრიეშ ლა̈ლჩა ხაშხა ი ეჯი ნაგზაჲსგა ლϩშრაუ̂ეს და̈რ
Line: 3 იზბუდ, ხოშა ი ხოხრა მა̈გ იუ̂ჭმიუ̂. ეჯ დრეუ̂ქა შდიხსი და̈რ იზბუდ. ლიმრიე ლადეღ, ჰამს,
Line: 4 ლემზϩრა̈რს (/ კუ̂ა̈ნჭილა̈რს) ანყახ ი ლემზϩრთეჲსგა თა̈შცახა̈ნ შდიხ პა̈ტს ხა̈ჩდინახ. ეჯი უ̂ოდ ჟი
Line: 5 ლა̈ხმეზრიუ̂, ეჩქად შდიხიშ ლიხუ̂რი დემეგ ხოშიდდახ.
ლირსკϩნალ / ბიხობ (მარიამობის წინა დღის რიტუალი)

Line: 2 ა

Line: 3 ლირსკϩნალ ლი ლიმრიე სგუ̂ებნე ლადეღ. ეჯ ლადეღ ლიმრიეშდ ხემარალ მა̈გ. მეთხუ̂არა
Line: 4 ჲორი-სემი ლადეღ სგებინჩუ ლათხუ̂ართე ესხრიხ, ლიმრიეშდ როქ ნა̈თხუ̂რას ენჴდეხ, ეჯღა. მა̈დო
Line: 5 ჯუ̂ედჲას ირდი მეთხუ̂ა̈რ, ლირსკϩნალ ლადეღ ჩიღად სგა ტეხნი ქორთე, ლიმრიეს ხეკუ̂ეს ქორს
Line: 6 არდეს.

Line: 7
ბ

Line: 8 ლირსკϩნალ ეჯღა ხაშხა, ერე დაბ მა̈ ჩუ ჯერიუ̂ (/ ჯეღუ̂ენიუ̂), ალის ჩის კϩრკა̈ნდ ხაჭიმდახ ი
Line: 9 ჰასტამშუ̂ ხოჩხკϩნახ ი იმზϩრდახ: "ხოლა თე ი ხოლა ჰაყუ̂ბა მϩქა̈ბი როქოღ ლი ი ქა̈ჯ-ეშმა̈ ამჟი
Line: 10 როქოღ ოლჩხϩკნელი"! ამხენქა ხაშხა ლიმრიე სგებნე ლადეღს ლირსკϩნალ. ალ ღϩნს ბიხობსი
Line: 11 ხატულიხ.

Line: 12 ღϩნ მა̈გ ლირსკϩნალს ეშჭიმი (/ ესჭიმ). მა̈ ლადეღ ლირსკϩნალ ირი, ეჯ ლადღა̈რჟი ხეხოლი
Line: 13 ფიშირ ღϩნ. ცა̈შ-თა̈ხშიშ ღϩნ და̈ს ხოცხა, მამა როქ ლი ხოჩა.

Добавлено (2007-06-26, 6:31 Pm)
---------------------------------------------
ლიმრიე ("მარიამობა")

Line: 2 ლიმრიე ხეხოლი ჩიგარ ჲერუ̂ეშდიარა აგუ̂ისტოს (გუ̂ირკლისგა). ლიმრიე ლადეღ, ჰამს დოსდ,
Line: 3 ლემზϩრ ქუთა̈რ ინყი ქა ი მემზϩრ მარე ჟი ხა̈მზϩრი ლამარია ლიმრიეს: "ნა̈ როქ ჯუ̂ინელიშ მϩჯგრი-
Line: 4 მϩფანე გაროღ ხუ̂იდ ი ფიშირ ლიმრიე როქოღ ოქიენა ხოჩა გუჟი". ალი ლი მϩშლადეღ ი დეშდიშ
Line: 5 ლი ლიჯგრელ. ლიჯგრელ ლადეღ ჟი მა̈ ისხა̈თი, მეზგაჲსგა ი ეჯი დრეუ̂ქა, მა̈გ ლეფანე ლი.

ლიჯგრელ ("კურთხევა")

Line: 2 ლიმრიე მერმა ლადეღ ლი ლიჯგრელ ი ქუნა̈რს ეჯი ლადეღ ხოფანეხ. ზურალა̈რ ჟ'იგნალხ
Line: 3 დოსდ ი იბნეხ ლეზუ̂ბა̈რე ლიმარეს. ღუ̂აჟა̈რ ლა̈ჲსას ა̈ჲსენიხ. ლიჯგრელ ლადეღ, ხოშა მϩნწირდ,
Line: 4 მა̈გ ქათალს ა̈ჲსენი. ჟი მა̈ ისხა̈თი მა̈გ ხეკუ̂ეს ენმარენეს. ანყეხ ლემზϩრ ქუთა̈რს მოშ-მოშ ნა̈ჲრს,
Line: 5 ფეტუ̂რაშ ი სიმინდიშ ჭიშდუ̂რა̈რს. ა̈სყიხ ლეცუ̂მა̈რს, ლϩშქა̈რ შა̈მს. აჯა̈ბხ შდარა̈რს, კობეშიას.
Line: 6 ანყეხ ტკბილა̈რს ი ხილ ჩუ მა̈ იწუ̂ენი მა̈გ ხეკუ̂ეს ჩ'ოთფანახ.

Line: 7 ესუ̂ა მახე ლϩდგა̈რ ხერდი, ეჯის ლიჯგრელ ლადეღ ლϩდგა̈რიშ ტაბა̈გ ხარ ლეჲნე
Line: 8 ლაშთხუ̂ჲა̈რთე ი ეჩეჩუ ხარ ლეფანე. ლაფანაჟი სოფელდ სგა ლეწსი ხარ ლϩდგა̈რიშ ფუსდს ი
Line: 9 პა̈ტიუ̂ ლეჩუ̂ემ. იშგენ მა̈გ მიჩა-მიჩა ქორისგა ხოფანე. ჩ'უგემხ ხოჩა ტაბა̈გს ი ქორა̈შ ხოშა ჩუ
Line: 10 ხოფანე. მϩფანე ჟ'იკედ ეშხუ ჭიქ არა̈ყს ი ჟი ხოშუნდები მიჩა ქორა̈შ ქუნა̈რს, ლϩდგარუს ჩის ქა
Line: 11 იშელდე ლაფანაჟი, მიჩა ქორა̈შსი ი მერმაჲ. იმზϩრ, ერე "შუ̂ინდბაოღ ჯარხ ნიშგე ლეშუნდებჲა̈რს,
Line: 12 ქრისდეცახა̈ნოღ ლი ისგე ლაქუნ. ზეთშუ̂ უჩხადეს, ბამბა̈შუ̂ შდუადეს, ქრისდე ჩამაგა̈შ ტაბა̈გ ჩუ
Line: 13 ჯიგენეხ, ეჩეჩუოღ ჯარხ ლაქუნ. გა̈ტიშ მერსუ̂თექა მა̈გოღ ისგე ლასϩრგებ ლი. ლϩცემ ცუ̂ართექა
Line: 14 მა̈გოღ ისგე ლასϩრგებ ლი. ჴანემ ი მარემ ნამშაუ̂ მა̈გოღ ისგე ლასϩრგებ ლი. სგა̈ მა̈ ქა
Line: 15 ლეჲჟახუ̂ინენხ, ეჯი მა̈გოღ ისგე ლასϩრგებ ლი. ნიშგეშდ ხოჩა ჭიშხოღ ჯიცუ̂ირახ ი მა̈გ ხოჩა გაროღ
Line: 16 ეჯთჲალახ. ისგე მუშუნდები გაროღ ხუ̂იდ ი აშირ ზა̈ს ამხენჩუ ლეშუნდები ნა̈როღ ნარ ისგეშϩნქა".

Line: 17 ჩუ ნაფანუნღუ̂ე სგა ხესგუ̂რიხ ტაბლგს ი ჩუ იდარელხ. ლიფანე ჩიქდ ლეზუ̂ბა̈რს სგა დემის
Line: 18 ხეთლენიუ̂ხ.

Line: 2 შომა ლიკლა̈უ̂ის ქ'აზგϩრიუ̂ხ, ეჯი ლეთ ლიკეუ̂რეს იჩმუდხ. ლა̈ჲსას ა̈ჲსენიუ̂ხ, ლემზϩრა̈რს
Line: 3 ანყახ ი იმზϩრდახ.

Line: 4 ლიკეუ̂რე ხეშხϩნ ღოშგიმ პილიშ კალს. ღოშგიმ აკლა̈უ̂იუ̂ხ სუგუ̂ა̈რს. სუგუ̂ა̈რ ხეშხϩნხ
Line: 5 ნაშდარუნა̈რს ი ნამსუ̂ედა̈რს. ჟი ნა̈თეუ̂უნღუ̂ე დაბისგა სედნიუ̂ კუ̂ეცნემ, მანშიშ, ზϩნთხიშ ი
Line: 6 ჭϩმნიშ შდარა̈რ, ალ შდარა̈რს ჟ'ანჭურახ ლეკლა̈უ̂იდ ი ალის ხატულიუ̂ხ ნაშდარუნა̈რს. ეძზუ
Line: 7 ხა̈ხდენახ ლიკლა̈უ̂ჲა̈შ ქა ლილიესგ, ერე ეჯი ლეთ ლიკეუ̂რეს იჩმუდხ ი ხოჩა ბედს ისყიუ̂ხ.

მუჰიშ ლიმზϩრ ("ლოცვა თხუნელას გამო")

Line: 2 ქამიზალთე, მარტლისგა, ზურალა̈რ ლϩმნაყინხ მუჰიშ ლემზϩრა̈რს, ლაროლს როქ დემ
Line: 3 იმჰუნნიუ̂ხ, ეჯღა ი ჟი ხა̈მზϩრნახ. ალ ლემზϩრა̈რს მუჰიშ ლემზϩრა̈რს ხაყლახ.

სინოხსნა̈ბ ("სულთა ხსენება")

Line: 2 სინოხსნა̈ბ მა̈ზნოშ ლი, ჩიგარ ეშხუ რიცხუ̂ჟი ხეხოლი. ალ ღϩნს იუ̂ლისისგა იჩოხ ი ეჯ ლადეღ
Line: 3 მა̈გ მიჩა-მიჩა ლϩდგა̈რს ხოფანე. ხოშა მϩნწირდ მახე ლϩდგა̈რს ხოფანეხ. სინოხსნა̈ბ ლადეღ ლა̈ჲსას
Line: 4 ა̈ჲსენიხ, ლემზϩრა̈რს ანყეხ ი ლასფლაუ̂ა̈რიჟი ჟი ხოშუნდებიხ ლϩდგარუს.

კოსდა̈ნტბელ ("კონსტანტინობა")

Line: 2 კოსდა̈ნტბელ ღϩნ ლი. ალ ლადღიშჲაქდ ზურალა̈რ ნა̈ნკდ იზუ̂რიუ̂ხ თა̈შს ი ქ'ანყახ ხოშა
Line: 3 სუ̂ირილ ქუთა̈რს ლემზϩრდ. ალ ქუთა̈რს ჟი ხა̈მზϩრიუ̂ხ ი ჩუ̂იზბუდხ ზურალ ი ღუ̂აჟმარე მა̈გ.

Line: 4 ზურალა̈რს ნა̈ნკდ ხოგდახ მეგმემ ფაკნა̈რშუ̂ თა̈შ, ეჯის ნენსგაქა ჯუ̂ა̈რს ხეჩმუდხ ი ეჯჟი
Line: 5 აშხუ̂ნიუ̂ხ ჩუ კოსდა̈ნტბელიშდ.

Добавлено (2007-06-26, 6:33 Pm)
---------------------------------------------
ლითხერ ("სკდომა"- მომეტებული ლხინი)

Line: 2 ჯუ̂ინალდ ნიშგე სოფელისგა (ლეზგარას) ახალგაზრდოლ იჩმუდხ ლითხერს. ანდაუ̂ა ქა
Line: 3 ხეჭმენიუ̂ხ მთელ სოფელს ი ჩი მეზგა ეშხუ ნა̈ყელ თა̈შს ხა̈ჴდუნახ. ეჩქანღუ̂ე დინოლ ი ბოფშა̈რ
Line: 4 ლეჟ' ესღϩრდახ ჭიშხერუთე ი ეჩეჩუ დინოლ ქ'ანყახ ქუთა̈რს, ჭიშდუ̂რა̈რს, ჟ'ა̈სყიუ̂ხ ლეცუ̂მა̈რს ი
Line: 5 ჟი ხა̈მზϩრიუ̂ხ. ღუ̂ე ჩუ̂ისგუ̂რიუ̂ხ, ჩუ̂იდარალდახ ი ხოჩა ლირდეს ისყიუ̂ხ. ალის იჩმუდხ
Line: 6 ქუ̂ინიმგენოლე ნაშხა.

ლიგერგი ("გიორგობა")

Line: 2 ალი ლი მუჟღუ̂რეშიშ ლიგერგი ი ხეხოლი ჲერუ̂ეშდისემი ნოემბერს. ალ ლიგერგისი,
Line: 3 ქამიზალა̈შ ლიგერგიშალ, მეთხუ̂არა გარ იჩმუდხ ჯუ̂ინალდ. ლა̈დი ჩის ხა̈მთქუ̂ა ალ ღϩნ ი იმზϩრხ
Line: 4 ჯგϩრა̈გიშ ლაჴუ̂მიჲსგა. ლა̈ჲსას ა̈ჲსენიხ ლიგერგი ლადეღ ი ლემზϩრა̈რს ანყეხ. ღუ̂აჟა̈რ ხემზϩრხ
Line: 5 ჯგϩრა̈გს: "ჯგϩრა̈გ, სი ლეხეშდ ნიშგე ქორს, ხოშამ ი ხოხრამ ჩის. ჯაბიცდ ი ჯაჴϩრად ჯგϩრა̈გს, სი
Line: 6 ლა̈ნშდობინ ჩიგარ"!

Line: 7 ალ ღϩნ ღუ̂აჟრე ნაშხა ლი.

Line: 8 59. ლაუ̂ჭმი ("სამარხვო")

Line: 9 ლაუ̂ჭმი ხეხოლი ლიგერგინღუ̂ე ოხუშდ ლადეღუნღუ̂ე, ჲერუ̂ეშდიიშგუ̂იდ ნოემბერს (მახე
Line: 10 სტილშუ̂). უ̂იჭმ ლა̈სუ̂ ი ქუ̂ინ ი ღერმათ ლϩშრაუ̂ე დემეგ ხოშიდდა. ლაუ̂ჭმი ლი საკუ̂ახ ი
Line: 11 ლაუ̂ჭმიუნღუ̂ე ქრისდა̈შდ მანგუ̂ეშ ხოშიდ მარა. ლიუ̂ჭმი ილიჲ ქა იშგუ̂იდ იანუ̂არს (მახე
Line: 12 სტილშუ̂), ქრისდე ლადეღ.

Line: 13 თანაფიშ ი ლაუ̂ჭმიშ ნენსგა ლი ლინთუ̂.

შაშშობ ("ჭინკობა")

Line: 2 შაშშობ ხეხოლი მუჟღურ, ნოემბერისგა. შა̈შშობ ლადეღ, ნებოზთე, ქორა̈შ ხოშა ხოჩხკϩნა
Line: 3 ჰორჲოლს ბერჯა̈რშუ̂. ყუ̂ერბ კϩრკა̈ნდ ლერსგუ̂ანთე ხეჭმენიუ̂ სუმინ ი ტულიუ̂: -- ჰორი,.. ჰორი,..
Line: 4 ჰორი,.. ხიბთქϩნალდად, ხიჭქϩნალდად, ღϩრდად! ბოგოღ აჯყუ̂ეჩახ, ჭუ̂ეკოღ აჯყუ̂ეჩახ ი ხოლა
Line: 5 ლიბარგელოღუ̂ ჯარხ!

Line: 6 ალის ხატულიუ̂ხ შაშშა̈რე ლიჰეჲნეს (/ ლირკა̈ლის).

Line: 2 ბა̈რბოლ ხეხოლი ეშდიშგუ̂იდ დეკემბერს ი ალ ღϩნს მთელ შუ̂ა̈ნ იჩო. ბა̈რბოლ ლეთ
Line: 3 ზურალა̈რ ანყეხ ხოშა სუ̂ირილ ქუთა̈რს ლემზϩრდ ი ქუ̂ინიმგენოლე ნაშხა ჟი ხა̈მზϩრიხ. მემზϩრ
Line: 4 ხოშა მარა ლემზϩრა̈რ ქა ხოხლა ი იმზϩრ: "მეშგ ჩუ როქოღ ოგფიშრენა, ლიფშირი ი ხოჩა დრეუ̂
Line: 5 როქოღ ახჴედახ ნიშგე უ̂ეთხუ̂მალს"! ჟი ნა̈მზϩრუნღუ̂ე მა̈გ ჩუ̂ისგუ̂რიხ ი ტებდიდ ლემზϩრ ქუთა̈რს
Line: 6 ჩუ̂იზბიხ. ალი ლი შუ̂ა̈ნისგა ბა̈რბოლ ი ბა̈რბოლ ლეთ მეზგაჲსგა ჩიგარ ქუთა̈რ ინყიუ̂ უ̂ეთხუ̂მალე
Line: 7 ნაშხა.

. ნა̈დრობ ("ნაჭამობა")

Line: 2 ხოშა ლეთ შომა ლა̈სუ̂ ლინთუ̂ლისგა, ეჩქას მეზგე მიჩა დრეუ̂ჟი ქა ირბალდა ი ჩუ იდარალდა.
Line: 3 ეჩქანღუ̂ე გუ̂ჲა̈ნდ, ნადარალუნღუ̂ე, ქორა̈შ ეშხუ-ეშხუ მარე კა ჩუქათე სგა ხოლმესგიუ̂ ი
Line: 4 ზურალა̈რ მახად ქა ირბალდახ, ქ'ანყახ თაშუ̂ემ ქუთა̈რს ი მა̈დო მაბზა̈რ ირიუ̂ხ, ეჯღა̈ჲ
Line: 5 ლადარალსიდ ხეტხენიუ̂ხ. მეზგე მა̈გ ხოჩა ბედს ისყიუ̂ ეჯ ლეთ. ალის ხატულიუ̂ხ შუ̂ანა̈რ ნა̈დრობს.
Line: 6 ლა̈დი ალის და̈რ იჩო, ჩუ ლϩშდნე ლი, იმჟი ფიშირ ღϩნ, ამჟი.

შობ ("შობა")

Line: 2 შობს ლϩშრაუ̂ა დემეგ იზბუდხ. საკუ̂ახ ღϩნ ლა̈სუ̂. ეჯ ლადეღ ხემთქუნხ კუ̂ეცენ
Line: 3 ლϩღირღლაუ̂ემ ლიჯა̈ბ, ალის თესლს ხატულიუ̂ხ. თესლ ცახა̈ნ ა̈სყიუ̂ხ კაკა̈შ მუჯორს. თესლიშ
Line: 4 ლაზობდ ხოხრა კიზილდა̈რს ა̈სყიუ̂ხ (კიზილდ ლა̈სუ̂ მეგამხენქა ლϩტაბე ყუ̂ეშ). ალ თესლშუ̂ ი
Line: 5 მუჯორშუ̂ ჩუ ხოფანახ ი ნაფანუნღუ̂ე ჩუ̂იდარალდახ.

ქრისდეშ ("ქრისდეშობა")

Line: 2 ქრისდეშ ხეხოლი ჲერუ̂ეშდიოშთხუ̂ დეკემბერს მახაჟი ი იშგუ̂იდ იანუ̂არს ჯუ̂ინალჟი. ალი ლი
Line: 3 ხოშა ლიფანე ი ეჯ ლადეღ იმზϩრხ. ქრისდეშუნღუ̂ე ლϩშრაუ̂ე მა̈გ ჩუ შიდ უკუ̂ე, ხსნილ ლი.

ლიფანე ("საკურთხის დადგმა")

Line: 2 ლიფანე შჲა̈რ ქა მეფხჟე ხაკუ ი ჩიღად ეჯ მხარეს ხეკუ̂ეს ხϩგდე, იმხენ მიჟ ანღრი. ეშხუ შიჲსგა
Line: 3 ჭიქუ̂შუ̂ ჰარა̈ყ ხუღუ̂ა მϩფანეს (/ მემზϩრს) ი ხოშუნდები ქუნა̈რს: "შუ̂ინდბაოღ ჯარხ ნიშგე
Line: 4 ლეშუნდებჲა̈რს, ქრისდე ცახა̈ნოღ ლი ისგე ლაქუნ. ზეთშუ̂ უჩხადეს, ბამბა̈შუ̂ შდუადეს, ქრისდე
Line: 5 ჩამაგა̈შ ტაბა̈გ ჩუ ჯიგენეხ, ეჩეჩუოღ ჯარხ ლაქუნ. გა̈ტიშ მერსუ̂თექა მა̈გოღ ისგე ლასϩრგებ ლი,
Line: 6 ჴანემ ი მარემ ნამშაუ̂ მა̈გოღ ისგე ლასϩრგებ ლი, ლϩცემ ცუ̂ა̈რთექა მა̈გოღ ისგე ლასϩრგებ ლი. სგა̈
Line: 7 მა̈ ქა ლეჲჟახუ̂ინენხ, ეჯი მა̈გოღ ისგე ლასϩრგებ ლი. ნიშგეშდ ხოჩა ჭიშხოღ ჯიცუ̂ირახ ი მა̈გ ხოჩა
Line: 8 გაროღ ეჯთიალახ. ისგე მუშუნდები გაროღ ხუ̂იდ ი აშირ ზა̈ს ამხენჩუ ლეშუნდები ნა̈როღ ნარ
Line: 9 ისგეშϩნქა"!

Line: 10 ამჟი იმზϩრხ ლაფანაჟი ლა̈დიჲ.

Добавлено (2007-06-26, 6:35 Pm)
---------------------------------------------
ლუშნუ ხატრე ჟახეა̈რ ("სვანური ხატების სახელები")

Line: 2 შუ̂ანა̈რ ხატა̈რს გუნ ლუგუ̂ენს ხა̈დისგხ ღუ̂ე. ხა̈ტ ი ღერმეთ ჩი მუშუ̂ა̈ნს ხანწა̈მ. ლუშნუ
Line: 3 ხატა̈რს მინე-მინე ჟახე ხაშხახ, ალა̈რ ლიხ: გარმაჭ, ნასრეთ, ლϩჴად, შარლა̈ნი ი ჯგϩრა̈გ ლაკა̈ჲ.

Line: 4 შარლა̈ნი ხა̈ტსი ხაჟხა ი ა̈დგილსი. ამჟი ლϩჴადი ხა̈ტსი ხაშხა (/ ხაჟხა) ი ლდგილსი. ჩი ხა̈ტს
Line: 5 მიჩა-მიჩა ისტორია ხუღუ̂ა. მაგალითად, ჯგϩრა̈გ ლაკა̈ჲს კუ̂ამშა მუხუ̂იტანსი ხატულიუ̂ხ. კუ̂ამშა
Line: 6 ლი ჯუ̂ინლიშ-ჯუ̂ინელ ლუშნუ გუ̂ა̈რ. ალ გუ̂ა̈რიშ ხა̈ლხ ხოლა ლϩმა̈რხ ი ალ ხა̈ტიშ ჟϩრშუ̂ ესერ
Line: 7 ომხუ̂ეტხ.

შუ̂ანრე მოშ-მოშ მა̈ნკ ("სვანების სხვადასხვა თვისება")

Line: 2 1.ჰებრას ჯუ̂ინალϩნდირ მახად და̈რ ა̈შხი ლემასგუ̂ისგა. ტულიხ, ერე ალი გუ̂ა̈მიდ ხოლა როქ
Line: 3 ლი მეზგემიშდ. ალი ეძზუ ხოგიჭ ჩის, ერე ჟი და̈რ აჟუ̂მე ი ბოფშა̈რთექა ჩის ჩუ ხოხალ.

Line: 4 2.ჰა̈დრასი და̈რ ა̈შხი ლემასგუ̂ისგა, ალი როქი ხოლა ლი მეზგემიშდ. ეჯურ ჰა̈დრას მა̈ხერაშ
Line: 5 ჟაგრა̈რდ იჴმა̈რიხ. ჰა̈დრა მუღუ̂ა̈ს ჴიდე ი ეჯი სგა ხედგენი, ეჩქანღუ̂ე ჴიდე ქუთ-კუ̂ახს, ალის
Line: 6 ჩუ̂ა̈ნკუ̂შდეხ ი ამნოშ აქა̈ნხ მა̈ხერაშ მაზგოუ̂ა̈რს. ალი ეძზუ მϩწიბ ლი, ერე ჩუ უ̂ენდ ხოგიჭ მარე.
Line: 7 მახე ნა̈ბჟინ ირი მა̈ხერა, ეჩქას ჩიღად ქა ხაჟგენი.

Line: 8 მახე ღუნა̈რს დემეგ ხოთრახ ჰა̈დრაშ ყუ̂აუ̂ილ ი აშგარ იზბიხ. ალი ქ'ა̈ბელე ღუნა̈რს ი ჲერხი
Line: 9 ჰედურდ დეშ იჴჩეხ ქა ი ჩუ იდგა̈რიხ.

Line: 10 3.ლაკლა̈უ̂იჟი ლიშუ̂ეპინალ დემეგ იმა̈რგდა. ლიკლა̈უ̂ჲა̈შ ქა ნა̈ლიასგუნღუ̂ე ლემზϩრა̈რს ანყახ
Line: 11 ი აგუ̂რანალნახნაკლაუ̂ ჭემჟი.

Line: 12 4.შუ̂ანა̈რ, ჯუ̂ინალდ, ეჯშელდ დია̈რს ანყახ, უ̂ოშა ამსუ̂ალდ ირდიუ̂ ქორისგა. ჟეღ ესუ̂ა
Line: 13 ხორდა, ეჯის ჟეღდი ხად ლემნე დია̈რ ი თუ̂ით ნა̈კუ̂იშს მა̈გ ქა ხოკუ̂ანა ქორისგა.
Line: 14 5.ჯუ̂ინალდ ლემსგიშ ლაშუ̂ად იჴმა̈რიუ̂ხ მეგმემ სტუ̂ირს, ალ სტუ̂ირშუ̂ ხოფულიუ̂ხ ლემასგუ̂ს.
Line: 15 6.ჯუ̂ინალდ ზურალა̈რ ლაღბა̈ბიჟი ქიპს სგანჩუ დირილდა̈შ ბოჯს ხა̈ნხუნახ. ალის ეჯღა
Line: 16 ლუმჩომინხ, ერე მა̈ჲდარობ ლϩმა̈რ შუ̂ა̈ნისგა ი შომა ქიპ ჩუ შდხენიუ̂, ეჩქას ჟი ხა̈ხოლოლნახ
Line: 17 ლეზობდ ი ეშხუ-ჲორი ნა̈პუ როქუ̂ ქა ხეფსიუ̂. ჩუ დემის ლϩმდაუ̂შოლინ. ეჯ დრეუ̂ქა ალიჲ შაუ̂ა
Line: 18 ლϩმა̈რ მარემიშდ. ნამბუალდ მასმა, ერე აშხუნ ეშხუ ზურალ ბერა̈რს ლϩმწინდაუ̂ინ ი მიჩა
Line: 19 ბეფშუ̂ილდ მა̈ჲდშუ̂ ლუმგუ̂ა̈ნინ ი ლეზუ̂ებს ხა̈ჰრუნა. მიჩა დი როქ ხატულიუ̂: "მოჲდ ხა̈ნს როქ
Line: 20 ჩუ̂აჭჭკϩრნე ი ღუ̂ე ღϩბა̈ბ როქ ჩუ̂ეშთხენი, ეჯის როქუ̂ დირილდა̈შ ნა̈კუ̂იშ ხონხა ი ქა როქ
Line: 21 ლაჰუ̂ედნე". ბეფშუ̂ილდ ლა̈კიკს სგა გარ ხა̈სგუ̂რენა მიჩადის. ალის ქ'ოთლია ლიწინდა̈უ̂ი ი ქიპი
Line: 22 ჩ'ომშდეხელი. ესნა̈რი ალ ღϩბა̈ბს დირიშ ნა̈კუ̂შულ მϩქაფ სიმინდიშ გუნგუ̂ლა̈შ ნა̈ყუ̂იჩ ხა̈ნხენა.
Line: 23 ბეფშუ̂ილდ ქაჲ ხა̈წდა გუნგუ̂ლა̈შ ნა̈ყუ̂იჩს ი გუ̂ი ჩუ̂ათხეპა. ალ ზურალს ესნა̈რი ლაღბა̈ბიჟი
Line: 24 დირილდ დემეგ ხა̈ღუ̂ენა ქიპიშ ლენხი ი ამღა გუნგუ̂ლა̈შ ნა̈ყუ̂ჩულ ლოხნახა.

Line: 2 ლიჭმალისგა ნიშგეშ ჩიგარ ნოდობს იჩმუდხ. ალის ახანახასი ხუ̂ატულიუ̂დ. ნა̈თი-ნა̈ცცა̈უ̂ისგა
Line: 3 ჟი ხუ̂ინჭურად ხოჩა მϩჭმე ლემხეღუ̂აჟეს; ხუ̂ა̈წსიუ̂დ ლატლიხენ, ბეჩუ̂იხენ, ფა̈რხენ, ცხϩმა̈რხენ --
Line: 4 ჩი სოფელხენ. ახანახა ხეხოლიდა, ხოშა ლაღა̈ლდ, სამტინ ლადეღ. ახანახათე მეჴდე მა̈ხეღუ̂აჟა̈რს
Line: 5 ახღუ̂ანდახ მინე-მინე მერჩლა̈რ ი ჰამს ურჰად იბნახ ლიჭმეს. თხუმ ხოჟეღუ̂დახ მაჩენე მϩჭმე მარე,
Line: 6 ეჩქანღო მერმოლუ ხაჭიმდახ. ეშხუ ლარას ქა ილჲასუ̂ხ ი მერმა ხეგნიუ̂ხ, -- ი ამჟი ნებოზდ ა̈ჭმახ.

Line: 7 ლა̈ჭმაჟი ქა ითშიუ̂ხ ხოჩა მϩჭმე მა̈ხეღუ̂აჟა̈რს ი იბნახ ლიტაკალს. ალ მეტაკალას ხეკუ̂ეს
Line: 8 ხა̈ღუ̂ენენხ ეშხუნა̈ჲრ მერჩლა̈რ. ისგლადეღქა ჩუ ხოხალდახ, ლა̈რ ლა̈სუ̂ გამარჯუ̂ებულ, ეჯი, ი ეჩა
Line: 9 ლა̈მზϩრა̈ლის იკადდახ.

Line: 10 ნებოზს, მიჟიშ ნაჰუ̂არუნღუ̂ე, ლარათექა ენღუ̂ანდა ლეზუ̂ებ-ლეთრე, ჟი მა̈ ისხა̈თიუ̂ მა̈გ.
Line: 11 ლარაჲსგა ქა ფხუ̂იჟად ლეზუ̂ბა̈რს ი ჩუ ხუ̂ადა̈რიუ̂დ მϩმარჯუ̂ას. ეჩქანღუ̂ე ჰამუნღუ̂ე-ნებოზდ
Line: 12 ნა̈ჭემ (/ ნამშაუ̂) მა̈ხეღუ̂აჟა̈რ იბნახ ლიბურგალს. ალი წეს ლა̈სუ̂ თემიშ ი თემიშ უშხუ̂არნენსგა.
Line: 13 ხეტაკალდახ უშხუ̂არ ლაბურგალისგა.

Line: 14 ეჩქანღუ̂ე მϩმარჯუ̂ა მა̈ხეღუ̂აჟა̈რს ქორთე ხუ̂ა̈წსიუ̂დ. ეჩეჩუ ხოჩა სკა̈მ-ტაბა̈გს ხოხუასდ,
Line: 15 ტოლიბა̈შს ხუ̂ითშიუ̂დ ი ჰამდ ლა̈სუ̂ ლიზუ̂ებ-ლითრე. ლათრაჲსგაჲ ლა̈სუ̂ ლიტაკალ, ლა̈რ
Line: 16 ათშდϩმასუ̂ უშხუ̂არ. მერმა ლადეღ ჩუ̂იყუ̂რულალდახ ი მა̈გ მიჩა-მიჩა ქორთე ესტიხიუ̂.

Добавлено (2007-06-26, 6:36 Pm)
---------------------------------------------
ლითხუ̂ა̈რ ი მიჩა წესა̈რ ("ნადირობა და მისი წესები")

Line: 2 ა

Line: 3 მეთხუ̂ა̈რ მარე, შომა ლათხუ̂ართე ლიზის ხა̈პირე, ეჩქას ეშხუ ნაგზა სგუ̂ებინჩუ ხემარალ. ალ
Line: 4 დრეუ̂ჟი მეზგე ხეკუ̂ეს წყილა̈ნ ლესეს, ნაღუ̂აჟ ზურალ ხეკუ̂ეს ნომა არდეს ქორისგა. ლეუ̂იზს ჟი
Line: 5 ხამარნე ხოშა ზურალს. მერმე მეთხუ̂ა̈რი ამჟი იჩო. უშხუ̂არ ქა ხებჟინიხ ი და̈რ იმჴერი
Line: 6 ქორშა̈რϩნქა, ეჯჟი, ჭიშხ ჩუ ეთგენი, ეჩქას ქა ხეგნიხ შუკუ̂ს ი ესხრიხ ჯუ̂ედჲათე, ლათხუ̂არ
Line: 7 ა̈დგილა̈რთე.

Line: 8 მეთხუ̂არა ნა̈თხუ̂რას ლახ ქა ხეწდენიხ, ეჩქას ხედა ხეწდენი, ეჯი მერმე მეთხუ̂ა̈რს ხატული:

Line: 9 -- გუ̂იშგე მϩხჲა̈დი ქუ̂ინიმგენე ეჩეჩუ სგუ̂ეჯი!

Line: 10 ეჩქანღუ̂ე ხედი ხედუ̂ალე, მადეჲ ლექდა სგა ხეჴუ̂სგენიხ ი ეშხუ ხატული მერმეს:

Line: 11 -- ნეპოლ! -- ქ'ოთაუ̂ეჯ ისგუ ტარხან!

Line: 12 ლახ ქა ხეკϩრქიხ, ეჩქას ძიკუ̂ს ჟი ხა̈ქუ̂ცეხ ი ჟი ხა̈მზϩრიხ ეჩეჩუ ა̈ფხზა̈თს ი ჯგϩრა̈გს: დიდა̈ბოღ
Line: 13 აჯჴედახ, ალი მა̈ ქა ლანემდ!

Line: 14 ნა̈თხუ̂რას ქა ატმურეხ, ყუ̂იჟეს ი გუ̂ის ქა ხოკედხ, ჟ'ატყბეხ ი ქორთე ლიჴდალდ ჟი ხა̈მზϩრიხ.
Line: 15 ამიცახა̈ნ აშხუდ ქორხენ ნა̈ჴიდ ლემზϩრა̈რს ი ზედა̈შსი ჟი ხა̈მზϩრიხ. ეჩქანღუ̂ე ნა̈თხუ̂რას ჩუ
Line: 16 იყუ̂ლეხ ისდ. ტუფიშ ი ლეღუ̂იშ წილს, ნა̈ლკუხს, იკედ, ხედა მϩდგა̈რი დემეგ ლა̈სუ̂, ეჯი. ძიკუ̂
Line: 17 მϩდგა̈რჲა̈შ ლა̈სუ̂.

Line: 18 ლახა ლექდაშ ნა̈შთხინ ხერი ნა̈თხუ̂რას, ეჩქას ჯϩლა̈ს ა̈დისხ ი ხედას ჯϩლა̈ ოხკუ̂ანე, ეჩა ნაკარქ
Line: 19 ლი.

Line: 20 ეჩქანღუ̂ე სგა ტეხნიხ მოკა̈რქიშ ქორთე. ნა̈თხუ̂რა ლეთშუ̂ ახღუ̂ახ სოფელთე, თე როქ ნომა
Line: 21 ლახაგენეხ, ეჯღა.

Line: 22 ქორს ლიმზϩრსიდ იჩოხ. ძიკუ̂ს ჟ'აჯა̈ბხ, ლემზϩრა̈რს ქ'ანყეხ ი ტაბა̈გჟი ჩუ̂ა̈დისხ ლემზϩრა̈რს ი
Line: 23 მϩჯა̈ბ ძიკუ̂ს; ჟ'ატუ̂რეხ ლეტუ̂რეს. მეთხუ̂ა̈რ მარე ჲორი შიუ̂შ ჟ'იკედ ტაბა̈გს, ჩოქϩლა̈რს ხეგნი ი
Line: 24 იბნე ლიმზϩრს. ეჩქანღუ̂ე ჩუ იდარალხ ი ნადარალუნღუ̂ე ქორისგა მერდე მარე მა̈გ ქა იბა̈რ შჲა̈რს.

Line: 25 ღანაუ̂ ზურალს დემეგ ხოშიდ ნა̈თხუ̂რაშ ლეღუ̂იშ ლიზუ̂ებ.

Line: 26
ბ

Line: 27 შუ̂ა̈ნს ლითხუ̂ა̈რ ქორისგა ხოშოლუხენქა მინე ნაბა̈რწყთე ესხრი. მეთხუ̂ა̈რ მარა ლახა მიჩ
Line: 28 ლითხუ̂ა̈რ დემეგ ხა̈მედა, ეჩქას მიჩა გეზალ ნაღუ̂ჟურს ხომზϩრი ქა თუ̂ეფს.

Line: 29 შუ̂ანა̈რს ბϩგიდ ხანწა̈მხ ჯგϩრა̈გიშ, ხაჯრაუ̂ახ, ერე ჯგϩრა̈გს შომა ხაკუ, ეჩქას ხაჰუ̂დი მეთხუ̂ა̈რს
Line: 30 ღუ̂აშს ი ჰერსკნს ი ა დემეგ ი დემეგ. ჯგϩრა̈გიშ მϩმა̈რჯუ̂ი ლი და̈ლ. და̈ლ ლი ზურალ, იუ̂ალადეღ
Line: 31 კოჯა̈რისგა მერდე. ეჯი ერხი მეთხუ̂არას ქაჲ ხეწუ̂ენი ობა̈შინ ი ეჩქას მეთხუ̂ა̈რიშ გუ̂ეშ ხოჩამდ ლი.
Line: 32 მარე დალა̈შ მეწედ მეთხუ̂ა̈რდ ხეკუ̂ეს ქა ნომეგ ლეჲკუშეს ალი, ედო და̈ლს ხასდიკ ი ჩუ̂ადუ̂ა̈ში.

Line: 33 შუ̂ანა̈რს ხაჯრაუ̂ახ, ერე და̈ლს როქ ჯგϩრა̈გხენქა სგა ლϩბრეუ̂ე ხარ ღუ̂აშა̈რ ი ჰერსკნა̈რ ი
Line: 34 ეჯა̈რე შელდ, იმჟი ლϩა̈რუე, ამჟი ლϩდგარუე. და̈ლს მა̈ზუ ეხკა̈ფი, ეძზუს ხადგარნე მეთხუ̂ა̈რს
Line: 35 ნა̈თხუ̂როლს.

Line: 36 ფიშირϩნ ხა̈ხუა ეჯი, ერი და̈ლს მეთხუ̂ა̈რ ჟი ხელტϩნი. მეთხუ̂ა̈რდ ხეკუ̂ეს ნომეგ ოდღალტას
Line: 37 და̈ლს ი ნოჲ ეჯი ხეკუ̂ეს ლეჲკუშეს, ერე და̈ლცახა̈ნ აყუ̂რა, ედო ალი და̈ლს ხახϩრა ი მეთხუ̂ა̈რს
Line: 38 ჩუ̂ადუ̂ა̈ში. ამღა გუნ ინთხლალ მეთხუ̂ა̈რ ი დემ ა̈ხრინე და̈ლს, მარე ერხის ეჯღა̈ჲ ქა ხექდიხ მოლე,
Line: 39 ხედ ხოღლა̈ტიხ ზურალცახა̈ნ, მადეჲ ქა ხეკუ̂იშიხ და̈ლცახა̈ნ გუ̂ეშ ხუღუ̂ახ, ეჯი. ლა̈დი ამკა̈ლიბა̈რ
Line: 40 ხოხრა ხანწა̈მხ ი დეჲ ეჩქადიშშალ ითხუ̂ა̈რხ. ნა̈თხუ̂როლი ჟ'ენმϩრხელდანხ შუ̂ა̈ნისგა.

Добавлено (2007-06-26, 6:36 Pm)
---------------------------------------------
მეთხუ̂არაშ ნინ ("მონადირეთა ლოცვა")

Line: 2 მეთხუ̂ა̈რ შომა ლათხუ̂ართე ესხრი ი ხოლა და̈რ ხეჰელი, ეჩქას ლიდუ̂ა̈შჲა̈შ მაყაუ̂შ ამიშ
Line: 3 ლაქდენი ნინს ტული:

Line: 4 " ერეუ̂ეზ, გერეუ̂ეზ,

Line: 5 ანგაროზ ნიორსა.

Line: 6 ნადირსა ნაუ̂ხარა,

Line: 7 ფუჲ! ჰალდო ეშმაკი" .

თხერემ ნაუ̂დაგრი ("მგლის მოუკვლელობა")

Line: 2 ჯუ̂ინალდ შუ̂ა̈ნს თხერა და̈რ ლϩმდაგრინ, ეჯღა, ერე თხეროლ ეჩქანღუ̂ე ეჯ მეზგემ უ̂ეთხუ̂მალს
Line: 3 ჩუ ლϩმცϩრლინხ.

Line: 4 თხეროლ როქ ლიხ ჯგϩრა̈გიშ ჟეღა̈რ. ესუ̂ალა ლახ სგა ლეხდაგრიუ̂ უმბლა̈რდ თხერე, ეჩქას
Line: 5 ეჯის ჩუ იტენტურა კა̈ნჭუ̂ლა̈რშუ̂:

Line: 6 -- სი როქ ნომა ლამდაგრენ, ისგუ̂ა როქ მϩქაფ ხეხუ̂ოღ ლამდაგრენა. სი როქ ნომა
Line: 7 ლამდაგრენ, ისგუ̂ა როქ მϩქაფ დიოღ ლამდაგრენა. სი როქ ნომა ლამდაგრენ, ისგუ̂ა როქ მϩქაფ
Line: 8 გეზალოღ ლამდაგრენა. ისგუ როქ დაგრა ლამპა̈ტიუ̂!

Line: 9 თხერე ლახა იცრϩლნიუ̂ უ̂ეთხუ̂მალს ი ეჯის ქა ხესდინიუ̂ხ, ეჩქასი დემის ხეფშუ̂დახ თუ̂ეფს ქა,
Line: 10 ეძზუ ხაყლენიუ̂ხ თხერემ დაგრად.
მეთხუ̂არაშ ნინ ("მონადირეთა ენა")

Line: 2 მეთხუ̂არა ლათხუ̂ართე ღϩრდახ, ეჩქას მინე ნინ ხუღუ̂ანდხ ი უშხუ̂არ ალ ნინშუ̂ ხარგა̈დიუ̂ხ.
Line: 3 ალი ლა̈სუ̂:

Line: 4 გუ̂იშგე მϩხჲა̈დი ეჩეჩუ სგუ̂ეჯი -- ჩვენი გამხარებელი იქ ბრძანდება

Line: 5 კუ̂იცრა -- დედალი ჯიხვი

Line: 6 ლა̈ბჯგი -- ჯოხი

Line: 7 ლეძგბϩნე -- საჭმელი

Line: 8 ლითაჴალ -- სანადიროდ წასვლა

Line: 9 ლიჰუ̂ეჯი -- სროლა

Line: 10 მუხშირ -- სამი-ოთხი წლის ჯიხვი

Line: 11 ნა̈რს -- მარილი

Line: 12 ნეპოლ -- კაცი

Line: 13 ტარხან -- თოფი

Line: 14 ტყებერა̈რ -- ტყავის ფეხსაცმელი

Line: 15 ქა მეკარქ -- მეშოვა (ვიშოვნე ღვთის წყალობით)

Line: 16 ქ'ეთსგუ̂ეჯნან -- გადაბრძანდა

Line: 17 ქ'ოთაუ̂ეჯ! -- ესროლე!

Line: 18 ღუ̂აშ -- მამალი ჯიხვი

Line: 19 ჯაბრა̈რ -- ტყავის ფეხსაცმელი

Line: 20 ჯღარკა̈რ -- ფეხსაცმელი

Line: 21 ჰაუ̂ეჯ -- თოფი

Line: 22 ჰერსკნ -- არჩვი

Line: 2 ჯუ̂ინალდ ერხი ღუ̂აჟა̈რს ი ზურალა̈რს ლილბურალა̈შ ნინ ხა̈ხლენახ ი ხუ̂ა̈ჲ ტაფს
Line: 3 ლუმჩუ̂ემინხ სოფელისგა. ესუ̂ა̈ჲშ ჯინ ხეღუ̂ენიუ̂ხ ი ერუ̂ა ხესსგიუ̂ხ, ეჯის მინე ლილბურალშუ̂ გუნ
Line: 4 ხოლამ ხა̈სყუნახ. ერხი ქუ̂იშაჟი ლუმგურნალინხ ტუ̂იტელ ი თხეროლდ ი ციცუ̂ა̈რდ
Line: 5 ლϩმსიპოლნელიხ. ეჩქანღუ̂ე უშდილ ოლმა̈ზნელიხ ეჯი მეზგათეჲსგა, ესუ̂ა̈ჲშ ჯინ ხა̈ღუ̂ენახ ი ერუ̂ა
Line: 6 ხა̈სსგენახ. მარა სგა ხა̈შდკϩნოლნახ ციცუ̂ა̈რ ყიაჲსგა ი ზისხს ლϩმწობინხ. ალ დრეუ̂ჟი მარე ჰერს
Line: 7 დეშ ლϩმკიდინ ი ლϩმხϩრტϩნინ გარ. ქორშა̈რ ჟი ლϩმგენოლინხ, ეჩქას ციცუ̂ ქა მეჩდე ლϩმა̈რლი
Line: 8 ქორხენქა. მა̈დო ათწენასუ̂ხ ყორ-ლაჴუ̂რას, ეჯღა̈ჲ სგა ლϩმჴედოლინ ქორთეჲსგა. ჩუ ხაყარულნახ,
Line: 9 მარე ჟი დეშ ლϩმϩრმასუ̂ინხ.

Line: 10 აშხუნ ლϩმა̈რ ადა̈ჲდ ამჟი გუ̂ეშ. მეზგა ხა̈ფსუ̂დენა ციცუ̂, ამნა̈რ ჩ'ოთყარულახ ი ციცუ̂, მა̈დო
Line: 11 ლϩმა̈რ, ჟ'ოხϩრმახ. ამნა̈რ ჭϩშხრე ი შირრე ფხულა̈რ მა̈გ ქ'ოთქუცურახ ი ეჯჟი ოთფიშუ̂დახ ქა.

Line: 12 მერმა ლადეღ ქ'ახჭემახ სოფელს, უ̂ითომ იშგან ხეთხელიუ̂ხ, ეჯჯი (/ ეჯჟი). ეშხუ მეზგემ
Line: 13 ღუ̂აჟმარე ჩუ ლუმყუ̂ინ. ალ ღუ̂აჟმარემ ხეხუ̂ს ლახჭუ̂ედნენახ: "მა̈ როქ ხათϩმ ისგუ ჭა̈შს, იმღა
Line: 14 როქ აყუ̂რე ჩუ"? -- ზურალს ჩ'ოთომა, ეჩქას ჟ'ოხკϩმრახ ი ში ი ჭიშხ მა̈გ ჩუ ლუჭუ̂ენ ხა̈რენა.
Line: 15 ამნოშ გუნდ ომჴედელიხ, ერე ალ მარე ლϩმსიპოლინ ციცუ̂დ.

Line: 16 ლϩმა̈რდელი ადა̈ჲდ ეშხუ ზურალ, ალის ლილბურალა̈შ ნინ ხა̈ხლენა. ერუ̂ა ხა̈სსგენა ეჯა̈რს
Line: 17 ნინს ხატულინენა ი ყიაჟი ფა̈თუ̂ ახეზინენახ. ხა̈ტხუნახ, მარე ეჯღა̈ჲ დეშ ხა̈შთხუნახ ყიაჟი
Line: 18 ფათუ̂ა̈რს ი ამჟი წუ̂ალებაჲსგა ლϩმა̈რდელიხ მინე ლირდეჲსგა ეჯჲა̈რ.

Line: 19 თხეროლდ ერუ̂ა ლϩმსიპოლინხ, ეჯა̈რ მეზგოლს უ̂ეთხუ̂მალს ხაცრϩლნახ ი სერ ამჟი
Line: 20 ხოლამისგა გარ ხა̈ყენახ ერხი-ერხი მეზგოლ.

Добавлено (2007-06-26, 6:38 Pm)
---------------------------------------------
ლაგუ̂ანა ("სატირალი")

Line: 2 სოფელისგა მარე ლახ იდგა̈რი, ეჩქას ლϩდგა̈რიშ ქორშა̈რ ყორთექა ჴედნიხ, ამეჩუ ლიკილალს
Line: 3 იბნეხ ი ამნოშ ქა ხა̈ბჟინეხ მთელ სოფელს. სოფელ მა̈გ ლიჴედს იბნე ი ჟ'ინჭურიხ ლϩდგა̈რიშ
Line: 4 ქორს. სგა̈ხიქაშ ნა̈თჲა̈რ ლა̈კილიშუ̂ ი ლალჭალშუ̂ ანღრიხ. ლაგუ̂ანა ჩიქდ უქუ̂იცდ ანღრი
Line: 5 ლამუნგუ̂ა̈მითე სგა̈ხიშ ი ქა̈ხიშ მა̈გ.

Line: 6 მა̈ ლადეღ ჩუ იდგა̈რი მარე, ეჯ ლადეღ ლაგუ̂ანას ლაგას ა̈გნეხ. ღუ̂აჟა̈რს მინე გუ̂ეშ ხოთრახ ი
Line: 7 ზურალა̈რს -- მინე. ლაგუ̂ანას იჩოხ ხედი თახა̈შს, მადეჲ -- ცა̈შს, მადეჲ -- სამტინს. იშგენ
Line: 8 ლადღა̈რჟი დემეგ იმა̈რგ ლაგუ̂ანაშ ლიჩუ̂ემ. ჯუ̂ედიათე ჩითე ქა ხა̈ბჟინეხ ი ქა ერუ̂ა იკუ̂ხე,
Line: 9 ლა̈ტენტალთე მა̈გ ანღრი.

Line: 10 ლϩდგა̈რს ხოჩამდ ჩუ̂აშდბϩნეხ, უქმუნა ლერექუ̂-ლელდისგს ხა̈ქუ̂ემხ ჩის ი ლϩდგა̈რს კა̈ცხა̈შ
Line: 11 ლეჟა ჩუ̂ა̈დისგხ. ეჩქანღუ̂ე ქორშა̈რ ი სგა̈ხიქაშ ნა̈თჲა̈რ მა̈გ სგა ხესგუ̂რიხ კϩრკა̈ნდ ი იბნეხ
Line: 12 ლილჭალს ი ლიკილალს.

Line: 13 ლაგუ̂ანაშდ ჟ'ამარეხ კუ̂ეცნემ ითქს, ქϩნა̈შს, ლებიას, თუ̂ის, არა̈ყს. ათხელდ ხოშა სუ̂ირილ
Line: 14 დია̈რს ანყახ მარემ ქუნჟი, ეჯ დია̈რს ნენსგაჩუ ჴუ̂რა̈ჩს ხა̈ყენახ ი სარა̈ჯს ეშთეჲსგა ა̈გუ̂შახ.
Line: 15 ლეზუ̂ბა̈რ მა̈გ დია̈რჟი ზϩსდა ჟიქაქა, ეჯღა, ერე სა̈ჲნა̈რ დემეგ წუ̂ანდა ეჩქას შუ̂ა̈ნს.

Line: 16 ლაგუ̂ანა სგებნე ლეთ ლი ტϩტა̈შ დირობ. ეჯ ლეთ სოფელ მა̈გ დია̈რს ანყე ი ღერღილს ა̈სყი ი
Line: 17 ალი ესღუ̂ა ლϩდგა̈რიშ ქორთე, ეჩეჩუ ჩუ ხოფანეხ.

Line: 18 ლϩდგა̈რს ჩიგარ ლეგემს ხოგამხ ი ათხეჲ ამჟი ლი ალი. ალ ლეგემჟი ა̈დისხ: დია̈რს,
Line: 19 ტკბილა̈რს, თესლს, ϩგემხ ლეთრეს. ჩუ მა̈ იწუ̂ენი, მა̈გ ხეკუ̂ეს ზϩსდეს ლეგემჟი. ლეტუ̂რესი
Line: 20 ატუ̂რეხ. ჩუ ლიშთხუ̂ალდ ჩი ლეთ ხოლგენიხ ღუ̂აჟა̈რ, ლϩდგა̈რს გარ დემის ცუ̂ირეხ.

Line: 21 ლაგუ̂ანა ლადეღ ლϩდგა̈რს მϩჟემ ლიწდალდ კუბთეჲსგა ა̈სგუ̂ჯინეხ. ხა̈ლხ ჰამსუნღუ̂ე იბნე
Line: 22 ლიჴედს. ისგლადეღუნღუ̂ე ჟი ხეგნიუ̂ ეშდორი ზურალ ზურალა̈შ ჴა̈დს ი იბნა თხუმ მეგნე ზურალ
Line: 23 ლიშელდეს ი შუ̂ა̈ნისგა, ჯუ̂ინლიშ ი მახემ ნენსგა, ლϩდგა̈რს ჩის ჟი არშუ̂ნიუ̂. მერმე ზურალა̈რ
Line: 24 ყიცს ხოყარდახ. ზურალა̈რუნღუ̂ე ეშდორი ღუ̂აჟმარე ხეგნიუ̂ ღუ̂აჟმარემ ჴა̈დს ი ამჟი ტულიუ̂ხ:
Line: 25 "უ̂ა̄̈ჲ მია̄, უ̂ა̄̈ჲ მიშგუ̂ა ლირდე̄ს, უ̂ა̈ჲ"! ამის ტულიხ სუმინ.

Line: 26 ალი ათხე და̈ს ხა̈მთქუ̂ა, მარე მიშგუ მაშყადობისგა ხემთქუნხ ი ხოჩამდ მაშყიდ.

Line: 27 ლϩდგა̈რს თხურმა̈შმϩყ კირუ̂ენს ხოტუ̂რეხ. ღუ̂აჟა̈რ არა̈ყშუ̂ ჟი ხოშუნდებიხ, ეჩქანღუ̂ე
Line: 28 ლϩდგა̈რს ლერსგუ̂ანთე ჟ'ასპუნეხ ი ა̈ჲნეხ ლაშთხუ̂ითე. ყორქა ლა̈ჴდაჟი და̈რ იგუ̂ნი. უ̂ოდოდ
Line: 29 ჰა̈ზუ̂ს ქა ხოქა̈ბი, ეჩქად ლიგუ̂ნი დემეგ შიდ. ყორქა ლა̈ჴდაჟი მეჰერ ერდგუ̂ილ ზურალს ჩუ̂ა̈გნეხ
Line: 30 ყორჟი თეთნე ნეფყუშ ი ლეტუ̂რეშუ̂. ჭირისუფა̈ლ თხუმთე ესხრი. ლϩდგა̈რს თხუმ ხეხუ̂ა̈რ
Line: 31 ხოჟეღუ̂ხ ლა̈კილელშუ̂ ი ლალჭალშუ̂, ეჯა̈რს ნა̈თი ღუ̂აჟა̈რ ესჭიმხ ი ალა̈რეშდ ლϩდგა̈რ ოსჭიმიხ.
Line: 32 ღუ̂აჟა̈რ ზა̈რს ტულიხ.

Добавлено (2007-06-26, 6:38 Pm)
---------------------------------------------
33 ლϩდგა̈რს ქაჲ ჴიდეხ ყორქა ი შიშდ ხეკუ̂ეს ანჟომახ ჟი ლϩდგა̈რიშ ნა̈გენ ლაყუ̂რა ი
Line: 34 ჭირისუფლა̈რე ნასგურ ბანდრა̈რ.

Line: 35 ლაშთხუ̂იჟი ზურალ მა̈გ კილი. სგა̈ხიქაშ ჭირისუფლა̈რ (გეზალ, მადეჲ ხეხუ̂, მადეჲ დაჩუ̂ირ)
Line: 36 საფლა̈უ̂თეჲსგა ა̈სკნეხ. ღუ̂აჟა̈რ ქა ხეჴϩრალხ, ჟიჲდ ხოშუნდებიხ ი ლϩდგა̈რს საფლა̈უ̂თეჲსგა
Line: 37 სგ'ა̈სგუ̂ჯინეხ ი ამჟი ჩუ̂აშდღუ̂იხ. ეჩქანღუ̂ე მარე მა̈გ ლϩდგა̈რ მარემ ქორთე ესტიხი ი ეჩეჩუ
Line: 38 ტაბგობ ხარხ. ზურალა̈რ ნა̈ნკდ ისგუ̂რიხ ი ღუ̂აჟა̈რ -- ნა̈ნკდ. ჩის მიჩა-მიჩა დია̈რ ხოსდა სგებინჩუ.

Line: 39 ნებოზთე თამ-თამა̈შდ ჩუ ფხეჟნი ხა̈ლხ ი მა̈გ მიჩა-მიჩა ქორთე ესტიხი. ჯოდიახენ ნა̈ჴედ
Line: 40 ნა̈თჲა̈რ ჩუ სედნიხ ი ხედ მერმა ლადეღ, მადეჲ ეჩქანღუ̂ე, მერმე ლადღა̈რჟი, ესტიხიხ ქორთე.
Line: 41 ერუ̂ა ლაგუ̂ანაჟი დემეგ ირდოლ, ეჯის ქორთე ხოუ̂ზახ ხა̈რჯს.

Line: 42 ეჯი ლეთ გუ̂ჲა̈ნდ საფლა̈უ̂იშ ლაკმა̈რითე ესღრიხ, ლეთრეს ი ლეზუ̂ებს ა̈ჲსხ ი საფლა̈უ̂ჟი ჩუ
Line: 43 ხოლმესგიხ. ნა̈ქუ̂ ლი, ერე ლϩდგა̈რს როქ ხაყლენი მა̈ნკუშ ლეთ ი ეჯღა ხოლმესგიხ. ზურალა̈რ
Line: 44 ჩუჲდ ილჭეხ ი გუ̂ჲა̈ნდ ქორთე ტეხნიხ.
Line: 45 ხედი მერმა ლეთ, მადეჲ ეჩქანღუ̂ე ლიშრაუ̂ელს იჩოხ. ეჯ ლეთ ა̈ჲსენიხ ლა̈ჲსას ი სგა̈ხიქაშა̈რ
Line: 46 მა̈გ ჩუ აშრა̈უ̂იხ. ეჩქად ურწყუ̂ ლიხ. ალის ლიურწყეუ̂ის ხატულიხ, დეჲ თაშემ ოხთრისს იზბიხ ი
Line: 47 დეჲ ლაღუ̂ემ. ერხი ზურალა̈რ აშხუ̂ ზაუ̂თეჟი ლა̈სუ̂ხ ურწყუ̂.
Line: 48 სამ ზაუ̂ ძაძა̈რ ხა̈ქუ̂ხ ზურალა̈რს ი ღუ̂აჟა̈რ ყაბს იგნეხ კონჩხა̈რთექა. ყაბიშ ქა ლიწბურეს
Line: 49 ჩა̈რჩიშ ლიშდალს ხატულიხ. ჩა̈რჩიშ ლიშდალ ლადეღ ჩუჲდ ხოფანეხ ლϩდგა̈რს. ჩა̈რჩიშ
Line: 50 ლიშდალთე ჰა̈რიდ და̈რ ესხრი. ხოშილ სგა̈ხიქაშა̈რ ლა̈ჲსას ა̈ჲნეხ ი ქა̈ხიქაშა̈რ ქათალს, თა̈შს ი
Line: 51 ამკა̈ლიბა̈რს.

Line: 52 ლϩდგა̈რს ჩი ღϩნჟი ხოჩამდ ჩუ ხოფანეხ.

Добавлено (2007-06-26, 6:38 Pm)
---------------------------------------------
კონჩხა̈რ ("გარდაცვალებიდან მეორმოცე დღის აღნიშვნა")

Line: 2 ჲურინერუ̂ეშდ ლადეღ ქა ღϩრი ლϩდგა̈რიშ ნადგარუნღუ̂ე, ეჩქას იჩოხ კონჩხა̈რს. კონჩხა̈რჟი
Line: 3 ა̈ჲსენიხ მოლე ხოშა ლა̈ჲსას, ხედი ჴა̈ნს, მადეჲ ფირუ̂ს. ფირუ̂ს, ხოშა მϩნწირდ, ზურალ მარემ
Line: 4 კონჩხა̈რჟი ა̈ჲსენიხ. ადა̈ჲდ ა̈ჲსენიხ გოჭა̈რს ი ქათლა̈რს. ნინ ქა ლექუ̂ისგს ჩიგუ̂აშ ამარეხ.
Line: 5 მეზუ̂ბელ ჰა̈რიდ და̈რ ჴედნი, ერს ქათალ ახღუ̂ა, ერს თა̈შ, ერს გუ̂ეჭ ი ამჟი. მუყუ̂ჟი ერუ̂ა ლი, ეჯი
Line: 6 ყუ̂იჟს ი არა̈ყს ჴიდე.

Line: 7 კონჩხა̈რთე ლაგუ̂ანაშალ უწსად და̈რ ანღრი, ნა̈თის ჩის ქა ხა̈ბჟინეხ ი ლϩწსე ერუ̂ა ირი, ეჯი
Line: 8 გარ ღϩრი მა̈გ.

Line: 9 ისგლადეღუნღუ̂ე ლაშთხუ̂ჲა̈რთექა ნაფანუნს ა̈ჲნეხ ი ეჩეჩუ ჩუ ხოფანეხ. ზურალა̈რ ჩუ იქქუ̂იხ
Line: 10 ეჯჟი ჩუჲდ ილჭეხ ლϩდგა̈რს. ღუ̂აჟა̈რ ჟი ხოშუნდებიხ ი ეჩქანღუ̂ე, ნებოზთე, ქორს ჩუ̂ატბა̈გიხ.
Line: 11 ალის ტაბგობს ხატულიხ. ხა̈ლხს ჩუ̂ასგუ̂რეხ; ღუ̂აჟა̈რ ჟიჲდ ხოშუნდებიხ ი ამჟი ჩუ იყრულალხ, ი
Line: 12 მა̈გ მიჩა-მიჩა ქორთე ესტიხი.

ლეგემიშ ლიკდალ ("სადგამის"- საკურთხის აღება)

Line: 2 შუ̂ა̈ნს ლახ ერუ̂ალე იდგა̈რი, ეჩქას ეჯის ლეგემს ხოგემხ. ალი ლი სკა̈მ-ტაბა̈გ. სკა̈მჟი
Line: 3 ლϩდგა̈რიშ ლერქუ̂ა̈რ ხორკა ი ტაბა̈გჟი მა̈გ შუ̂იმიშ ლეზუ̂ბა̈რ ზიხ. ალ ლეზუ̂ბა̈რს ჩი ლადეღ მახე-
Line: 4 მახეს ა̈დისხ. მუთურა ჟი მა̈ ისყი ქორისგა, მა̈გ ხეკუ̂ეს ჩ'ოთფანა ლϩდგა̈რს. ლეგემ ზაუ̂ ლი წეს,
Line: 5 მარე ერხი ზაუ̂ ჩიქდ იკედხ ჟი. ლეგემიშ ლიკდალ ლადეღ ლა̈ჲსას ა̈ჲსენიხ, არა̈ყ ი დია̈რ სგებნაუ̂
Line: 6 ხარხ ჟი ლϩმარე, ტაბა̈გს ქა ფხიჟეხ ი მეზუ̂ბელა̈რს ი ნა̈თჲა̈რს სგა ხა̈წსიხ (/ ხა̈წციხ). ზურალა̈რ ჟი
Line: 7 ხექქუ̂იხ ლეგემმϩყ ი სგა̈ხიქაშა̈რ ჩუ ილჭეხ. ლეგემს ტაბა̈გს სგა ხა̈გემხ ი ჩუ ხოფანეხ. ღუ̂აჟა̈რ ქა
Line: 8 ხეჭა̈რიხ ტაბა̈გ კϩრკა̈ნდ ი ფაყუ̂ ქა მეკდე ჩუ ხოშუნდებიხ, აშხუ̂ შიჲსგა არა̈ყ ხუღუ̂ახ ი მერმა
Line: 9 შიისგა -- ლეტუ̂რე, ეჯჟი. ეჩქანღუ̂ე ერუ̂ალე ლა̈ჲმედი ზურალს ხეშმიხ ი ალის ლეგემს ი სკა̈მს ჟი
Line: 10 ხა̈კუ̂დუნაუ̂ნეხ. ზურალ ლერსგუ̂ანთე ჟ'ისპუნი ი ლეგემს ქ'ა̈ჲნე ყორქა. ყორქა ლაზჟი ტული: --
Line: 11 ხოჩა როქოღ ჭიშხ ოთცუ̂ირა მიჩა ნა̈თი-ნა̈ცცა̈უ̂დ!
Line: 12 ნებზუ̂ა̈შ პილთე ხა̈ლხს ჩუ̂ასგუ̂რეხ ი ჩუ̂ადა̈რიხ. ღუ̂აჟა̈რ ჟიჲდ ხოშუნდებიხ ი ამჟი ქა იპა̈ნტი
Line: 13 ხა̈ლხ.

Line: 14 ლახე გუ̂ა̈მიდ ლეტკლებ მარე დემეგ ლი ლϩდგა̈რ, ეჩქას ზურალა̈რ ეშხუ ზაუნღუ̂ე თეთნე
Line: 15 ნეფყუს იჭუ̂ენიხ.

Line: 2 ჯუ̂ინალϩნდირ ლა̈დიდ ხა̈მთქუ̂ახ შუ̂ანა̈რს ქუნემ ლიტხე. შომა ჯუ̂ედჲას იდგა̈რი მუშუ̂ა̈ნ მარე,
Line: 3 ეჩქას ეჩა ჭირისუფლა̈რ ქუ̂ინს სგა იტხეხ ქორთე. მა̈დო ჯუ̂ედჲათე ხერიხ ლეზი, ეჯღა̈ჲ ქა ღϩრიხ ი
Line: 4 სგა იტხეხ ქუ̂ინს. ესუ̂ა ქუ̂ინიშ ლიტხე ხეხლი, ეჯის ინჴრინეხ ქუნემ ლა̈ტხათე -- ზურალს ი
Line: 5 ღუ̂აჟმარა. ალა̈რ ჩა̈ნგს ა̈ჲნეხ ი მამილს ინჴრინეხ. იმგუ̂ა მარემ ნადგარ ირი, ეჯϩნეშდ ლϩბნე
Line: 6 ქორთეჲსგა ქიპ ახყახ; ჩა̈ნგს ა̈შმეხ ი ეჯჟი ანღრიხ. შომა ქუ̂ინ დემეგ ანღრი, ეჩქას მამილ ჰერს
Line: 7 დემის იკედ ი ჩუ იჩრეუ̂ი. ეჩქანღუ̂ე ჟიჲდ იბნეხ ი ამჟი სგა აჰყახ მარემ ქუ̂ინ ქორთეჲსგა. მამილ
Line: 8 ეზე ხა̈ნს ლეგემმϩყ ა̈რი ი ქა დემ ესხრი ყორქა; შომა მიჩ ეხკა̈ფი, ეჩქას გარ ტეხნი ქა ქორხენქა.

უჩა ("უჩა"- მიცვალებულის ოჯახში მისატანი საკურთხი)

Line: 2 უჩა ხაშხა ნაფანუნს. ამიშ ლიჲნე ჟაბა̈რს ხა̈მთქუ̂ახ, სგა̈ხიქაშ ხედგა̈რიხ, ეჩქას. ხედ ჰასუ̂იშ,
Line: 3 მადეჲ ნიბა̈შინ, მადეჲ ერუ̂ალე სგა̈ხიქაშ ხედგა̈რიხ, ეჩხაუ̂ ხა̈მთქუ̂ახ უჩაშ ლიჲნე. ლაგუ̂ანაშდ მა̈
Line: 4 წეს ლი, საკუ̂ახ, ალი მა̈გ ახღუ̂ახ ნაფანუნდ.

Line: 5 ლაგუ̂ანა ლადეღ, ლიშთხუ̂ალ ჩიქდ მეჴედ ხა̈ლხს ჩუ̂ატბა̈გიხ. ტაბა̈გს ϩგემხ ი ჩუ ხოფანეხ.
Line: 6 ღუ̂აჟა̈რ ჟი ხოშუნდებიხ ი ეჩქანღუ̂ე ხა̈ლხს ჩუ̂ასგუ̂რეხ.

Добавлено (2007-06-26, 6:39 Pm)
---------------------------------------------
გ) გადმოცემები, ამბები
Line: 1
79. ალმა̈ცგირ ქალდან ("ალმაცგირ ქალდანი")

Line: 2 ჯუ̂ინალდ ქალდანა̈რ ლϩმზიგხუ̂იდ ლატლის, ხუ̂ინთელანრე ჟიქაქა. ნიშგე ხოშოლუ გუ̂ა̈მიდ
Line: 3 შეძლებულდ (/ ლϩჴმა̈შდ) ლϩმზიგხ ი ლატლი მინე შიჲსგა ლϩმა̈რდლი. ეძძუ (/ ეძზუ) შეძლება
Line: 4 ხა̈ღუ̂ენახ, ერე მერმა ხამშაუ̂ნახ. ლატლიჲსგა მა̈გ ნა̈თი მამა ხა̈რდენახ, ხოშა მϩნწირდ, მა̈გ მეჰერ
Line: 5 ლϩმა̈რ. მესუ̂ფელა̈რს ხახარბენახ ალა̈რეშდ ხოჩა ლიზგე.
Line: 6 ქალდანრე ხოშას ხა̈ჟხენა ალმა̈ცგირ. ლატლა̈რს ოთკუ̂იხახ ლატლიჲსგა, ერე ალმა̈ცგირს
Line: 7 თუ̂იმი სარა̈გ როქ ახა̈ზი ი მაურცეფშუ̂ ლიჲმახუ̂ ოხბინახ ლატლა̈რს ალმა̈ცგირიშდ. ლატლიჲა̈შ
Line: 8 სუ̂იმრას (/ ლუზუ̂ერს) ოხსყა ეჯჟიშ გეგმა, ერე ხეკუ̂ეს ჟ'ოხხუ̂იტანხ ალმა̈ცგირიშ ქორ. ამნოშ
Line: 9 ხეკუ̂ადხ თუ̂იმი სარა̈გ მინს ესსედნიუ̂ხ, ეჯი.

Line: 10 ალმა̈ცგირს ამბა̈უ̂ (/ ბა̈ჟინ) ოთჴად, ჩუ̂ათცხϩრნე ერუ̂ალედ მინე ლიხუ̂ტე ხეკუ̂ადხ ლატლა̈რს,
Line: 11 ეჯი. მა̈ ხეკუ̂ეს ხოჩუ̂მინენს ალმა̈ცგირს? მიჩა სოფელს დეშ ხეგნიუ̂ სგებინ. ანჴად ი ჟ'ანმარე მიჩა
Line: 12 ხეხუ̂ ი გეზალ, დი, ი მა̈ სა̈ჭირო ხადხ ლამგზაუ̂რდ, ეჯი მა̈გ შინ ლაჲრმხ ი ათაგანხ შუკუ̂ს, მარე
Line: 13 დემე ხოხალდახ, იმთე დო ომჩედლა̈სუ̂ხ.

Line: 14 ალმა̈ცგირს ი მიჩა ქორშა̈რს და̈ლთე ეთჴედϩნხ. ამეჩუ ჩ'ოლზიგელიხ სოფელ საკენს ი ჟიჲდ
Line: 15 ოხსყახ ხოჩა ლიზგე-ლირდე.

Line: 16 აშხუ̂ ლადეღ ალმა̈ცგირ ჰუ̂ილშუ̂ ოლმა̈ზინ იმთუ̂ალე ი შუკუ̂ისგა ხა̈წდა ბეფშუ̂ს, ალ ბეფშუ̂
Line: 17 სარა̈გს ხაშდრალა ი ლუშნუდ ხამბუალა. ალმა̈ცგირ ალის ქა ხა̈წდა, ეჩქას ჩუ̂ახქეხა ჰუ̂ილს ი
Line: 18 ქ'ომჩედელი სარა̈გთექა. ლახჭუ̂ედნენა ბეფშუ̂ს: "ლა̈რ როქ ლი, იშა როქ ლი, მადეჲ მა̈ გუ̂ა̈რიშ
Line: 19 როქ ლი". ალ ბეფშუ̂ს ხოქუ̂ა, ერე "ქალდან როქ ლი". ალმა̈ცგირს ქ'ოხჭოდრალა მა̈გ ხოჩამდ ი
Line: 20 ჩ'ოცცხϩრა, ერე ესნა̈რი ალი მიჩა მუხუ̂ბემ გეზალ ლϩმა̈რლი. ალი გუნ ათხიდა ალმა̈ცგირს,
Line: 21 ჟ'ოხსგურა ბეფშუ̂ ჰუ̂ილჟი ი ქორთე ოთჴერნა. ამეჩუ, ქორისგა, ხოშა ი ხოხრა მა̈გ ხა̈შდბენა, ჩის
Line: 22 მიჩა-მიჩა გუ̂ეშ ხა̈თრენა ქა ი ალ ბეფშუ̂ უ̂ეთხუ̂მალე მϩლდეღდ ოთფიშუ̂დახ. ალის ბოგჟი ხა̈რენა
Line: 23 ლელეჩ.

Line: 24 აშხუ̂ ლადეღ ბეფშუ̂ს ლუღუ̂ინ ფუ̂ირ (/ ფირუ̂) ხაზუ̂რალა ქორთე. ალი ჩუ დეშ ლϩმგიჭინ,
Line: 25 ეჩქას ოხკიდა ბა̈ჩ, ქ'ოხფეშუ̂და ფუ̂ირდ ი ეშხუ ლესგისგა ნა̈ყირ ბა̈ჩს მერმე ლესგქა ოთსკინა.
Line: 26 ფუ̂ირ ჩოლდაგა̈რ. ბეფშუ̂ს ალი ჩ'ოთმა̈შყუ̂დუნა, ალ ბა̈ჩ იმთე აშყად, ეჯი, ი ომტეხელი ქორთე
Line: 27 მეგუ̂ნი.

Line: 28 ალმა̈ცგირ ლახჭუ̂ედნენა:

Line: 29 -- მა̈ როქ ლი, იმღა როქ იგუ̂ნი?

Line: 30 ბეფშუ̂ს ქა ხოქუ̂ა:

Добавлено (2007-06-26, 6:40 Pm)
---------------------------------------------
31 -- ფუ̂ირ როქ სგა ლახდაგრა.

Line: 32 -- აღო, ბა̈ჩ როქ იმე ზϩ (/ ზი)? -- ლეხჭუ̂ედდა ალმა̈ცგირ.

Line: 33 ბეფშუ̂დ ქა ხა̈ქუ̂ე, ბა̈ჩ იმეგ ხოუ̂ახ, ეჯი.

Line: 34 -- ამღა როქ ნომ იგუ̂ნი! -- ხოქუ̂ა ალმა̈ცგირს ი ჯი მელთერთე ომჩედელი. მელთერს ხოქუ̂ა,
Line: 35 ერე

Line: 36 -- მახე მϩშლადეღ როქოღ ეხთხელიუ̂ ი ჟი როქ ხეხოლი.
Line: 37 ამეჩუ ლარდაჟი, მელთერმϩყ, ა̈ცხირ ალმა̈ცგირდ, ერე აფხზეთიშ მახუ̂ში ბეფშუ̂ს ესერ ხეთხელი.

Line: 38 ალმა̈ცგირ ქორთე ომტეხელი ი მახე მϩშლადეღს ახთხელინენა ბა̈ჩს. ბა̈ჩ ჟ'ახხუა უ̂ერისგა. ალ
Line: 39 ბა̈ჩ ჩი ბა̈ჩდ ხოშილ მეგჭე ლϩმა̈რლი. ალმა̈ცგირ ობურ (/ მაბგა̈რ) მარე ლϩმა̈რელი ი გუდ ომჴედ,
Line: 40 ერე ალი მოლეგუ̂ეშ ლასϩრგებ ლა̈სუ̂ ი ქორთე ოხჴიდა.

Line: 41 ქ'აჩად დრეუ̂. ჟ'ახსგურენა ალმა̈ცგირ მიჩა ჰუ̂ილს ი სგა ომჴედ შუ̂ა̈ნთე. ალი ბა̈ჩი შინ
Line: 42 ლოხურმა. ამეჩუ, ჩეჲშ (ჴუმფრერიშ ტუ̂იბს ლი ნა̈ლზიგ), ლϩმზიგ ხოჩა მϩშკიდ ი ამხაუ̂ ოთხია ალ
Line: 43 ბა̈ჩ. სგა ლოხბერუ̂ა ამნა̈რდ ი ხოქუ̂ა:

Line: 44 -- ამხენქა დაშნა̈ როქოღ ოხშკა̈დ.

Line: 45 მϩშკიდს აშ ოთხიდა, მარე ალმა̈ცგირს ლიღროუ̂ალდ ათყალინენა ი ლახჴϩრენა მϩშკიდს:

Line: 46 -- ალ ბა̈ჩხენქა თეტენ ჟი როქოღ ოხშკა̈დ ჯაბრა̈რე ლა̈სყიდ!

Line: 47 მϩშკიდს ეჯი წა̈მჟი ოხშკადა ჟი ეჯი ბა̈ჩხენქა თეტენ ი ქა ლოხოდა ალმა̈ცგირიშდ.

Line: 48 ალმა̈ცგირ ქ'ომტეხელი და̈ლთე. ალ დრეუ̂ისგა აფხზეთდი ჩუ̂ა̈ცხირ ალი, ერე ბეფშუ̂
Line: 49 ალმა̈ცგირიშმϩყ არდა. ოხბინეხ ლიმცოქუ̂ილ ალმა̈ცგირს, ერე "ქა როქოღ ლახტიხ ბეფშუ̂", მარე
Line: 50 ალმა̈ცგირდ უ̂არ ლახტიხ, ეჯღა, ერე ალ ბეფშუ̂ მიჩა მუხუ̂ბემ გეზალ ლა̈სუ̂. აფხზა̈რდ დრეუ̂
Line: 51 ლოხკა̈ცხხ, ერე ალ ი ალ დრეუ̂თეჲსგა ბეფშუ̂ ხეკუ̂ეს ქა ლოხტიხენს.

Line: 52 ამქად ი ამქად დაშნლშ ლიშკა̈დჲა̈შ დრეუ̂ი ანჴად ი ალმა̈ცგირ სგ'ანჴად ჩეჲშთე. ამეჩუ, ალ
Line: 53 მϩშკიდდ ქ'ოხჴიდ დაშნა̈ ეჯჟიშ, ერე ხოჩილს დემგუ̂აშ ხეწდენიუ̂ მარე. ალმა̈ცგირს ალი გუ̂ა̈მიდ
Line: 54 ლახლატϩნ.

Line: 55 -- ალი როქ ლჲა მიჩა ბა̈ჩხენქა ნა̈სყეუ̂ დაშნა̈? -- ლეხჭუ̂ედიუ̂ მϩშკიდს.

Line: 56 -- ალი როქ ლი, მიჩა მა̈ზიგ როქოღ ლახჴედა.

Line: 57 ალმა̈ცგირს უ̂ა̈რკ ლახარა, ოხკიდა თეტენ ი ლოხგენა დაშნა̈დ ი ქ'ოთფიტა მერმათე, ეჩქას
Line: 58 მϩშკიდს ხოქუ̂ა:

Line: 59 -- მიჩა როქ ლიღროუ̂ალს დემეგ ხა̈ყენა, -- ი ქა ოხჴიდა მერმე დაშნა̈. ალმა̈ცგირს
Line: 60 უშხუ̂არდიდ ლოხგენა თეტენ ი დაშნა̈ ი უშხუ̂არ აშ ახქეფახ, ეჯღა, ერე ეშხუ ბა̈ჩხენქა ლϩმა̈რხ
Line: 61 ლϩსყე.

Line: 62 ალმა̈ცგირ ატახ ქორთე. ამ დრეუ̂ისგა აფხზეთიშ ლუჰუ̂ედ დრეუ̂ი ჩუ აშდახ. აფხზეთიშ ჯა̈რ
Line: 63 სგა ლახაგან მიჩ. ალმლცგირდ ქორს ხა̈ქუ̂ე:

Line: 64 -- ჯი როქ ღϩრი ალა̈რე ლახოლთე ი მიჩა გონა̈ბ ნომა როქ ხარხ.

Line: 65 აფხზა̈რ დემეგ ენჭინდახ, ეჯჟიშ დრეუ̂ჟი ეხჩიდინან მინე ჯა̈რს ალმა̈ცგირ. დაშნა̈ ლესუ̂ილი
Line: 66 მამა ხა̈რენა. ჰუ̂ილჟი როქ ხა̈სგუ̂რენა, ეჯჟი აშ როქ ა̈ჭმა ჯა̈რს ჟი უსუ̂ილად. ალა̈რ ეშ ი აშ
Line: 67 ოთპანტა. ეჯა̈რ ქ'ათჩედახ ღოშდ. მიჩ ჟ'ოშჭონა ქორთე. კალისგა მიჩა დი ლაჰხუა ი ხოქუ̂ა
Line: 68 ალმა̈ცგირიშდ:

Line: 69 -- დიაჯო, ზისხგა დაშნა̈ ნომოღ ლახწონე ი ქა როქოღ ადკუ̂ეცნე!

Добавлено (2007-06-26, 6:40 Pm)
---------------------------------------------
70 ალის ოსრიშ კალთა̈ ლოხკოშდა ჟი დაშნა̈ჲშ ლაკუ̂ცა̈ნიდ. ლოხჭემა ლერთანხენჟი ყუახენ ი
Line: 71 ლერსგუ̂ენ ბარჯჟი ოხსკინა ჟი. დაშნა̈დ ისდ აქუ̂იც ჩუ. უ̂ოდე ქუ̂ინ ჟ'ოხჩედნიუ̂, ეჩქად ჟ'ოხჩიშა,
Line: 72 ერე ხოქუ̂ენს მიჩა დეშდ:

Line: 73 -- მიჩა როქოღ ცოდ ხარ, დია! -- ი ჩ'ოლდაგა̈რ.

Line: 74 ალმა̈ცგირს ხა̈რდენა სემი ნაღუ̂ჟურ ი მეუშთხუ̂ე მუხუ̂ბემ გეზალ. ალა̈რს ეჩეჩუ ლარდა დემე
Line: 75 ხადხ ეჩქანღუ̂ე ი ათაგანხ შუკუ̂ს, მარე იმთედო ესღϩრდახ, დემე ხოხალდხ. ალ ბოფშა̈რ ხოხროლუ
Line: 76 ლϩმა̈რლიხ ი უ̂ოშადო ლადეღ ახადხ შუკუ̂ჟი, ლა̈ს ხოხალ. აშხუ̂ ა̈დგის აჰხუახ ფოქ ი
Line: 77 ჩ'ოლსადგუ̂მელიხ ფოქლისგა. ეჯი ლეთ ჟ'ოსყϩრახ ალ ლახუ̂ბას მϩჯროლ ი ხოქუ̂ახ:

Line: 78 -- იმთე როქ ლა̈ს ხადეხ ლეზი, ეჩა მϩჯრა როქ ეჩხაუ̂ ლϩგინწეოღ აჰხუ̂იდხ (/ ახხუ̂იდხ) ჰამს.

Line: 79 ათხე, ჰამს, ჟ'ოლგენელიხ ი ხა̈წდახ, ერე მინე ბუბაშ გეზლა̈შ მϩჯრა მუგუჟი ხა̈ყრენა, დემთე
Line: 80 ლϩგინწე ლϩმა̈რ. ხოშა მუხუ̂ბემიშ მϩჯრა ხჲა̈რ ჩუ ლუმყუ̂ინ ლეჟაუ̂ -- შუ̂ა̈ნთე. მანესგϩრი
Line: 81 მუხუ̂ბემიშ მϩჯრა ხოხრა ლϩგინწე ლϩმა̈რ ი მაჰრენე მუხუ̂ბემიშ ხედურდ მოჲდ გარ. მინე ბუბაშ
Line: 82 გეზალ ა̈დგილჟი ომსედელი ჩუ ი ეჩა ნაბა̈რწყ ლიხ ქარდაოლ, -- ი იზგეხ ზა̈ნს.

Line: 83 ლეჟაუ̂ ლϩგინწე ესუ̂ა̈ჲშ ლϩმა̈რ, ეჯა̈რ ენგურიშ ტუ̂იბს ახჭემახ ლეჟა. შუ̂ა̈ნს მა̈ ქალდანა̈რ
Line: 84 იზგეხ, ალა̈რ ლიხ ეჯი სემი ლახუ̂ბაშ ნაბა̈რწყ -- ჭუბერϩნეშდ უშგულთეჲსგა.

Line: 85 ქალდანა̈რ დემეგ იზგეხ ეჯი ჯუ̂ინელ ნა̈ლზიგ სოფელისგა (ლატლის).

Line: 2 ქϩნა̈შს ა̈სყიუ̂ხ ლაგუ̂ანოლჟი ი კონჩხრა̈რჟი, ადა̈ჲდ მოშ-მოშ ღϩნა̈რჟი, ხოშა მϩნწირდ
Line: 3 ადგომჟი.

Line: 4 ქϩნა̈შ ისყი გიმბა̈შხენქა. გიმბა̈შს ჩუ აყლიხ (/ ჩუ̂აყა̈ლხ) ქუიჯისგა, ეჩქანღუ̂ე ჩუ̂ა̈ცხრილიხ.
Line: 5 ცხϩრილისგა სედნი მეგრე, ეჯის ჩუჲდ აყა̈ლხ (/ აყლიხ), ეჩქანღუ̂ე ჩუჲდ ა̈ცხრილიხ. ალის ტებდი
Line: 6 ლიცს ხა̈ქუ̂შეხ, შიუ̂შ ჟ'ა̈ჩდინეხ ფაკნიჲსგა ი ცხϩრილჩუ ჩუ̂აწუ̂დეხ. ეჩქანღუ̂ე ჟი ხეკუ̂ეს ესგა
Line: 7 ფეჩჟი ლა̈ფიჲნას ი იმგუ̂ა დგუ̂ლა̈ბს ანკუ̂ანე, ეჯი ა̈დგილჟი მუსს, მადეჲ მϩცხი ლიცს ესგუ̂ეშნე
Line: 8 მოჲდს (/ მოჲდილს). ამჟი იჩოხ ფიშირამϩნ ი შომა ლახთერ, ერე სგელ ლი ი ლიცს ქა ხეყუ̂ლენი,
Line: 9 ეჩქას ქაფქირშუ̂ ჟ'ეხკედ ი ამთეჲსგა ხა̈ყრინე ლუჰუ̂იჭ კარტოფილს, ხა̈ხუ̂ს, ჯიმს ი ძაფანას.
Line: 10 ეჩქანღუ̂ე ჰეკუ̂ეს ჩუ ათჰუ̂იჭა გუ̂ა̈მიდ ი ლϩსყე ლი. ალი გუ̂ა̈მიდ ხოჩა ლეზუ̂ებ ლი ი მა̈რგებელ.

Line: 11 ამჟი ისყი ქϩნა̈შ კობეშიაშ წკახენქაჲ.

ბეგენი ("შვრიის შეჭამანდი")

Line: 2 ბეგენი ისყიუ̂ ჯუ̂ინალდ. ალი გუ̂ა̈მიდ ხოჩა ლეზუ̂ებ ლა̈სუ̂ ი ჭირი მასა̈რდ ხეკუ̂ად. ბეგენის
Line: 3 ა̈სყიუ̂ხ ზϩნთხხენქა. ზϩნთხϩს ქა იგუ̂ეჰდახ, ეჯის ლიცს ხაპურტინახ ი ეჩქანღუ̂ე მეგმემ ბუყუ̂ინისგა
Line: 4 ჟ'იტხახ. ჟი შომა ტეხნიუ̂, ეჩქას ცხϩრილჩუ ჩუ̂აწუ̂დახ, ეჯღა, ერე გა̈ტ ნომა ათჩიდინენს
Line: 5 (/ ათჩიდენს). ამხენჟი ეშხუ ფაკნი ჩუ ლუწუ̂დეს ჟ'იტხახ ნაყუნჲაქ, ნამსუ̂ედს ჩუ̂ეჲნთეჲსგა ა̈გუ̂შახ,
Line: 6 ეჯის ჟი ხორკინახ ნაჭაჟი ი ჟ'ა̈ფიჲნახ. შომა ჩუ̂ეთϩნსგელიუ̂, გაგდ ჟი ენსყიუ̂, ეჩქას ჩუ̂იკადხ ი
Line: 7 ქ'ა̈დისგა̈ლიუ̂ხ მეგმემ ფაკნა̈რთე. ეჩქად ჟი ნა̈ტიხ ეშხუ ფაკნი ნაყუნს ჯიმს ი ძაფანას ხეჩმუდხ,
Line: 8 ადა̈ჲდ მალაშოლს ი ალის ა̈გუ̂შახ ნენსგაჩუ ფაკნა̈რთეჲსგა. ალი ლა̈სუ̂ ბეგენჲა̈შ ნაყუნ; ამიშ
Line: 9 ნამუნ, მა̈დო მϩცხი იროლ, მϩცხი დემის ხერენიუ̂ მარა ი უ̂ეფს აშ ითხკა. ლა̈დიშ ლადეღ ალის და̈რ
Line: 10 ა̈სყი, თხუ̂იმს დემ იწუხუ̂ა̈უ̂იხ. ჯუ̂ინელ ლეზუ̂ბა̈რს ათხე გუნ ძუ̂ირდ გარ ა̈სყიხ, ერხი-ერხი
Line: 11 ხოშოლუს ჩუჲდ ხაშყიდხ, მარე ახალგაზრდოლს დემეგ ხოხალხ ამკა̈ლიბ ლეზუ̂ბა̈რე ლისყი.

კირიშ ლისყი ("კირის კეთება")

Line: 2 ჯუ̂ინალდ შუ̂ა̈ნს კირს მა̈გ ქორს ა̈შხიუ̂. ალი მიჲ ხოჩამდ მაშყიდ. მიშგუ მაშყადობისგაჲ
Line: 3 ა̈შხიუ̂ხ კირს ი ამნოშ ილგიმალდახ. კირ ლახუ̂ა̈რს წუ̂ა, გუ̂ა̈მიდ ჯუ̂ედჲას, კოჯა̈რს ხოზ. გუ̂იშგეშმϩყ
Line: 4 კირ იმგუ̂ა წუ̂ა, ეჯი ა̈დგილს კირისოტა̈რ ხაშხა. ამხაუ̂ მასა̈რდ ხოზი ი მასა̈რდ ჭირ ხეფსი კირიშ
Line: 5 ლიკუ̂შეს ი ლიჴდეს, მარე მა̈ ჲა̈ს ხეკუ̂ეს ხოჩუ̂მინენს, იშგენ ეჯი დრეუ̂ჟი მანგუ̂ეშ ითხიუ̂, ქა ლაზ
Line: 6 დემთე ლა̈სუ̂ ი ამღა იძულებულ ლა̈სუ̂ხ ოხჭირენხ.
Line: 7 კირს ქა ხა̈კუ̂შახ (/ იკუ̂შახ) ამანალშუ̂ ი ლაღუმშუ̂, ეჩქანღუ̂ე ჟ'ანჭურახ ეძზუს, მა̈ზუ ქა
Line: 8 ეთხერიუ̂ხ ლუშნუ ქორა̈შ ლაგამდ.
Line: 9 მეზგა ლახ კირ ხად ლეჴდე ი ლეშხი, ეჩქას ქა იწონა ერუ̂ეშდ-ერუ̂ეშდიეშდ უღუ̂ა ჴა̈ნს ი მიჩა
Line: 10 მარა, ე. ი. გალდმობს იჩმუდხ. ეშხუ-ჲორი გარ მარე დემგუ̂აშ მოშ იჩმუდ. ჰამს ხეგნიუ̂ხ ქა ი
Line: 11 ნებოზს კირს სგა ჴიდახ. ეჩქანღუ̂ე ჩუ̂აქჩახ ლელკირს (/ ლა̈ლკირიაქ ზექს) მუმა̈რჯუ̂ი მაროშუ̂.
Line: 12 იმგუ̂ალეგ ჩუ̂აბϩრჯახ ხოშა ფათქს, ეჩა სგანჩუ, კϩრკა̈ნდ, ჩუ 'გამდახ ბაჩუ̂ემ ჴუ̂ილას. ეჩქანღუ̂ე
Line: 13 ჟიქაქა იბნახ კირიშ ლიგემს ი ჟიქაქა ალიმა̈გ კირს ჟი ხა̈გა̈მდახ ი ჟ'აწქურახ. ამიშ ლიშდა̈ბ გუნ
Line: 14 გარჯ ლა̈სუ̂ ღუ̂ე. ღოშგაუ̂, სგანჩუ, ეშხუ მარად ხოშა დეშ ხასკდϩნ ი ალის ჭირი მასა̈რდ ხად ი
Line: 15 ლემყა̈უ̂ი გუნ ხად, სგა ნომა ათძგუ̂ებენს (/ ათხუ̂ერენს), ეჩა. ლა̈ლკირთეჲსგა ლა̈ლმესგი ყორ
Line: 16 ხადდა. შომა კირიშ ლიგემ ქა იზგϩრიუ̂, ეჩქას ლემესგს აშუ̂ამხ. ნაგზა ლეჟა-ლექუ̂ა ხოშა კუდრა̈რს
Line: 17 ხოჩუ̂დიუ̂ხ ამთეჲსგა ი ლემესგს ჩუ დემის დიგახ. შომა კირ სგანჩუ ლიჰანდუ̂რეს იბნა, ეჩქას ღუ̂ე
Line: 18 კირ ჩუ ლϩშიხ ლა̈სუ̂ ი ლემესგს ქა ხა̈დგახ. კირიშ ბა̈ჩიშ ნა̈ყჩულს ლიცთეჲსგა ა̈დისდახ ლაკჰურად
Line: 19 ი ქა ლახ ხად, ეჩქას კირ, იმჟი ფექ, ეჯჟი ფეშგნიუ̂ ჩუ. ამნოშ ილგიმალდახ შუ̂ანა̈რ ჯუ̂ინალϩნდირ.
Line: 20 ამნოშ ლϩლგიმალე მარემიშდი ხოჩა ლა̈სუ̂: იუ̂ალადეღ სირისტს დემის იკედ ამნოშ ნაცომ ჭო̈და̈რ
Line: 21 ი ლა̈ფირუ̂ანა̈ლიდი ალი ხუღუ̂ანდხ. ერხი, ათხეჲ, ჩუ ლახ იკარქეხ კირს, ეჩქას ამნოშ ა̈ფირუ̂ა̈ნიხ
Line: 22 ქორს.

Добавлено (2007-06-26, 6:42 Pm)
---------------------------------------------
ე) ზღაპრები
Line: 1
126. უ̂ოროქალა̈ქ ("ვოროქალაქი"- ანთრ.)

Line: 2 არდა იმეგ ეშხუ ხეხუ̂-ჭა̈შ, ალა̈რს ეშხუ დინილ ხორდახ ი ბϩგიდ მა̈ჲდ ხადხ. ხეხუ̂დ ხა̈ქუ̂ე
Line: 3 ჭა̈შს:

Line: 4 -- აჩად როქ ლა̈ქმათე, ედო ჩუ როქ იდგა̈რიხ მა̈ჲდშუ̂!
Line: 5 ალ მარე ათაგან შუკუ̂ს, ესხრი, ესხრი ი ეშხუ ლუყურყუ̂აჲსგა სანაფს ხეწად ი ათხიდϩნ. სგა
Line: 6 აჩად ჰალა̈გისგა ი ჩუ̂ესგურდა სანაფ ჩუქაქა. ათხე მიჩ ხაკუ ლასგუ̂რახენქა ენხუ̂ერნე, ეჯი. ჟი
Line: 7 ლეჰუ̂აწ სანაფს ი აშხალ ჟიხი აჩად ი დეშ ეთჰიდ (/ ეთიდ), ეჩქას ჟ'ანϩგან, ჟ'იჲდ ეთჰუ̂აწ ი დეშიდ
Line: 8 ეთიდ. ეჩქანღუ̂ე ჟი ლიკა̈რჩხ ლახპირე, მარე ეშხუ მა̈ხეღუ̂აჟდ ოსჭყილ ცხეკხენქა:

Line: 9 -- ნომოღ აჩად ჟი! მიჩ როქ დინა ხორი, ეჯი მიჩ ქაოღ ლახუ̂ემ ი სამ ზაუ̂ როქ ქ'ეთხერი, ეძზუ
Line: 10 სანაფს როქ ხახუ̂რუნე. შომა როქ ჯი ანჴეს, ეჩქას დინა ქა როქოღ ლახუ̂ემ.
Line: 11 ალ მარედ ქ'ენხუ̂ერ სანაფ, ჲორი ხალთთეჲსგა ესდე ი მესმე ლაჴაფდ ლაჲრმ. ატახ ქორთე ი
Line: 12 სანფა̈რი ქორთე ანჴიდ. ქორს ქ'ოხუმბაუ̂ე მიჩა ხეხუ̂ს მა̈გ, ქა ხა̈ქუ̂ე, ერე მინე დინა როქ სამ
Line: 13 ზაუნღუ̂ე ქა ლეჰუ̂დი ხარხ ეჯინა̈რ.

Line: 14 სემი ზა̈ ქ'ეთზϩგრან ი ანჴად სემი ჩა̈ჟ ალ მეზგათე, ამფხუ̂ა̈რ ჟი ხასგურდახ, ეჯჟი. ალა̈რს
Line: 15 მეუშთხუ̂ე ჩა̈ჟ დინაშჲაქ ხეყადხ. დინა ჟ'ანმარე მიჩა დიდ: ჟ'ანრექუ̂ე, ჟ'ანϩლდესგე ი ჟ'ახსგურე
Line: 16 ჩა̈ჟს. დინა იგუ̂ნუდ: "ამფხუ̂ა̈რს როქ ოთჴერდესა"? -- მარე ეჯღა̈ჲ ეთჴერნეხ.
Line: 17 ესხრიხ, ესხრიხ ამფხუ̂ა̈რ ი ალ დინა ი ლϩც ათასდახ. ამფხუ̂ა̈რდ სგ'ათსკინეხ ლϩცთეჲსგა ი
Line: 18 მაროლდ ეთსიპანხ. ალა̈რდ დინა სგ'ეთჴერნეხ ქორთე, ქეიფ ხა̈ყერხ, მარე დინას ჭა̈შჲაქ დემეგ
Line: 19 ხოთრა. ჭა̈შჲაქს უ̂ოროქალა̈ქ ხეშხϩნ, ალი მერმე სა̈ხელმწიფოა̈რს ა̈რი ი ალა̈რ მიჩეშურ იქეიფხ
Line: 20 მიჩა ქორისგა.

Line: 21 შომა დინას ლიყუ̂ნალა̈შ დრეუ̂ ოხჴად, ეჩქას სა̈თეთრილ ცა̈ლ თეთნე ლϩჯე ლახა̈შხ. დინა
Line: 22 ჟ'ახსიპდა ი ბაჟ ოხკად. ალი ქ'ადჲეხ ლაყუ̂რათე ი ჩუ ათყუ̂ინეხ (/ ჩუ̂ათყუ̂ინეხ) უქუ̂თუნდ.
Line: 23 ისგლეთქა ანჴად უ̂ოროქალა̈ქ ი სგა ლოჰყურდა ალ სიმაქს. დინად ამიშ ლიჴედ დემეგ ეთბა̈ჟ,
Line: 24 ეჯგუ̂ა̈რ მეგჭად ხეუ̂ჟა. ნაღუ̂ჟურ ჰამს ჟიჲდ ანϩგან ი აჩად მერმე სა̈ხელმწიფოთე. ალი მაბურგა ლი
Line: 25 ი ჩითე ხოჴდენი ლეზი; შინ ხუღუ̂ა ლა̈ცხრინ ი სა̈რკ. ალი ეჯგუ̂ა̈რ მაბურგა ლი, ერე ჩის ხა̈წრე.

Line: 26 ხა̈ნუნღუ̂ე ანტახიდ უ̂ოროქალა̈ქ მიჩა ქორთე ი დინას ჩუიჲდ ხეუ̂ჟე. უ̂ოროქალა̈ქ სგაიდ
Line: 27 ლოჰყურდა მიჩა ხეხუ̂ს ი დინაშ ქა ლიჲცხუნალდ აჩადიდ მერმე სა̈ხელმწიფოთე. ამიშ ნაზუნღუ̂ე
Line: 28 დინა ჟ'ანაცხ ი მიჩა ქორთე ლიტეხ იჰერ. ანჴადხ ალა̈რ ი ჩაჟა̈რ ჟ'ანჰინგრეხ, ამფხუ̂ა̈რ ჟ'ახსგუ̂ირეხ
Line: 29 ი დინა ეთჴერნეხ მიჩა ქორთე. ალ ამფხუ̂ა̈რ უ̂ოროქალა̈ქიშ უ̂ეზრა̈რ ლა̈სუ̂ხ, ალა̈რდ დინა
Line: 30 ჩუ̂აცუ̂ირხ მიჩა დიეშმϩყ ი მუეშმϩყ ი მინ ატახხ ღოშდ.

Line: 31 დინად ლახმეშრალე მიჩა დის:

Добавлено (2007-06-26, 6:42 Pm)
---------------------------------------------
32 -- დია, მიჩ როქ დემეგ ხოთრა მიჩა ჭა̈შ ი ღანაუ̂ როქ ლი, ეჯჟი. ამჟი ი ამჟი როქ ხეჩოხ,
Line: 33 სათეთრილ ცა̈ლ ლϩჯეს როქ ხათრეხ ი ჩუ როქ აუ̂ჟუნეხ.
Line: 34 მიჩა დიდ ოსთუ̂ერ :

Line: 35 -- თეთნე კაბ როქოღ ლეჲქუ̂ე ი ეჯი სა̈თეთუ̂რილ მეჴრა ლექუ̂ა როქოღ ესგუ̂ეშ ი ბაჟ როქოღ
Line: 36 ენკიდ.

Line: 37 ანჴადხიდ ამფხუ̂ა̈რ დინაშ ლა̈ნჴრინათე ი ეთტიხხიდ ალ დინა უ̂ოროქალა̈ქიშ ქორთე. ამეჩუ
Line: 38 ადა̈ჲდ იქეიფხიდ. ლიყუ̂ნალა̈შ დრეუ̂ქა ქაჲდ ოხჴიდხ ლϩჯე სა̈თეთუ̂რილშუ̂ ი დინად, მიჩა დიდ
Line: 39 იმჟი ათშგურანე, ეჯჟი ჩუ̂ემინ: ალ ლϩჯე მეჴრა ლექუ̂ა ესგუ̂ეშ ი ბაჟ ენკიდ. დინა ჩუჲდ ატყუ̂ინეხ
Line: 40 (/ ათყუ̂ინეხ) ლაყუ̂რა ლეჟა. ამჟი ანჴად მიჩა ჭა̈შ ი სგა ლოჰყურდა. ალის ჩუ̂ეთუჟდა, ეჩქას
Line: 41 ჟ'ანϩგან დინა ი ლეტუ̂რე ანტუ̂არე, ჭა̈შ ჩუ̂ათსϩნჯაუ̂ე ი ხეწად, უ̂ოროქალა̈ქს ნანღლა̈შ ჩუქუ̂ან
Line: 42 დუენ ხორკანდა, ალ დუენს კϩლ ხა̈ბდა. დინად ჩუ̂ათკარე დუენ ი მა̈გ ქუ̂ეყანად ეთსიპან. სგ'აჩად
Line: 43 ამთეჲსგა ი ქ'ეთზელალე ქალა̈ქისგა. ქ'ანტიხიუ̂, ეჩქას უ̂ოქრეშ ჰენწიშ მϩშკიდს ეთთხანან ი
Line: 44 ლეხჭუ̂ედდა:

Line: 45 -- იშა როქ ლი ალ ჰენწ?

Line: 46 -- უ̂ოროქალა̈ქიშ როქ ხეხუ̂ ღანაუ̂ ლი ი ეჩეშჲაქ როქ ხარ, -- ლახტიხ მϩშკიდდ.

Line: 47 დინა ქ'ანტახ ეჩხენქა ი ლეტუ̂რეს ხა̈დგა, ეჯჟი ლეტუ̂რეშ ქიმ მიჩა ჭა̈შს ახბϩდ. ჯი ჩუ̂ათყურდა
Line: 48 უქუ̂თუნდ.

Line: 49 უ̂ოროქალა̈ქს ქ'ეხეჲცხϩნან ი ჩიგუ̂აშ გუდ ანჴად, ეჩქას გუ̂ა̈მიდ ენხირნან ი მიჩა უ̂აზრა̈რს
Line: 50 ხა̈ქუ̂ე:

Line: 51 -- მიჩა თერა̈რ ნომა როქოღ ხეწად ათხენღუ̂ე ალ დინას!

Line: 52 ანჴადხ ალ უ̂აზრა̈რ ი ალ დინა უ̂ოროქალა̈ქიშ ხოშა დაჩუ̂ირთე ადჲეხ (/ ეთჴერნეხ). ამნემდ
Line: 53 უ̂არია ხა̈ქუ̂ე ი მად ეთხინ; ათხე მანესგϩრი დაჩუ̂ირთე ადჲეხ ი ამნემდი მად ეთხინ; ეჩქანღუ̂ე
Line: 54 მაჰრენე დაჩუ̂ირთე ადჲეხ, ეჯინემდ სგ'ეთხინ. ამეჩუ ალი ჩუ̂ა̈დღუ̂აჟან ი ნაღუ̂ჟურ ანთაუ̂ე. ალ
Line: 55 ნაღუ̂ჟურსი მაბურგა ეხფას მიჩო მუეშშალ ი ალიჲ იზელალ ლაბურგალთე. აშხუ̂ ა̈დგის, ალ
Line: 56 ბეფშუ̂ს, ხებურგალ ეშხუ მარე, ჩიქი ეშხუ ენდე, ღუ̂ე -- მერმე ი მესმაჟი ხა̈ქუ̂ე:

Line: 57 -- ეთყაჩოღ, ედო უ̂ოროქალა̈ქიშ თერაღო ჟი როქ ხა̈ბჭკუ̂ე!

Line: 58 ალი ქ'ეთყაჩ ტკისდ ი ანჴად ქორთე. ლეხჭუ̂ედდა მიჩა უ̂აზრა̈რს:

Line: 59 -- მიჩა როქ ხეხუ̂ იმთე ოთგენახ?

Line: 60 -- იმთე ი, ხოშა როქ დაჩუ̂ირთე ოდჲახ ი დემე როქ ოთხϩნა; ნენსგა̈შთე როქ ოდჲახ ი დეჲ

Line: 63 უ̂ოროქალა̈ქ აჩად მიჩა ხოხრა დაჩუ̂ირთე ი ამეჩუ ქა ხეწად მიჩა ხეხუ̂ს ი გეზალს. მიჩა
Line: 64 დაჩუ̂ირს ლეხჭუ̂ედიუ̂:

Line: 65 -- ლა̈ცხრინ როქ ხოცხა ჲა სა̈რკ?

Line: 66 დაჩუ̂ირდ დეხდა ლეჲკუდნე ი ხა̈ქუ̂ე:

Line: 67 -- ალა̈რს როქოღ ლოხსგიდიუ̂ ი მიჩ როქ დეხდა ხაკუ.

Line: 68 უ̂ოროქალა̈ქდ ქორთე ეთტიხ მიჩა ხეხუ̂ ი გეზალ ი ხოჩა ლირდე ეთჴიდხ.

Line: 69 უ̂ოდე ეჯა̈რს ლეწედ, ეჩქადოღ ლა̈რიდ!
ვ) ხალხური სიმღერები

Text: A
Line: 1
თამარ დედფა̈ლ ("თამარ დედოფალი")

Line: 2 თამარ დედფა̈ლ ანიუ̂ა სგუ̂ეჯდა,
Line: 3 ჩა̈ჟილდ ხორდა ქუ̂იშემ ფერიშ,
Line: 4 ჰინგრილ ხაგან ოქრეშ ლϩშკა̈დ,
Line: 5 ა̈ღუ̂რილ ხოსდა უ̂არჩხლიშ ლϩშკა̈დ,
Line: 6 ფაყულდ ხაგან ზურეჩია,
Line: 7 ფათუ̂ა̈რ ხაგან ყალყმიშ,
Line: 8 ნექჭა̈რ ხაგან წაწიკუ̂ეტიშ,
Line: 9 შდϩქა̈რ ხაგან მარგალიტიშ,
Line: 10 სგაშხენ ხა̈ქუ̂და ატილასი,
Line: 11 ქა̈მშხენ ხაქუდ ჰა̈ბიჯარი,
Line: 12 ჩაფლა̈რ ხა̈სდა პოლიასკები.

Line: 13
მთქმელი აბაშხა გოშუანი (78 წლისა)

Добавлено (2007-06-26, 6:43 Pm)
---------------------------------------------
ნასლეთილ ("ნასლეთილი")

Line: 2 მარო საბრალ, მარო ლეჟრი,
Line: 3 მარო იალე!
Line: 4 დიმთილ-მიმთილს დემ ლა̈ხერა,
Line: 5 მარო იალე!
Line: 6 მϩწსი ლენჴა̈დ ნასლეთილხენ,
Line: 7 მϩწსი ლენჴა̈დ ნა̈საულა,
Line: 8 მარო იალე!

Line: 9
მთქმელი ნესტორ ჩხვიმიანი (80 წლისა)

ზ) სვანური ლექსები
Line: 1
უშბა

Line: 2 შუ̂ა̈ნს ნენსგაჩუ უშბა ხოყირ,
Line: 3 ჩიგარ უსპა, მეგჭე ნაბა̈შ.
Line: 4 ხორი ამის ობა̈შ მოსისგ,
Line: 5 დამბა̈ლ ჭუქუ̂ა̈რ მოშ-მოშ ჰაბა̈შ.

Line: 6 დამბა̈ლ ჭუქუ̂ა̈რ აშგარ ხეღუ̂ეშგხ,
Line: 7 ხახა̈რბხ ნახუ̂ჩი ი ნაკლა̈თხი,
Line: 8 ინჩლიხ: უშბაშ ნა̈მსგიდინ ნა̈
Line: 9 და̈ს ხუ̂აშყიდდ ი უ̂ენდ ნარ ლა̈თხი.

Line: 10 ამიშ თუ̂ალ ი დიდებულობ
Line: 11 კავკასს კϩრკა̈ნდ ქა მეკუ̂ჰე ლი.
Line: 12 ისგანჩუშ ი ჯუ̂ედჲაშ მეჴედ
Line: 13 მა̈გ აშთე ლაზს ხეკუ̂ჰენი.

Line: 14 უშბა დიდა̈რდ იჰუ̂ნა̈რი,
Line: 15 ხესმი ფაშდ ი ჩიმი რაგა̈დ,
Line: 16 მიჩეშდ დამბლუ მა̈გ იმშერალხ,
Line: 17 მა̈გ მიჩ აფშუ̂დი, ნა̈ მა̈ გუ̂აგა̈დ?

Line: 18 უცხ მეჴედს ჩი ანტყოუ̂ნე
Line: 19 შუ̂ანეშ ფუსდ დიდა̈რ უშბა,
Line: 20 ჩიმი თერრე მუმურშხუ̂ა̈ლი,
Line: 21 ლინთუ̂ ი ზაუ̂ ჩიგარ უჩუ̂ფა.

Line: 22 ჲა̈ს მადე ხერდნინი
Line: 23 ძუ̂ირფა̈ს უშბაშ ხუნრე ფედჲას,
Line: 24 ეჩა გორგდა̈ ღუ̂აშრე მუჭრე მეწედ
Line: 25 გუ̂ი ლაგულს ხედი ჲა̈ს?

Line: 26 ლემხეღუ̂აჟა ტა̈კდ მეჴდე ხარხ
Line: 27 კინჩხ უნიკუ̂ა უშბაშ ლიმშგუ̂ა̈რ,
Line: 28 მარე უშბა, დიდა̈რ გუმი,
Line: 29 ამ მეფშდელას იყჩე ქიმშუ̂ გარ.

Line: 30 ლიმაჩ-ლიღუ̂აჟ აშხუდ ხოყდანა,
Line: 31 ჩიგარ მუგუდ ლϩჴმა̈შ ჰა̈ბ ხა̈ზ.
Line: 32 ლϩჴმა̈შ ლი ი მა̈გ ხა̈მედა,
Line: 33 მა̈ ხეკუ̂დენი, ჴამშა ბარჯს ხა̈ზ.

Line: 34
1922 წ., სოფ. ფარი,
Line: 35
ნესტორ მიქიანი.

Добавлено (2007-06-26, 6:44 Pm)
---------------------------------------------
Text: B
Line: 1
მეთხუ̂ა̈რ ("მონადირე")

Line: 2 მაკლათხე ჭუქუ̂ა̈შ თხუმჟი
Line: 3 ჩუ სგურ ი თელ შუ̂ა̈ნს აშ ხუ̂ა̈შგა.
Line: 4 ხოსგდი ლახუ̂ა̈რს ლϩფანთუნა,
Line: 5 ხჲა̈რ ღეთ მიკდენი ბაჟ ქა.

Line: 6 ამხენქა მი ჩი აშ ხოსგდი,
Line: 7 მიჭიმ კϩრკა̈ნდ თე მეგრა შუ̂ა̈ნდ,
Line: 8 ბიქუ̂ს შდϩმრა̈რქა ჭულ-ჭულ ჩუ ხოგ,
Line: 9 დემ დრეუ̂ს ხოგა̈დ მოლე ამაშუ̂ა̈მდ.

Line: 10 ეჩეგ-ამეგ მϩცხიდ შყედნი
Line: 11 ჭუქუ̂რე მϩკეთ ჟუ̂ა̈ნიშ ჭოჭქა,
Line: 12 ლალთოღ აფხნეგა̈რს ხეყϩლალ,
Line: 13 ისგიდა̈რი კϩლთხი კოჯქა.

Line: 14 ხოსგდი ლϩცრე დია-ბუას,
Line: 15 მესმი თეთნა ლϩცრე ჟურთქუნ,
Line: 16 დეცხენჩუშ შალ კϩლთხიდ შყედნიხ,
Line: 17 ჩუქა კϩნჯბა̈რჟი ხარხ ბურთქუნ.

Line: 18 ხანსრა̈რ მინე თეთნა სა̈რკა̈რშუ̂
Line: 19 ჯუ̂ედჲად მიმურშხუ̂ა̈ლიხ თერა̈რს.
Line: 20 ჩუ ხარხ უქუ̂იცდ ტურშუნ-ბურგუნ,
Line: 21 ლასსგა̈რდ იცადუნეხ ჰერა̈რს.

Line: 22 ხუ̂ასϩნჯა̈უ̂ი ჯუ̂ედჲათე
Line: 23 ათა̈ს შუ̂იმიშ ნახუ̂წი ტუბა̈რს,
Line: 24 ხოშა კϩლთხი საუ̂ა̈ტ კϩნჯბა̈რს,
Line: 25 მანჩხაფ ლϩცემ პერიშ ლობა̈რს.

Line: 26 ნენსგალექუ̂ა, უ̂არჩხლიშ თა̈კუ̂შალ,
Line: 27 აშ იგუ̂რიზელხ თეთნე ჭალოლ.
Line: 28 ეჩხენ-ამხენ აშიდბუნეხ
Line: 29 ჲϩრჟიდ ლϩრექუ̂ ჯუ̂ედი ლაროლ.

Line: 30 კϩრკა̈ნდ ლაკუ̂ცურჲა̈რ ხაცხიპხ
Line: 31 ნახუ̂წი ღარა̈რშუ̂ უშხუ̂არ ლϩჭა̈რ.
Line: 32 ეჩეგ-ამეგ იყუ̂იბანელხ
Line: 33 მინე ლერდი ღუ̂აშრე მუჭა̈რ.

Line: 34 სუ̂ანთალ მუღუ̂ა, ხუ̂ასϩნჯა̈უ̂ი,
Line: 35 ჲარ ღეთ ა̈დგილს ბა̈რგს ოხუ̂ა̈რკ თე,
Line: 36 ლალთოღ მარემ ქუ̂ინ ლϩყირ ხადხ,
Line: 37 მეშყდე ლიხ მა̈გ მასა̈რდ უ̂ა̈რკთე.

Line: 38 წესდ გუ̂ი ლოხო ი შიშდ ქა ხუ̂ეწდ,
Line: 39 აშხუ̂ ბა̈რგს აფხნეგ ისგა ხაჴუ̂ისგ,
Line: 40 ეშხუ მა̈ნკუშ ტარხანს ხეკარქ,
Line: 41 მერმოლუდ ღოშგიმხენ ხარ ყუ̂ისგ.

Line: 42 ესნა̈რილდა̈შ ჟიქამშხენჩუ
Line: 43 ამ ბა̈რგს მეთხუ̂ა̈რ და̈შდუ̂ი ხენცუ̂ლალ,
Line: 44 მარე ათხე თეფიშ მაყალშუ̂
Line: 45 დეჲ მიჩ ხა̈ხუ̂იდ ჩუ ლილენცლალ.

Line: 46 ნებოზს სადგემ ლϩხჲად ემხუ̂იდ,
Line: 47 ნეპოლ ლესკრიშ ლანყას მესგუ̂რე,
Line: 48 ყუ̂იჟე-პერშუ̂და მϩტყა̈ბ ხოჭიდ,
Line: 49 ჩიგარ ხონკი შამფირდ ლესგუ̂რე.

Line: 50 აფხნეგს სეუ̂ ი ჰაჯ ოხმეზირ,
Line: 51 ათხე მაფაშ მია̈ჲ ჩუ̂ა̈მშϩდ.
Line: 52 ლესკა̈რ-ყუ̂იჟე ჟი ლოხმეზრედ
Line: 53 ი ეჩქანღუ̂ე შაქა̈რდ ა̈ნჩϩდ.

Line: 54
1923 წ., სოფ. ფარი,
Line: 55
ნესტორ მიქიანი.

(ტექსტები ჩაწერა ივანე ჯავახიშვილის სახელობის თბილისის სახელმწიფო
უნივერსიტეტის სოხუმის ფილიალის დოცენტმა ქეთევან მარგიანმა)

Text: 1
Line: 1
1. მიშგუ სოფელ ი ლახუ̂ა̈რ ("ჩემი სოფელი და მთები")

Line: 2 მიშგუ სოფელს ომარიშა̈ლ ხაჲჟხა. მერმანა̈ჲრდ ჲალცუნე̄სგასი ხუ̂ატუ̄ლიდ. ალ'ე̄ჯღ'ე̄რე ეჩხა̈ნ-
Line: 3 ამხა̈ნჩუ იორი ლიც, იორი ჭალა̈ჲ ოხო̄ზი -- საკნარაჲ გუ̂ანდრალა.
Line: 4 ჲალცუნე̄სგას გუნ ხოჩა მდებარეობ ხუღა. გირკიდ მთლიანდ ცხიკა̈რ ხაცხიპ. ხოშა მϩნწირდ
Line: 5 ცხიკარ ლიხ წიფრა̄̈შ, ლეწფერა̄̈ლ; რიყა̈ლ ლექუ̂ა ლებϩლყაჩაჲ ხა̄̈მთქუ̂ა.
Line: 6 ფე̄დის ნა̄რ ლახუ̂ა̈რ: ღუ̂აღუ̂ა, აჭაფარა, ნა̈მშიხუ̂, ჩანთა̄̈ ლახუ̂, ობურღუ̂ან, მერმე ღუ̂აღუ̂ა,
Line: 7 გუ̂ანდრა̄̈ ლახუ̂, კლუხორი თანღი ლახუ̂არი̄.

Line: 8 ამჟი გარ მიხაჲ მაბჟ'ერე, მიშგუ სოფელთან ჰაერ დემე ა̈რი. ამე უშხუ̂ა̄რ ხა̄რ ლუპურტი̄ნე
Line: 9 ლახუ̂აშ, ჭალიშ, ლეგგϩბი̄შ ი ძუღუ̂ანეშ ნაჰა̈უ̂ აშ მϩცϩრცხϩნი ჰაერა̄̈ლ.
Line: 10 სოფელისგა ათხე ხუ̂იზგედ არა̄̈შდ მეზგე. ათხე ნაშიალუნღო დროუ̂ა̄̈ლ ჟ'ანცადუნა̄̈ნხ, ადო
Line: 11 ეჩქად ნიშგუ̂ეჲთან ლისუ̂ფა̈ლ ჩუ და̄̈ს ხა̄რა.

Line: 12 სოფელისგა ჩი მეზგა ნირი ქუ̂ილϩმგენა̄̈ლ: ჴანა̈რ, ფურა̄̈ლ, ხაბნა̈რ, დეკაუ̂ლა̈რ, ღუნუ̂ა̈რ,
Line: 13 ჲერხის დაჴა̈რი ხორიხ.

Line: 14 დაჴრე პატრონა̈ლს ხერა̈ს ხა̄რხ მϩსყე ი ამჟი ხელდეღხ. ჭირ ხუ̂ა̈ჲ ხაკუხ, მარე ლინთუ̂ისგა
Line: 15 ხოჩილ ლეჩფე ლიხ, კუაფხილდა̈რშუ̂ ი წყიუ̂შუ̂ გარ ი ჟი იმა̈რგხ, თან ლϩჯე მასა̈რდ მა̈რგებელ
Line: 16 ხა̄რხ ი ამღა, ეჯ მეზგა̈ლს, ერუ̂ა̈ს ხუ̂ა̈ჲ ლა̈ჭმა̄̈ლ მამ ხუღუ̂ახ, ხოცხახ დაჴრე ლირდუ̂ნე.
Line: 17 ზაუ̂ ლადეღ ჩის ლახუ̂ა̈რთე ენყა იორი-სე̄მი თუ̂ეს; ეჩე ჩუ ხუ̂იკრა̈უ̂იდ ხოშილ ნაკ
Line: 18 ა̈დგილა̈რისგა, მე̄შგა̈რს ჩუ ხუ̂იცუ̂რედ, ყϩსრა̈ლს ქა ხუ̂აგნედ ლაყსϩრა̈ლთე ი ეჩქანღო ნაგზაჲსგა
Line: 19 იორინ ჟი ხუ̂იწუ̂ენედ ი ჩუჲ ხუ̂აჯმუნედ. ზაუ̂ ლადეღ განსაკუთრებით მამ ხაყა ქუ̂ილϩმგენეს
Line: 20 უჯმუნად.

Line: 21 ლაყსϩრა̈ლს ხშირდ იმცო̈ლიხ კუმა̈შ; ჲედ დე̄რა ხოძგუ̂ბენიხ, ჲედ ლაშყა̈დ ადგილა̈რქა ქა
Line: 22 შყედნიხ, ჲედ ნა̈დირ ხოშგიბ -- დაშუ̂დ -- ი ფორეცხ, ი ჩუ აგლϩ̄რეხ.
Line: 23 ნიშგუ̂ეჲ ლახუ̂ს აჭაფარა ხაჲჟხა. მთელ ლილხუ̂ა̈რიელისგა სამინ ხუ̂იცადუნედ ადგილს --
Line: 24 ჩუბე ლახუ̂ს, ჟიბე ლახუ̂ს ი ნე̄სგა ლახულდა̈რს. ლა̄შგ მაჩენე ჟიბე ლახუ̂ს ლი, ეჯღ' ერე ეჩე ჩია̈გ
Line: 25 მაჩხფა̈რ ი ლϩლჰნა̈რ ადგფუნეხ. საერთოდ, აჭაფარა̈ ჟიბე ლახუ̂თან ი ლაყსϩრთან ლესგდი
Line: 26 მამგუ̂ეშ ირდი ჩუ. გირკიდ მთლიანდ კოჯა̈რ ხაცხიპ. ტურისტა̈ლი ხუ̂ა̈ჲნ ანღრიხ; ჴარჴϩლდ მϩრა̈მ
Line: 27 ხა̄რ, დომბაჲთე ქა ლა̄ზ ი სე̄რ კარაუ̂ხა̈ნქა ნა̈ჲ ბოფშარ ი ზურლა̈რ მეჰად ხოსთა̈ლიდ, იმჟი
Line: 28 იცო̄ნგა̈ლხ ეჯ საუ̂ა̈ტ კოჯა̈რლექუ̂ა ი ხანსრა̈ლლექუ̂ა მეთხუ̂ჲარა ი მეზელა̄ლა.
Line: 29 ჟიბე ლახუ̂ს ქა გუ̂ეში ლი ხანსრა̈ლდ ი უ̂ოლა̈რდ -- იუ̂ალა̈დღი უჰნა კუ̂არმა̈ლდ; ჩია̈გ ხა̄̈ზ
Line: 30 დე̄რა̄̈ლ; ხოშა დე̄რას ხუ̂ატუ̄ლიდ, ეჩი ნაჯუ̂დი ი ნამშა̈რი კილომეტრ უ̂ეთ ჩუ ირა. დერა̄̈ლ ხა̄̈ზ

Добавлено (2007-06-26, 6:45 Pm)
---------------------------------------------
31 ჭალა̈ჲქაჲ. ი ლაზელა̄ლდ მოკლედ ალ მუსი ბოგა̈რ ნუღუ̂ა. მარე ეჯგუ̂ა̈ჲ ამახუ̂ს, ჩუ ჰე̄სა ეჯძგუ̂ებნი,
Line: 32 ქუ̂ინ ჲედ ეჯსედნი ი ჲედ მა̄მა. აშხუ̂ინ, მაშყიდ, ეჩქა მეხუთე კლასისგა გარ ხუ̂არდა̈ს, ლე̄შგიდ
Line: 33 მეყა̄̈ნდა იეშდთეჟი ფუ̂ირ, ნიშგუ̂ეჲ ი მიშგუ ბიძა̈ჲშ. ეჩი ფურა̈ლ საარიკო ლϩჭა̈თ მირ ლა̈სუ̂ხ, გუ̈ს
Line: 34 ჩუ მიხპახ. ეშხუ ნაბოზს ქა მა̄დ ა̈მჩა̈და ეჩხა̈ნთე. გირკიდ ლი̄ზი ამმა̈ჭრϩნ, იბუ̂რა̈ლდა, ი
Line: 35 ლაფϩრღϩნოშ ქა ღალ ოთა̈გნ კარუ̂ალ ჩუქუ̂ანა̈ დე̄რაქა, ეჯა უკვე მასა̈რდ ლϩდთხელე ლა̈სუ̂ ი ამღა
Line: 36 ხუ̂ერი̄ლა̈ლდ ეჩექა ლიზელა̈ლს. თანაც გუნ ბϩგიდ ანღრი ეჩექა ჭალა̈ჲ ი მა̈ზნაჲ მასა̈რ ხუ̂აჲ ლი
Line: 37 დერემიშ ი ჭალი ნე̄სგა, ეშხუ ერუ̂ეშდ მეტრა ეჯღაჲ. ლაშგალ ვედროლ ი ფაულდ ღალ ტუ̂ეტისგა
Line: 38 მუღუ̂ან ი ამჟი ლაფონცალოშ ქაჲ ოთა̈გნ. ღერბათხა̈ნქა მამ მϩრეს ხუ̂ას ლϩსერ ი რაღაც
Line: 39 წა̈მილდა̈რისგა გადავრჩი. ქა უჰა მად ეჩხე̄ პილდ, ი დერაჲ ჩუ ამძგუ̂ა̈ბ. ეჯკა̈ლი ჰერ ჟ'ა̈ნკიდ, ერე
Line: 40 კოჯა̈რდ მა̄ნგა ლახტიხხ. მაყალხა̈ნქაჲ მა̈ხჲადხა̈ნქა ტან ი ტუფდ უშხუდ ამბინე ლირკუნე. მიშგუ
Line: 41 ხოხრა ჯϩმლიდ ეჩქა კლასთეჲ მამ იზელალ, უსგუ̂ა ლϩზილ დეშ ლა̈სუ̂; მარე ლაკუ̂მაშა̈ლს, ზექ
Line: 42 ლამარას მეჰად სგა მინჴერდა. ალას ერ ქა მეწა̈დ, მა̈ხჲადშუ̂ იმ ღალ დო იჩოდა, მამ ხოხალდა. მი
Line: 43 ქა ლიკუ̂შეჲ მა̄მ მიპირა̄̈ნ, მარე ლაშად ქ'ოხომბუ̂ე მიშგუ დისიმუს ი ქორთე ჰალ ონტა̈ხდ, ლიმზირ
Line: 44 აჩუ̂მინხ. აჭაფარა̈ საუ̂დ ამჟი ღალ ლა̈მსა̈და. ეჩქანღო შუკუ̂არი მირ ჟ'ანჟომანხ ი დე̄სა მი̄ზნა.
Line: 45 მაშენე ეჯღაჲ მაჩხფა̈რდ მა̈წდუნი. ო, მაჲ ლესგდი მირ ლა̈სუ̂ ამზუმა̈ში კოჯქა ალ ნაკლა̈თხიჟი
Line: 46 ამზუმა̈ში ტუ̂იბრა ერ ა̈სკინა. ღო ჰერ ხუღუ̂ა ეჯზუმ, მოგდა̈ჲ ეშ მირ დგურფნი. გირკიდ, კოჯა̈რქა
Line: 47 აჯაღ ფიშირ ადგილა̈რლექუ̂ა ხორიკ ეშ უ̂ოლრე ნა̈ჰინ ლიცϩლდა̈რ, მაჩხფა̈რი ფიშირ ა̈გის ლიხ,
Line: 48 მარე მაჩენე ეჯღაჲ ალ მაჩხაფ ლი, კარუ̂ა̈ლ ჟიქანა̈შ.
Line: 49 კარუ̂ალხა̈ნქა ლაკუ̂ცირა̄̈ლი ქა თერახ. მაკლათხე ლი ემზა̈ ლაკუ̂ცი̄რ. თეს ჟი უ̂ენდ გარ
Line: 50 ხაჰალუ̂ნე მა̄რე. ემზა გუნ ხოჩა მეთხუ̂ა̈რ მირ ლϩმა̈რ, ი აშხუ ლი̄ზიჟი გარ ოთდაგრა იშგუ̂იდ
Line: 51 კუ̂იცრა.

Line: 52 ნიშგუ̂ეჲ ლახუ̂ს მიშგუ ლიბოფშქა სე̄მი კარუ̂ულ გარ ლϩგდა, ეჯღ'ერე, ხოშა მϩნწირდ კოჯა̈რ ი
Line: 53 ლაკუ̂ცირა̈ლ ლიხ, ლაჩხუ̂ა̈რ ხოხრა გარ. ერხი ლახუ̂ა̈რს: ღუ̂აღუ̂ას, ჰარუ̂ას, გუ̂ანდრა ლახუ̂ს
Line: 54 ხუ̂ა̈ჲ ალხუ̂ა̈რი.

Line: 55 კარუ̂ალ, ხოშა მϩნწირდ, ზექიშ ლიხ, მარე აჭაფარას ეჯაჲ ძუ̂ირ ნა̄დ, ი ამღა ბა̈ჩა̈ კარუ̂ა̈რ
Line: 56 ნიგდა.

Line: 57 კარაუ̂ისგა ნუღა ლა̄შგ-ლაყელი შედმაკუ̂ედ (/ შედ-ნაშედ) ი ლოგინა̈რ. ლა̄შგ-ლაყელს გუნ სა̈ხს
Line: 58 ლიხუ̂ე ი გუნ სუფთად ლიზნა̈ნი ხაკუ.

Line: 59 მთაუ̂ა̈რ ლი ხოჩა ლალდϩ̄რ. ეჯ ე̄სა ოდნაუ̂ ჩუ ლა̈ჯლა̄̈ჰი, ჲედ ჩუ̂აჯფაჭუ̂ი, მეჩდე ლი ლაშგ-
Line: 60 ლაყელი გუ̂ეშ. ლალდϩ̄რ დემ აყე̄ლი, ლახე ნა̈ფდიას იმუ̂ალე მებუ̂ილ ა̈რი, ამღა კარაუ̂ გირკიდ

Добавлено (2007-06-26, 6:45 Pm)
---------------------------------------------
61 ხუ̂ა̈ჲნ ხუ̂ალმესგა̈რიდ.

Line: 62 ლალდϩრთესგა მეჰად ხაკუ ლიქმე ლალდϩრა̈ ბალა̈რს ი ნაწრექს. ბალა̈რდ ხამრას
Line: 63 ხუ̂ერი̄და̄̈ლდ, ეჯღ'ერე ლϩთა̈შ ლემზϩრლე ლანყაჟი ლიმზირ როქ ჩუ ნო̄სა აგუ̂დაუ̂შას.
Line: 64 ლალდϩრა ბალა̈რდ მაჩენე ლი ლϩჴ, ხოჩა̄მდ ჟი მϩსყე: ღუნიშ, ნეღშტϩლა̈შ, ჟინღϩლა̈შ, მადეჲ
Line: 65 მაგრი დი̄რ.

Line: 66 ლალდϩრთესგა ჩი ლადეღ ხაკუ ლიქმე ნაწრექს. ნაწრექდ ქიუ̂ი ნაკუ̂ა̈თხ ხოლა ლი, ეჯღ'ე̄რე
Line: 67 ბალა̈რს ხუნკუ̂იდ ქუ̂ირე. ხუ̂ასყენედ ალას ამჟა: ლიფუ̈ნალე პილთე შუ̂ელთესგა სგა ხუ̂ახპედ
Line: 68 ლϩგრეს ი ეზა̈რ ხა̈ნს ხუ̂ანკუ̂შდედ. ჩუ ლუქუ̂ელანღო ქა ხუ̂აწუ̂დედ, ნაღებს ჟი ხოკედდ, ჯიმს
Line: 69 ხუ̂ა̈შდედ ი ამჟი ჩუ ხუ̈ϩგემდ ლალდϩრთესგა ლექმად.

Line: 70 ჩუ ნა̄შგალუნღო ლϩჯე ხეკუ̂ეს უცეფდ ჩუ̂ა̈დწოდე̄ნს ლაწუ̂და̈რჩუ. ლაუ̂დინად მეჰად ჩუ̂ენი
Line: 71 ხოჩა, ეჩხაუ̂თე̄სგა სგა ხუ̂აჩოდ ჲორი-სემი კათხ ლალდϩრს ი სარხელშუ̂ ხოჩამდ ჟი ხუ̂არხიდ. ჩუ
Line: 72 ლϩლფა̈რს ხოჩა ტებდი ა̈დგილს ჩუ ხუ̂ϩგემდ. ხოჩა ლალდϩრ ეშხუ ხϩნსგა საათისგა ჩუ̂ა̈უ̂დინე.
Line: 73 უ̂იდს ჟი ხუ̂ϩგემდ ლემასგუ̂თეჟი, ჟი ხუ̂არხიდ, ჰალ იტბიდი, თანდათან იყლუ̄რი თა̈შ ი შუ̂ელ.
Line: 74 ტუ̂ეტ ხეკუ̂ეს სგა̄̈ნჩუ ჯუღუ̂ენს ი თანდათან ხაყუ̂ბე̄დ თა̈შს უშხუ̂ართე.
Line: 75 ალა ჩიქე თოთ გარ ლი. თოთ გუნ ხოჩა ლი თე̄რლე მაზიგჟი ჟი ლადა̈სგდ, ლϩქა̈ჩჟი ზისხი
Line: 76 მϩჩრაუ̂დი. აშ ლეზობდი გუნ ხოჩა გემაშ ლი. თოთს ტოტა̈რშუ̂ ხუ̂აჭϩხედ, ხოთლϩრედ ი ეჩქანღო
Line: 77 სგა ხუდიდ ზერდთე̄სგა. ეჯა წექუ̂ე მთელ ლადეღ. ხოჩა დარა̈ლჟი ჰამა̈ ქიუ̂ს ნაბოზს უკუ̂ე ჩუ ხაყა
Line: 78 ლესϩლგϩნიდ.

Line: 79 ლასϩლგინჟი მთაუ̂არ ლი თა̈შ ხოჩა მϩჰი ლესუ̂ ი ქა იდუ̄წოლდეს. ადო ეჯურ ჩუ ლიქუ̂ეშ
Line: 80 ხა̈მთქუ̂ა.

Line: 81 ხოჩამდ მϩჰი ქიუ̂ს ჩუ ხუ̂ახტურედ ნაჯუ̂დაჟი ი სგა შუ̂იდედ მამფუა ლიცთესგა. კიზშუ̂ ხუ̂ა̈ჲ
Line: 82 ხა̈ნს ხუ̂აზილაუ̂იდ, ეჩქანღო ქა ხუ̂იტხედ გუ̂ებილდთეჲსგა, მა̈ჲ ქა ხუ̂აპტყϩნედ, მა̈ჲ ქა
Line: 83 ხუ̂აკუ̂შდენიდ, უ̂ეშგიმპილს ჟი ლუმურგუ̂ალეს ხოჩა თუ̂ალა̈შდ კირკატუს ქა ხუ̂აქუ̂ცედ ი ისგა
Line: 84 ხუდიდ ჩიქე მϩცხი ლიცთე ჲედ წა̈თხთე, ეჩქანღო კალპეტთეჲსგა, ი ჯიმϩლდს ხუ̂აპსუნედ.
Line: 85 სϩლგინს ნა̈ბოზს მადეჲ მერმა ლადეღ უკუ̂ე ჩუ ხაყა ლეზობდი ი ლეშხუ̂ნიდიი. სϩლგინ ხოჩა
Line: 86 მϩსყე წა̈თხისგა ხადურ ხუ̂ა̈ჲ ხა̈ნს გეჭნი, მთელი ზაჲსი უ̂ეთ. მადეჲ ქა ხუ̂აფრედ, ჲედ ჩუ
Line: 87 ხუ̂აკმუნედ. ლაკუ̂მუნა̄̈რ სპეციალურდ ნა̄რ მϩსყე. ლაკმუნაჟი მაჩენე ნახა̈რხუ̂ ლი, ეჯაჲ ბალყჩიშ.
Line: 88 ლიკმუნე ხაკუ ჲორი-სემი ლადეღს.

Line: 89 ნაყალუნღო შუ̂ელ ჩუ სედნი ჩუ̂ენიისგა, ეჯას ჲედ ხამა̈რს ხოგუ̂შედ, ჲედ ჟი ხუ̂აფუ̄̈ნედ. შუ̂ელს
Line: 90 ნაღებს ხოკედდ, ეჩას ჟი ხუ̂აყუ̂ბედ, ეჩქანღო ქა ხუ̂აკრაქიდ.
Line: 91 ტულიხ, ერე შუ̂ელ ესერ უფუ̈ნადი გუნ ხოჩა ხარ მარა, ჭინჭლა̈რს ი საერთოდ ორგანიზმს.
Line: 92 ჰა̈ბს, აჯაღ იშგენ მოლა̈ლს.

Line: 93 ამჟი ლი ლაშგ-ლაყელია̈შ ი ლილხუ̂ა̈რია̈ გუ̂ეშა̈რ დალისგა.

Line: 94
მთქმელი მარიამ მარგიანი (27 წლისა),
Line: 95
სოფ. ომარიშალი.

Добавлено (2007-06-26, 6:45 Pm)
---------------------------------------------
2. ლუსო̄ყე მა̄რი̄ლ ("გადარეული კაცუნა")

Line: 2 ლა̈სუ̂და ეშხუ ლუსო̄ყე მა̄რი̄ლ; აშხუ̂ ლადეღ ანღϩრდა შუკუ̂ჟი ი ჰა̈ზუ̂თე̄სგა ხეწა̈დ, ზურა̄ლ
Line: 3 ღულია̄ქს ა̈ფშუ̂და. ქა̄ჩა̈დ ი ხა̄̈ქუ̂ე:

Line: 4 -- ამზაუ̂ ეშხუ ღულიაქს ხა̈ფშუ̂დე, მარე ზაუდ ეშდიორი ჟეღუ̂ ა̈ჯფოშდა.
Line: 5 ზურალდ ლახტიხ:

Line: 6 -- სი ლუსო̄ყე მა̄რე, ალა იმღა მე̄ქა!

Line: 7 -- აღო, მა̈ჲუ ჯე̄ქა?

Line: 8 -- მა̈ჲ ი ეჯაუ̂ მე̄ქე̄, ამზაუ̂ ეშხუ ღულია̄ქს ხა̈ფშუ̂დე, მარე ზაუ̂დ ეშდიორუუ̂ ა̈ჯფოშდა.
Line: 9 ალას ესერ მერმაჟი̄ნა̈შდ ჩუ̂ა̈დნა̈ცხი, -- ადჭკუ̄რე ლუსო̄ყილდ.
Line: 10 ალ ამბა̈უნღო ხა̈ნ ი დუ̂რეუ̂ აჩა̈დ ი ლუსო̄ყილ ქა̄დ ათაგა̈ნ შუკს. სგა ლახხუ̂იდახ შუკს მე̄ზა
Line: 11 ჭირსუფლა̈რს ახყა̈ნხ ლϩდგა̈რ.

Line: 12 ქა̄ჩა̈დ ლϩსოყი̄ლ ი ხა̈ქუ̂ე:

Line: 13 -- ამზაუ̂ ესერ ეშხუ გარ ახყახ, მარე ზაუდ ესერ ეშდიორიუ̂ ახყახ.

Line: 14 -- ჯა ლუსოყე, ალა იმღა ხო̄ქუ̂ა.

Line: 15 მარილ ჩუ̂ადϩმბაჟან:

Line: 16 -- აღო, მა̈ჲუუ̂ ესერ ხო̄ქუ̂ა̈ნ?

Line: 17 -- მა̈ჲ ი, ქაუ̂ აჩა̈დ, ლიტენტა̈ლუ̂ ა̈დბინე, შაუ̂ ესერუ ხა̈ქუ̂ახ, ალა მა̈ჲ ესერ დრუ̂ეუ̂ მირ
Line: 18 ახჰე̄ნახ.

Line: 19 -- ალე̄სერ მერმა̈შჟინა̈შდ ჩუ ხეხლი, -- ლა̈ქუ̂ე ლუსო̄ყილდ ი ქა̄დ ათაგა̈ნ შუკს. ხანი-
Line: 20 დრუ̂ეუნღონ სგა ლახხუ̂იდახ მექურწილა. ქა̄ჩა̈დ ლუსოყილ, ადბინე ხოლაგუ̂ა̈რი ლიტენტა̈ლ ი
Line: 21 ლალჭალოშ ხა̈ქუ̂ე:

Line: 22 -- შაუ̂ ესერუ ხა̈ქუ̂ახ, მა̈ჲ ესერ მირ დუ̂რეუ̂ ახჰიენახ ი ესტყუ̂ეფახ.
Line: 23 ჟ'ესხირნა̈ნხ მექურწილა:

Line: 24 -- ჯა ლუსო̄ყეჲ, ალე̄სერ ქა იმჟი მოშ ხო̄ქუ̂ა?!

Line: 25 -- აღო მა̈ჲ როქუ ხოჩმინა̄̈ნ? -- ა̈დϩმბაჟე̄დ ლუსოყილდ.

Line: 26 -- მა̈ჲ, ჩუუ̂ როქ ოთმა̈ზრა̄̈ნ, -- ხოჩამდ როქუ ათმარჯუ̂ახ, უშხუ̂ა̄რ თუ̂ეთნადუ როქ ლახმეჩენახ.

Line: 27 -- ალე̄სერ მერმა̈შჟინა̈შდ ჩუ ხეხლი, -- ათხიდϩნϩდ ამი ლიცხრე ლუსოყილს. ქა̄დ ათაგა̄̈ნ შუკს.
Line: 28 ეზა̈რ ხა̈ნჲა̈ ნაზელალუნღო სგა̄̈თჴა̈დϩნა̈ნ საყდა̈რთე̄სგა. ხეწა̈დ, ერე ამჩუნ ბაპ ი დი̄კუ̂ენ იმზირხ.
Line: 29 ქა̄ჩა̈დ ლუსოყი̄ლ ი ხა̈ქუ̂ე:

Line: 30 -- ხოჩამდუ̂ როქ ათმარჯუ̂ახ, უშხუ̂არ თუ̂ეთნადუ როქ ლახმეჩე̄ნახ.

Line: 31 -- ჯა ლუსო̄ყე, ალე̄სერ იმღა ხოქუ̂ა?

Line: 32 -- აღუ̂ ესერ მა̈ჲუ ხოქუ̂ა̈ნ?

Line: 33 -- მა̈ჲ ი ჩუ̂ესერუუ̂ ოთჩოქუ̂ა̈ნ მინეცახა̈ნ, ლიმზირ ი ლოც ესერუ ხოჩუ̂მინა ი ღე̄რბათუ̂ს
Line: 34 ლიშედს ესერუ ლახჴϩრა̈ნ, ღო დემ ესერ ისუ̂ეყიალნო̄ლ.

Line: 35 -- ალას ესერ მერმა̈შჟინა̈შდ ჩუ̂ადნა̈ცხი̄ნე მა̈ხჲადა̈რ, -- ლახტიხ ლϩხიდად ლუსო̄ყილდ. ქა̄დ
Line: 36 ათაგა̈ნ შუკს ი სგა̄̈თჴა̈დϩნა̈ნ ცხეკთეჲსგა. ხეწა̈დ და̄̈შდუ̂ს ი მიჩა ბელა̈რს. ქაჩა̈დ ლუსოყილ,
Line: 37 ჩუ̂ესჩოქუ̂ე და̈შდუ̂ სგუ̂ებინჩუ ი ა̈დბინე ლიმზირ: -- დიდაბუ ესერ ათჴედა მიჩა ჟახეს, ჯაუ̂ ლა̈ხშა̈დ
Line: 38 ი ლახწეუ̂ანა̈ნ მიჩ.

Line: 39 და̈შდუ̂დ დეშ ღალ ოთსურლე ნა̈მზϩრ-ნაჴϩრალ, სგა ხატეტ ი ჩუ ლაჲცϩლϩ̄რე.
Line: 40 ამჟი ა̈დზϩგრან ლუსოყე მა̄რილა ლისუ̂ეყიელ.
Line: 41 ი ლϩმზϩრეუ̂ ლიშდ.

Line: 42
მთქმელი რუსუდან გიგანი (17 წლისა),
Line: 43
სოფ. ომარიშალი.

Добавлено (2007-06-26, 6:46 Pm)
---------------------------------------------
მეთხუ̂ჲა̈რ მა̄რემი ამბა̈უ̂ ("მონადირე კაცის ამბავი")

Line: 2 ლა̈სუდა ეშხუ იღბლია̈ნ მეთხუ̈ა̈რ მა̄რე. ლათხუ̈ა̈რთე ქა̄დრინა, ნა̈თხუ̂არეურ სგა
Line: 3 მამ ტეხენ.

Line: 4 აშხუ̂ინ ლა̈თხუ̈არაჟი კოჯისგა სგა ლახუ̂იდდა ლϩნშინე ღუ̂აშ. ჟ'ესხელ
Line: 5 თუ̂ეფ, ლიდგა̈რი ხო̄პირა̄̈ნ, მარე, ქა ჰალ ხეწა̈დ ლϩნშა̈ნ ლა̈სუ̂, მად ადგა̈რ ი ა̈თჭა̈მ
Line: 6 უ̂ეშგინ. ღუ̂ა̈შდ ქა ა̈დჭემ ეზერ ჯუ̂ე̄დიად ი სგა ა̈თჴა̈დϩნხ ქუ̂ა̈ბთესგა. მეთხუ̂ა̈რს
Line: 7 ქუ̂ა̈ბისგა თერა̈ლ აშ ოთფხა̈ჟ ქე̄რ ხეწა̈დ არმე̄სგა თუ̂ალშ ეშ მϩნარჰე ზურალს. ალა ლა̈სუ̂ და̈ლ.

Line: 8 ალ მეთხუ̂ა̈რ და̈ლდ ჟ'ა̈ნთიშ მიჩა ლელა̈ტდ; უ̂ეშგდ ლატა̈ხჟი ქა ლახუ̂მ წϩრნი
Line: 9 ლაჩა̈ქ ხოხრა კოლფიდშუ̂ ი ჩუ ადშგურა̄ნე, ალ ლაჩა̈ქს ქა ხეკუ̂ეს ნა̄̈რ ხა̈წდა̄̈ნ ი ჩუ
Line: 10 ხეკუ̂ეს ნო̄რს ოთცხირა̄̈ნ. მეთხუ̂ა̈რს დეჲ ლიჩიჟა̄̈ლს ხოყა̄̈ნდა.

Line: 11 მეთხუ̂ა̈რ უ̂ეშგდ ანტა̈ხ ი ეზა̈რ ხა̈ნს დალა̈ ნა̄̈ქუ̂ისგს იგჭა ი ლითხუ̂ა̈რი მეჰად
Line: 12 ხოჩა̄მდ ხემურჯო̄ლ.

Line: 13 ლა̈თხუ̂ა̈რთე ლი̄ზი̄ შელდჟი და̈ლს მიჩა ნიშა̈ნს მეჰად ქა ხაწუ̂ე̄ნა.

Line: 14 აშხუ̂ ლადეღ ლა̈თხუ̂ა̈რთე ლა̄ზჟი ქორს ოთსა̈დ და̈ლა̈ ნიშა̈ნ. ხედუ̂ა̈ჲ ბალიშ
Line: 15 ჩუქუ̂ან ხოშხუ̂ნა̄̈ნ ი ლაყუ̂რა ლარშეჲჟი მიჩა თელღϩრა ქა ხეწა̈დ. ჩუ̂ადკარე კოლეფ ი ქა
Line: 16 ლახყუ̂იზ წϩრნი ლაჩა̈ქ. სგა ლიტხე ხოპი̄რა̄̈ნ, მარე ცუ̂იდდგარ ადჭკუ̄რე. ლაჩა̈ქ ქ'ე̄ჯჟი
Line: 17 აფხა̈ჟ, ერე თხუ̂იმს ი ბოლოს დემთე მოშ ხა̈ჩო.

Line: 18 მეთხუ̂ა̈რს ქა ჰალ ხეწა̈დ, და̈ლდ ნიშნი ლიწუ̂ე̄ნე ხა̄̈ქუ̂ე. -ბალიშ ჩუქუ̂ა̄ნ ესერ
Line: 19 ათსედა - ლახტიხ ეჯნემ.

Line: 20 -ქორთეჲ ესერ ეჯჟი შუ̂იდებდ ა̈ტხენი, გზა̄უ̂რობ ესერი ეჯგუ̂აჲ ხე̄რა.

Line: 21 ეჯ ლადეღ და̈ლდ მეთხუ̂ა̈რ ჩუ̂ადჴაცე. ღუ̂აშ ლაღუ̂აჭჟი ქ'ა̄ნშყა̈დ &#